عليك الله إتعشي وتعالي !!
قزاز ورذاذ
محمد الطيب الأمين
عليك الله إتعشي وتعالي !!
* بين كل ثلاث شباب في السودان ستجد فنان ، وبين كل (ثلاثة) بنات ستجد (أربعة) فنانات ..
* السودان كلو عندو رغبة يغني ..
* زوجة بتاع تحويل الرصيد هي المرأة الوحيدة التي عندما تحول رصيد لا تدفع قروش ..
* (حبيبة) سيد تحويل الرصيد قد لا تحتاج للإشتراك في خدمة العائلة والأصدقاء وباقي الخدمات ..
* لا أعرف كم هو عدد جمهور الفنان وليد زاكي الدين ولكن أنا متأكد أن جمهور وليد أقل بكثير من جمهور هاجر كباشي ..
* في علبة السجائر مكتوب : (التدخين ضار بالصحة ويسبب السرطان) ونفس الجملة مكتوبة أعلي لافتات محلات العماري ..
* رغم هذا تجار السجائر والتمباك هم من (الإغنياء) لأننا نحن الذين نشتري منهم مجرد (أغبياء) ..
* الناس تشتري (العافية) ونحن للأسف كله نشتري المرض بقروشنا ولا حول ولا قوة إلا بالله ..
* حسين الصادق لابد أن يعمل (جرد حساب) لمشواره الفني كل ستة أشهر حتي لا يجد نفسه بعد حين خارج الحسابات ..
* الضحك في بيت البكاء هو اسوأ من البكي في بيت الفرح ..
* وبوبار النساء في بيوت العزاء فيه كثير من الجهل وحب النفس ..
* الإستعراض والبوبار علي هامش الأحزان لا يشبه هذا الشعب الذي يخاف الله قبل كل شئ ..
* عيب والله النسوان يرسمن خصيصا لبيت البكاء ..
* عيب الواحدة تمشي بيت البكاء وهي راسمة ولابسة دهب ..
* الموت لا يستثني أحد وهو الحقيقة الكبري ولذلك علي الناس أن تكون زاهدة في الدنيا وتعمل لتعمير آخرتها ..
* نحنا علي بالقسم مجرد ضيوف في الدنيا ..
* والضيف بيقعد بأدب عشان لما يمشي الناس تتكلم عن (حسن سيرته وطيب معشره) ..
* هم أوقفوا البرتقال الوارد إلينا من دولهم العربية ، لانهم يريدون تحقيق الإكتفاء الذاتي أولا وهذا (عين العقل) ..
* ونحن نصدر (الخرفان) رغم أننا لا نأكل (اللحم) إلا من العيد للعيد وهذا (عين العبط) ..
* في حافلة المواصلات من السهل جدا أن تركب بـ(الشباك) ومن الصعوبة أن تركب عبر (الباب) ..
* وهذه الزحمة هي رأس مال (النشالين) ..
* في العادة (العطر) يميز شخصية الإنسان ..
* هذا هو الطبيعي ..
* (ريحة) من تشمها بتقول دي ريحة فلان ..
* ولكن هنالك بعض الناس يميزون (العطور) ..
* زول مما تشوفو بتشم فيهو (عطر) حتي ولو كان ما متعطر ..
* أقول هذا لأن كثير من الحسنوات يملكن عطر رباني ..
* الذي يتزوج في أيام الغلاء والبلاء هو (راجل ونص وخمسة) ..
* زول في الزمن العلينا ده بيودي شيلة (ستة ستة) قطع شك ده سيد الرجال ..
* الشيلة والريحة والمأكولات وغرفة النوم وحق الفنان والنادي والعشاء وحق الدعوة ..
* كل هذه التكاليف تنتهي بنهاية حفلة الزفاف ..
* الواحد لو داير يعرس إلا يشيلو ليهو (سلفية من البنك) ..
* تشوف ليك (تمويل اصغر) عشان تعرس بيهو ..
* أو تكون مفتح ..
* تودي الشيلة (واحد واحد) ..
* تودي ليهم شيلة (عينة) بس ..
* مش الطبيب بشيل (عينة) من الدم ؟؟
* أنت ذاتك شيل (عينة) من الشيلة ..
* شيل (توب ربط) و(شبشب مرقة) و(عود صندل) و(كيلو لحمة) وقول ليهم دي عينة ..
* يوم الزفاف إتكلم مع العروس من بدري ..
* كلم العروس قول ليها تعالي النادي من بيتكم متعشية ..
* إتعشي وتعالي ..
* أن شاء الله تتعشي بطعمية ..
* بالوضع الشايفو أنا ده تاني من كل بيت سوداني يعرس زول واحد ..
* ناس البيت يجتمعوا ويشوفو ليهم زول واحد يرشحو ويدعمو ويتزوج إنابة عن الأسرة الكريمة ..
* يتزوج ويستلم مرتو وبعد داك يأكل نارو ..
* أن شاء يأكلها (حصحاص) بطريقتو ..
* أن شاء الله ما تأكل رسمي بطريقتو ..
* بمناسبة الأكل ..
* الوجبة الوحيدة التى تصلح في (عيد الحب) هي الطماطم ..
* زمان عندنا ولد في حلتنا بينتظر عيد الحب بفارق الصبر ..
* يوم عيد الحب بيسوق حبيبتو وبمشي بيها (الملجة) بيشتري (3) كيلو طماطم واتنين بطيخة حجم عائلي ..
* حلا وحمار ..
* أحمر في أحمر ..
* وغايتو جنس غايتو ..
* ونركب صافنات ونجيبا (بديرية) وأصلو الزول بيموت والذكري تفضل حية ..
* يا استاذة : كلمة حول لي رصيد بقت في طرف لسانك يا كافي البلا ..
* أنا ما عارف البنات ديل بيحبن الرصيد كده ليه ؟؟
* و..و..
* ولو مغالطنا وما مصدقنا اسأل …(مجرب ما تسأل طبيب) ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app