وتستمر (النيران الصديقة) من (ايمن عدار) الى خالد النعسان)

وإن طال الـسـفـر

محمد عبـد المـــــــاجد

وتستمر (النيران الصديقة) من (ايمن عدار) الى خالد النعسان)

· فوق كاس الممتاز ، وبعد خصم 6 نقاط ، تتخيلوا شلنا كاس (زايد).

· كاس اضافي.

· زيادة فوق الممتاز.

· اسموا كدا.

· كاس (زايد).

· كاساتنا كترت.

· قمنا جبنا لينا كاس (زايد).

· هيع.

· الهلال سيد البلد.

· يمكن انتوا تعتبروا الموضوع دا حقارة من ناس الهلال.

· نشيل الممتاز بعد خصم 6 نقاط.

· ونشيل شيبوب.

· ونشيل جمال سالم.

· ونشيل كاس (زايد) كمان.

· انتوا قاعدين وين؟.

· انتوا حارسين شنو؟.

· والله انا لو في حتتكم دي كان قلبت وبقيت اشجع نيل الحصاحيصا.

· على الاقل في نيل الحصاحيصا ما في زول ح يجيب ليكم خبر.

· النيل الحصاحيصا نزل التانية في زول قال ليه حاجة.

· ولا في زول بيسألكم.

· او يقول ليكم شيء.

· شوفوا الناس ديل (بركة) كيف؟.

· (نقصوا) من نقاطهم في الممتاز (6) نقاط ، قاموا شالوا الممتاز وشالوا معاه كاس (زايد).

· الهلال ناقص 6 نقاط شال الممتاز.

· هو ناقص وشال زايد.

· عشان تاني ما تنقصوا نقطة من رصيد الهلال.

· تنقصوا من رصيد الهلال بنشيل كاس (زايد).

· الناس ديل كلهم بركة.

· مليانين بركة ساكت.

· زايد الخير.

· الشخصية العربية العظيمة ، رحمة الله عليه.

· الفيفا غرمت الهلال 150 الف دولار ، دفعها الهلال للفرنسي كافالي ، عوّضها الهلال بنفس القيمة 150 الف دولار جائزة الفوز بدرع الشيخ زايد.

· بالمقاس.

· او بالاسم.

· شالوا 150 الف دولار.

· شلنا 150 الف دولار.

· يا الكاردينال كدا حاجاتنا كلها رجعت.

· ولا في داعي تمشي المحكمة الرياضية.

· محكمة شنو؟.

· نحن حقنا (تبارك الله) رجع لينا (زايد) كمان.

· يعني عقوبات الفيفا راحت ساكت.

· قلت ليكم الفيفا مغصة شرطتها.

· النقاط عوضناها في الممتاز.

· والدولارات رجعناها من مباراة عام زايد.

· كدا الرسالة وصلت.

· ان شاءالله تكون وقعت ليكم.

· ان شاءالله تفهموها.

· وما تقعدوا تغالطوا تاني.

· نحن ما عندنا حاجة ساكت.

· نحن بنقصدها.

· نحن أي حاجة عندنا بي نظام.

· بنقول ليكم الكلام دا وبتعتقدوه لعب.

· ونحن ما قاعدين نلعب.

· بنشيل حقنا من حباب عينيكم.

· ختمنا الموسم بي كاس الممتاز بعد خصم 6 نقاط.

· وافتتحنا الموسم الجديد بي كاس (زايد).

· الخير راقد.

· وزايد الخير.

· التاريخ سوف يحفظ للهلال هذا اللقب في مئوية الشيخ زايد.

· حكيم العرب.

· كبير يلاقى كبير.

· حققنا كاس (زايد) فوق كاس الممتاز.

· نحمدك يا رب.

· وهلالاب نحمد الله.

· الممتاز الثالث تواليا للهلال ، والخامس في الملعب بعد (شولة) سمير فضل.

· بعد الكلام دا جابوا لينا شنو؟.

· جابوا لينا كاس (زايد).

· برضو شلناه.

· ما خلينا ليكم شيء.

· وصيف في أي حتة.

· انتوا الفيفا خصمت ليكم من رصيد الهلال (6) نقاط ، ما عملتوا شيء.

· عاوزين تعملوا شيء في ابوظبي.

· الكلام دا ما بتقدروا عليه.

· الكلام دا كبير عليكم.

· انا متأكد مامون ابوشيبة بيقوم يشوف ليه (صفيحة) شالها المريخ (زورا وبهتانا) في سوق القش ، عشان يغطي بيها البطولة دي.

· مامون ابوشيبة بيقوم يرجع ليكم 70 سنة للوراء ، عشان يكتب ليه حاجة من كتاب المطالعة لا اساس لها من الصحة.

· يقطعوا من رأسهم.

· ويشتلوا.

· شتل ساكت.

· غير الفصاحة في الاعمدة ، وطولة اللسان في البرامج التلفزيونية ، ما قاعدين نشوف ليكم.

· ناس مزمل ابوالقاسم فاكرين البطولات تتحقق بالغلاط.

· الناس كبرت على الكلام دا.

· الكلام دا بقى ما بجيب ليه فايدة.

· يعني انت زول غالاط – انا بحب المريخ.

· عاوزين تخدموا المريخ بالغلاط.

· اخدموا المريخ بالشغل.

· بالمال.

· بالتخطيط.

· بالتعلم من الاخطاء.

· وليس بالغلاط.

· والله طول ما انتوا ماشيين في (غلاطكم) دا ما تحققوا ليكم شيء.

· الغلاط والبطولات ما بتلاقوا.

· تزوروا في التاريخ وتغيروا في الحقائق ، ووقت يجوكم ساعة الجد ، ما قاعدين تنستروا.

· جابوا ليكم حكم عالمي.

· وتقنية فيديو.

· و40 كاميرا ناقلة للمباراة.

· و70 صحفي مرافقين للمريخ في الامارات.

· عشان ما تنكروها.

· ما قاعدين تنستروا.

· العالم كله شهد بذلك.

· فضيحتكم بقت على كل لسان.

· ما تقعدوا تقولوا لي المريخ لعب في الشوط التاني.

· انتوا قالوا ليكم الشوط الاول (قطاع خاص).

· الشوط الاول كنتوا وين؟.

· الشوط الاول كان برة المباراة.

· الشوط التاني ذاتو الدقيقة 95 كنتوا وين؟.

· الاستاد كلو مصنقع.

· في الدقيقة 95.

· تعرفوا احلى ما في انتصار الامس انه تحقق في الدقيقة 95.

· في هذا الوقت ينتصر الكبار.

· واجمل ما في ذلك ان هدف الفوز بتاع الهلال حققه خالد النعسان.

· في واحد قاعد بيحضر معاي في المباراة.

· للامانة نظرو ضعيف.

· وقت قلتوا ليه هدف الهلال جابوا خالد النعسان ، قال لي انت الكاردينال عملها.

· قلت ليه الكاردينال عمل شنو؟.

· قال لي انت تعال هنا الكاردينال مع جمال سالم جاب خالد النعسان.

· قلت ليه : ابدا.

· قال لي طيب دي حصلت كيف؟.

· اشرحها لي.

· فهمنا ليها.

· قلت ليه خالد النعسان لو الكاردينال جابو الهلال هدفو دا ما كان جابو.

· خالد النعسان زي (شجرة الدليب).

· ضلها بيرمي بعيد.

· ضلها بيستفيد منو البعيد.

· حارسكم مع انو اسمو (منجد) النيل ما قدر يعمل ليها حاجة.

· طيب انت (منجد) في شنو؟.

· ركزتوا في امبومبو ونسيتوا خالد النعسان.

· صلاح نمر دي ما بيستوعبها ليكم.

· بكون لغاية الآن ما وقعت ليه.

· يا ربي ح تشرحوها ليه كيف؟.

· غايتو المرة دي وبعد هذا الهدف ارتحنا من مبررات مامون ابوشيبة.

· يمين لو القون ما جابو خالد النعسان كان مع تقنية الفيديو ، مامون ابوشيبة كان قال ليكم (تسلل).

· بعدين انت يا خالد النعسان دي (كشافات) ينعسوا فيها.

· 40 كاميرا نقالة للمباراة.

· وتقنية فيديو.

· و70 صحفي من المريخ.

· وانت يا خالد النعسان – برضو (نعسان).

· أي حاجة شاهدنها للهلال والمريخ ، من يوم ما قمنا ولغاية الآن ، ما شفنا لينا (سترة) للمريخ قدام الهلال.

· المريخ ما حصل حقق ليه بطولة او كاس على حساب الهلال.

· كان جميل من معلق المباراة سعيد الكعبي وهو يؤكد سيادة الهلال ويقول ان الهلال سيد البلد برة وجوة.

· برة البلد.

· وجوة البلد.

· الهلال سيد البلد.

· الهلال اكدت سيادته على المريخ برة البلد.

· الموضوع ليس حصريا على البلد.

· السيادة عامة.

· سيادة الهلال برة وجوة.

· هذه اضافة يجب ان تحفظ حقوقها لمعلق المباراة الجميل سعيد الكعبي.

· وهي شهادة لنا ان نعتز بها من معلق اكتسب خبراته من التعليق على مباريات برشلونة ومباريات الريال.

· سيد البلد.

· جوة البلد.

· وبرة البلد.

· من النقعة.

· الى ابوظبي.

· عندنا واحد.

· ما في فرق.

· زي ما جبنا (كاس الممتاز) من النقعة بدون تتويج ، جبنا (كاس زايد) من ابوظبي بي تتويج.

· حرمونا من (التتويج) في النقعة…امام مريخ الفاشر.

· قمنا عملنا (التتويج) في ابوظبي…امام المريخ.

· قلنا ليكم الناس ديل كلهم بركة.

· الهلال حسم بطولة الممتاز بعد ان لعب المريخ امام المريخ الفاشر.

· شككوا في قوة مريخ الفاشر.

· واعتبروا تعادلنا معه ، غير مبرر كافي لفوز الهلال بالدوري.

· قمنا عملنا شنو تاني؟.

· جبنا المريخ (الكبير).

· سيد الاسم.

· خلوه مريخ الفاشر.

· وعملنا معاه مباراة في ابوظبي.

· بحكم (مونديالي).

· وفي حضور تقنية الفيديو.

· و70 صحفي من المريخ في ابوظبي.

· كلهم مشوا يغالطوا.

· وانتصرنا عليهم بعد ذلك.

· عشان ما يكون عندكم عذر.

· تاني شنو؟.

· شككتوا في مريخ الفاشر…انتصرنا على مريخ ام درمان.

· شككتوا في التحكيم.

· جبنا ليكم (الفار).

· اصلو ما عندكم عذر.

· تاني تقولوا شنو؟.

· شبكتونا بطولات جوية …والكاس المحمولة جوا ، جبناكم انتو ابي شحمكم ولحمكم.

· وطلعنا بيكم برة البلد.

· طلعنا بيكم جوا.

· وفزنا عليكم.

· تاني ما عاوزين نسمع أي سيرة للبطولات الجوية…لأن الهلال حقق بطولته الجوية على حسابكم.

· مفروض تاني ما تتكلموا في الموضوع دا.

· مفروض تاني سيرة زي دي ما تجيبوها.

· الجميل زي ما قلتوا في مباراة الامس ان هدف الهلال جاء عن طريق نيران صديقة.

· انتوا قصتكم شنو مع (النيران صديقة).

· ما فعله ايمن عدار في (الشكوى)…جاء وفعله خالد النعسان في ابوظبي.

· من نيران صديقة أي نيران صديقة.

· ان شاءالله يا ايمن عدار ويا خالد النعسان ما نفقدكم.

· ان شاءالله دائما نلقاكم في الشدائد دا.

· الممتاز جابوا ليهم بعد خصم 6 نقاط من الهلال ما شالوه.

· قالوا ليهم اتعادلوا فقط مع الهلال بتشيلوا الكاس.

· ما اتعادلوا.

· قالوا ليهم طيب فوزوا على (ولدكم) مريخ الفاشر تشيلوا الكاس.

· ما فازوا.

· جابوا ليهم شكوى (جاهزة) هدية من مريخ الفاشر قالوا ليهم اكتبوها صاح تشيلوا الممتاز.

· كتبوها غلط.

· طلعنا بيه مبرة البلد.

· وجبنا ليهم حكم مونديالي.

· وتقنية فيديو.

· واتعادلنا معاهم لغاية الدقيقة 95.

· قام خالد النعسان الوضوع دا ما عجبو.

· جاب ليه قون في المريخ ، هداف الدوري ما جابو.

· وليد الشعلة عندو 16 هدف سجلهم لصالح الهلال.

· لكن للامانة هدف خالد النعسان في منجد النيل كان اجمل.

· او خلونا نقول كان اغلي.

· خالد النعسان مفروض ناس الهلال يعطوه حافز مع ناس بشه وبويا وشيبوب.

· انتوا شيبوب مالو فرحان كدا.

· الفرحة عاوزة تشقو.

· ان شاءالله الافراح دائمة يا شيبوب.

· انت ذاتك وش خير.

· افراحنا مستمرة معاك.

· وتستمر الافراح.

· من ايمن عدار.

· الى خالد النعسان.

· ……….

· ملحوظة : والحمدلله على نعمة الهلال.

هوامش

· سيناريو المباراة بصورته دي كان اروع بالنسبة لنا.

· الدقيقة 95.

· والهدف عكسي.

· اجمل شيء.

· اروع حاجة.

· الفرحة كدا اكبر.

· الزلفاني خصمو ليه 6 نقاط ما شال الممتاز.

· الزلفاني طلع امس وقال عندنا اربعة او خمسة فرص في الشوط التاني.

· خلاص يا زلفاني عيش على الفرص دي.

· لمن تلحق مريخ كوستي.

· الزلفاني قال الاتحاد السوداني حرمه من اضافة البرازيليين.

· الزول دا قاعد يلخبط.

· من حرم المريخ الفيفا وليس الاتحاد السوداني.

· كمان عربي ما بتعرفوه.

· الهلال تاني ما يرجع لي وراء.

· واي بطولة الهلال يجيبها.

· برة.

· وجوة.

· نشيل أي حاجة.

· وافريقيا عاد لها فارسها.

· ونشكر الله.

· ونذكر فضله.

· والهلال نعمة.

· وابقوا على سفر.

· …………

· عاجل : (الفار) ما عرف يقول شنو لي (خالد النعسان) ، دخلتوا (الفار) في حتة ضيقة!!.