فرحان بشيوخ العرب 

 في السلك

بابكر سلك

فرحان بشيوخ العرب

*الحبيب محمد عبدالماجد فرحان بشيخ تونس وعمدة الجزائر فرح شديد

*وعمل من القصة ربيع عربي واحد وربيع عربي اتنين

*ونسي ود عبدالماجد ان كردنة سنويا يلخمهم ببضائع من سوق المواسير

*ليأتي الناس في نصف الموسم وفي مقدمتهم محمد عبدالماجد ليتحدثوا عن عشوائية التسجيلات في الهلال

*ثم نأتي نحن المريخاب في آخر الموسم لنتحدث عن الصفر الدولي والمحاولة الجديدة للتخلص منه(كالعادة)

*يامحمد عبد الماجد التونسي قد هرم

*اما الجزائري فاجزم لك انه اكبر من كردنة زاتو

*الزول ده اقل شئ لو مارافق عبد القادر الجزائري

*شاف عبد القادر الجزائري

*ياخ بو تفليقة بطل سياسة

*ده لي اسي بلعب كورة؟؟؟

*الجزائر وتونس بتشرقكم انتو بس

*اما نحن فاسأل عنا التوانسة عشان يوريك كيف اقصينا الترجي علي ارضو بهدف ضفر

*ومشي شاف كونفدراليتو وين

*اسأل الجزائريين عن المريخ

*حايقولوا ليك افريقيا فرتق الجزائر كلها

*من سطيف مرورا باتحاد العاصمة وحتي العلمة

*وحايقولوا ليك عربيا المولودية تعرف قدر الزعيم

*نحنا مابقشروا علينا بعواجيز من تونس والجزائر

*انتو يامحمد عبدالماجد تفرحوا بلاعب تونسي لعقدة خمسات وستات الترجي

*ياخ فريق يديكم ستتين وخمستين في اربعة مباريات

*اتنين وعشرين قون في اربعة مباريات

*ليكم حق تتشرقوا بلاعب  من بلدو ولو كان متقاعد

*واحتفاليتكم بالعجوز الجزائري لان الجزائر شالت كاس افريقيا

*وطبعا كاسات الكاف دي عقدتكم يا اجمل صفر

*يبقي مفروض تحدثنا عن الصفر العربي لا الربيع العربي ياحمادة

*ايها الناس

*اعتمد محمد عبدالماجد علي ماخطه قلم استاذنا القامة مأمون ابو شيبة

*ونحنا مع ابو شيبة

*كان اتكلمنا نبقي شيوعيين

*وكان سكتنا مدني تغرق

*ابو شيبة قال خايف المريخ ينزل درجة تانية

*طبعا يقصد بسبب ديون الفيفا

*طيب لما قلنا في ديون طلعتونا كفار ليه يا ابو شيبة؟؟؟

*ويعود محمد عبدالماجد ليتحدث عن الدعم الحكومي للمريخ

*اول حاجة كردنة رجع ولا لسة؟

*ان شاء الله المانع خير!!!!!!!!!

*تانيا دعم حكومة الكيزان للهلال لاينكره احد

*مليون دولار الدمغة الجابوا بيها اتوبونج دي كانت اجرة دكاكين الهلال؟

*مليارات حلحلة الديون في عهد عطا المنان جاتكم تحويل من السعودية؟؟؟

*المقصورة الطائرة البنوها ليكم الكيزان سنة اتنين وتسعين

*كان دفع حقها جمهور الهلال؟

*الاعفاءات الجمركية لتشييد الجوهرة الكيزان عملوها لي منو غير الهلال

*ومجلس المدهش الم يدهشكم بقروش الحكومة يا ميدو؟؟؟؟

*ياخ انتوا الحكومة المخلوعة شدة ما دعمتكم

*هيثم شاكل البرير

*القصر خلي الفقر والجوع والمرض وتدهور الخدمات ووقعة الجنية السوداني والعطالة

*وتفرغ لحل اشكالية هيثم مع الهلال

*واريتو بعد ده لو جاب مريسة تامزينو

*قبع الصفر في صفرو

*تلاتة وتسعين سنة ومريسة تامزينو افريقيا تسمكم

*تتذكر مجلس الفقراء في الهلال؟

*كان بصرف من فقرو؟؟؟

*ماتنسي يامودي الطريقة الاتشالت بيها التبرعات الجبرية من مستأجري دكاكين الهلال

*وتغيير العقودات معاهم فوق للقانون برغم قرار النائب العام

*كلها ملفات سيفتحها مستأجري الدكاكين

*ياخ حكومة تجيب تاتشراتها وامنجيتها يقفلوا دكاكين الناس لارغامهم علي تنفيذ شروط وبطريقة تخالف قرار النائب العام تكون مابتدعم الهلال كيف بس

*قلت لي كردنة جاي متين؟؟؟؟

*اما اليوغندي

*واحشنا والله

*ماملاحظ يامحمد عبدالماجد من سفرة اليوغندي اليمني البيض بقي نادر في البلد دي وسعرو ارتفع!!!

*ان شاء الله يرجع عشان البيض يرقد ويرخس

*القصة عرض وطلب

*فهمت يا  الوصيف!!!!!

*ايها الناس

*هاني ابو ريدة رئيس الاتحاد المصري لكرة القدم

*صرح بان احداث فاصلة مصر والجزائر دبرها اتحاد الكرة المصري وآخرين

*تصريح يخجل

*لمن المذيع قال ليهو يعني نحنا الخدنا الناس للسودان وعملوا العمايل المهببة دي؟؟؟؟

*طيب يا اولاد ال   النيل مشبكنها فينا ليه؟

*جونا بالتوك توك وضربونا في مطعم الساحة

*وامور تلاتة ورقة القلتوها ديك كلها؟

*موش مفروض ندور الموضوع ده سياسيا واعلاميا دفاعا عن سمعتنا؟

*غايتو الموضوع ده شخصيا مابخليهو

*قلت لي الصفر العربي

*اقصد الربيع العربي يا محمد عبدالماجد؟

*صدقني

*الموسم العربي العجوز ده الكتابة عن عثمان حسين مابتكفيك

*اكتب لينا عن حسن خليفة العطبراوي معاهو

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت ياوالينا

*قالوا النائب العام عن فض الاعتصام تحرياتو كملها لينا

*الشهداء الكرام معروفين

*المفقودين في التقرير ضمنهم لينا؟؟؟

سلك كهربا

ننساك كيف والكلب قال معرفة مصير المفقودين قضية اساسية فالشباب ديل اساسيين

والي لقاء

سلك