* الجديد في (مقاطعة اللحم) هو (الإعلان) عن مقاطعة اللحم .
* كنا مقاطعين وساكتين والآن مقاطعين بالصوت العالي .
* وأظن وليس كل الظن إثم أن المقاطعة الصامتة أقسى من المقاطعة المعلنة .
* بعد (30) سنة قاطعنا (اللحمة) وهي التي قاطعتنا قبل (30) سنة .
* إحنا وأولاد حلتنا وصلنا لقناعة إنو اللحم ده ناكلو في الجنة بس .
* في الجنة يا مولانا في الجنة .
* لا هيثم مصطفى بيستحمل (دغمسة) الكاردينال ولا الكاردينال بيستحمل (غرور) هيثم.
* ولذلك هيثم لن يزيد عن (45) يوماً، في الهلال، ولهذا عليه أن يقضي هذه الـ(45) يوماً، بكل هدوء وطيب نفس.
* الهلال حالياً (ما ناقص) وأي صراع داخلي أو حرب ناعمة سيدفع ثمنها الفريق.
* إذا تعامل هيثم مع المرحلة بعيداً عن (هيثم الزمان داك) يمكن أن تظهر بصماته ويمكن أن يفيد الهلال .
* ولكن مشكلة هيثم إنو لسه بتعامل باعتباره (هيثم الزمان داك) .
* تغيَّر الزمن وتغيَّرت الأدوار يا هيثم.
* هذا زمان بشة الصغير وموفق صديق وصهيب الثعلب وسليم عطبرة والشيخ وسفاري وغيرهم من مواهب الهلال .
* وقطعاً ما في زول بياخد زمنو وزمن غيرو .
* وقبل هذا وذاك نقول نسيج الهلال الاجتماعي خط أحمر، رغم أن الكاردينال انتهك هذا النسيج خارج الملعب .
* حاجة تكسف.
* مما قمنا عرفنا إنو عناصر .
* الجمال (3) هي: الخضرة والماء والوجه الحسن .
* وسقط البشير وعرفنا إنو عناصر الحكومة المدنية (3) هي : (الطول والعلا والوجه النضر) .
* انتهى عهد (الثوب الأبيض والكارينا الليمونية) … والله يقطع سنين (الشبكة طاشة تعال بكره) .
* خطورة فريق انيمبا تكمن في اجادته الكبيرة للعب خارج أرض الملعب .
* أنيمبا يلعب خارج الملعب بشكل متقن.
* يستميل الحكام ويجيد فنون الحرب النفسية.
* الهلال من جانبه يجب أن يغادر مبكراً حتى يتفادى الإرهاق وحتى يتجاوز الحرب النفسية المتوقعة من المطار .
* أما داخل أرض الملعب فنتمنى أن يعيد الهلال ذكريات صولات وجولات كانت له في معقل أنيمبا.
* طالما الهلال في الميدان فنحن لا نقطع العشم والرجاء.
* والله في.
* عندما كانت الدنيا بخيرها كان (الذباب) ينام عند السادسة مساء.
* أكتر حاجة كانت عاجباني في الذباب هي حرصه علي مواعيد نومو.
* كنت معجب بالحاجة دي عند الذباب.
* وطبعا أي زول حر في (إعجاباتو).
* الآن أنا حزين.. حزين ما عشان الذباب بقى يساهر لحدي عشرة مساءً، بل حزين عشان الذباب علم البعوض حوامة النهار وقلة الأدب.
* حالة صعبة.
* مهاجم الهلال الشاب وليد الشعلة يجب أن يجلس مع نفسه عاجلاً وليس آجلاً.
* الشعلة لاعب كبير وصاحب حضور وحساسية عالية تجاه الشباك ولهذا يجب أن يجتهد حتى يكون كما كان.
* الهلال يحتاج للشعلة في هذا التوقيت أكثر من أي وقت مضى.
* نرجو أن يراجع حساباته ويعود نجماً لكل المباريات .
* بمناسبة المباريات.
* تبقت للمريخ آخر سفرية هذا العام.
* سيسافر المريخ إلى المغرب ليلعب الإياب أمام الوداد .
* وبعد هذه السفرية لن يركب المريخ الطيارة إلا في الموسم القادم.
* من المغرب يطير.
* ماشين عشان يطيرو.
* أول مرة في حياتي أشوف لفريق مسافر عشان يطير.
* عارف نفسو طاير ومع ذلك مسافر.
* طيران من الإفريقي وطيران من العربي.
* يعني تاني السفر بالباصات فقط.
* حتى جمال الوالي الكان بيعمل ليكم سيكافا قام سقط.
* وغايتو الله يكفينا شر (المصدي) اللمعتو الأيام .
* ليس هنالك حالة تسوُّل وشحدة أكبر وأوضح من تلك التي مارسها التجاني حاج موسى عبر حنجرة كمال ترباس عندما قال : (وحاول لو قدرت كمان تقدر رِقة الحابيك) .
* والله يا التجاني هو من وصل معاك مرحلة (يحاول دي) المفروض (ترمي طوبتو) .
* حالة صعبة .
* في عز انشغال الناس بالثورة بلغ سعر (كأس الزبادي) 45 جنيهاً .
* الزبادي الكبير (45) والزبادي الصغير (22)، علماً بأن الكبير والصغير كلاهما ما بسد الجوع .
نحن ننصح الأخ أسامة داوود بأن يبيع هذه الزبادي في الصيدليات وليس البقالات .
* ربما يكون هذا الزبادي (دواء وعلاج) من الأمراض الكبيرة .
هو أنت يا أسامة قايل الزبادي ده شنو؟
* الزبادي في الحقيقة هو (لبن بايظ) ، أو هو (لبن معفن) ، أو بالأصح (لبن واتقطع) .
* لبن معفن واسم الدلع (زبادي) .
* وغايتو جنس غايتو .
* مباراة الهلال أمام أنيمبا لن تحتمل التجريب والتنظير.
* وإذا كان التونسي الجزائري (مش ولابد) فنرجو عدم المجازفة .
* ونركب صافنات ونجيبه (بورتسودانية) وأصلو الزول بيموت والذكرى تفضل حية .
* و..و..
* الزمان زمانك أهدي لي من فضلك نظرة في …..(جزلانك).
