فضيل : اتجهنا للإعلانات (عشان مانشحد) وجمهوري (بتاع آخرة) ساكت

في وقت وجيز استطاع أن يحتكر قلوب كل السودانيين وهو يقدم السهل الممتنع من الكوميديا عبر سلسلة يوميات فضيل ، والتي صارت حلقاتها اليوم متنفساً للكثيرين والذين باتوا ينتظرون يوم الخميس بفارغ الصبر، نعم، هو الكوميديان المُعتق عبد الله عبد السلام والذي اصطادته (خرطوم ستار) في حوار مختلف فتح قلبه خلاله وباح بالكثير المثير .
قبل كل شئ حدثنا عن الهجوم الأخير عليك بسبب تخصيص بعض حلقات فضيل للإعلان وجني الأرباح

أنا أعتقد أن هذا الهجوم غير مبرر، لأننا وبكل صراحة مافي زول بدعمنا، وبنعتمد في إنتاج السلسلة على الدعم الذاتي واليوتيوب، وحتى اليوتيوب ذاتو قروشو مامنتظمة، عشان كدا لازم نخصص حلقات للإعلان عشان نقدر نواصل في الإنتاج .
ألم تجرب التلفزيون؟

التلفزيون زمان كنا بنديهو الشريط بتاع العمل الدرامي ويدينا قروش، حالياً بقينا ندي التلفزيونات الشريط وندفع كمان نحن القروش عشان يبثوا لينا، (عليكم الله دي هسي ماعوجه)؟
مدة زمن الحلقات بسيطة جداً ولا أعتقد أنها تكلف الكثير من المال

يازول (الفي البر عوام)، عشان كدا الناس بتتكلم ساكت، والحلقات البتقول مدتها ٥ دقائق دي عشان نطلعها بنقعد فيها ساعات ومرات أيام .
بعد التغيير الذي حدث في البلاد.. ما الذي تحتاجه الدراما السودانية لتنهض من جديد؟

الدراما في السودان محتاجة مسؤولين فاهمين دور الدراما وتأثيرها في المجتمعات، لأنو لما يكون المسؤول فاهم بقدر يعرف احتياجاتك ويوفرها ليك، ونحن والله كدراميين بنحلم بالحد الأدنى من الاهتمام، عشان نقدر نواصل ونبدع .
شخصية فضيل كيف ابتكرتها؟

فضيل شخصية موجودة من بدري وظهرت في سلسلة درامية أنتجها الأخ الممثل جمال عبد الرحمن لقناة الشروق، وبعد الشخصية لاقت رواج بدينا نشتغل عليها .
مالذي يميز شخصية فضيل ؟

البساطة، فضيل دا هو خالك وعمك وجارك في الحلة، عشان كدا كل الناس أستقبلتو بي ترحاب.
هل الرسالة التوعوية مهمة لديكم في السلسلة؟

نحن أي شغل بنقدموا عندو رسالة، ماعندنا إطلاقاً شغل ساكت للضحك وخلاص، بعدين لو لاحظتو نحن بنحاول كمان ننفض الغبار عن الكثير من مفرداتنا القديمة، ونعرف الجيل الجديد عليها، وكمان أنا بحاول وبجدية أنقل الريف للمدينة وليس العكس، خصوصاً بعد أن ظهرت مفردات ولغة جديدة تستخدم في الشارع السوداني يطلقون عليها (الراندوك)، (طيب مش أحسن نترندك بي مفرداتنا السمحة دي)؟
شخصية فضيل لم تثر إعجاب السودانيين وحسب، بل حتى الخليجيين والعرب جذبتهم وصرنا نشاهد بين الفينة والأخرى شاباً أو فتاة وهو يقوم بتقليدك ؟

والله هذا فضل من الله، وأنا صراحة أول ماشفت القصة دي انبسطت خالص، واتملكني إحساس جميل أنو نحن قادرين نوصل حاجاتنا للخارج .
ماهي أبرز الموضوعات التي ستتم مناقشتها مستقبلاً خلال السلسلة ؟

حنتناول مواضيع كتيرة زي السياحة والثقافة، خصوصاً السياحة، لأننا بنمتلك أماكن وطبيعة وثراوت سياحية خيالية لكننا ماقادرين نستفيد منها .
موقف أضحك (فضيل)

الموقف كان معاي فيهو البلولة، كنا في سفر وغشينا قهوة في القطينة، أها، أنا خشيت جوه القهوة والبلولة قاعد بره، فجاة في زول نط من لوري وجا على البلولة وسالو: أنت البلولة؟ أنا مامصدق والله، وبقي يسلم عليهو فجاة أنا جيت مارق الزول نطط عيونو وسالني: أنت فضيل؟ قلت ليهو اي فضيل، قال لي:” معقولة أنت زول زينا كدا بتاكل وتشرب وتسافر؟، أنا طوالي فكيت الضحكة وغلبني السكات “، (يضحك) .
فضيل كيف تتعامل مع المعجبات ؟

أنا أصلاً معظم جمهوري رجال يعني ناس أخرة ساااااااكت، (يضحك) .

المصدر: خرطوم ستار