ليه بنقول الرجال مواقف وما بنقول النسوان مواقف ؟

بالعربي الكسيح
محمد الطيب الأمين
ليه بنقول الرجال مواقف وما بنقول النسوان مواقف ؟

* هنالك مواقف معينة تصنع الرجال.
* يقول ليك : (الرجال مواقف).
* وهنالك رجال يصنعون (المواقف).
* وأنا حقيقة ما عارف حكاية (المواقف) دي ليه ما شاملة النسوان ؟
* يعني النسوان ما مواقف ولا كيف ؟
* بعد نجاح الثورة والدور الكبير والمؤثر للكنداكات يحق لنا أن نقول: (النسوان مواقف).
* فتاة شالت البمبان مشتعل وأرجعته للمصدر .. (موقف ولا ما موقف) ؟
* فتاة الرصاص عن يمينها وعن شمالها وهي باركة في الأرض بتطلع (رصاصة حية) من بطن شاب ما بتعرفو .. (موقف ولا ما موقف) ؟
* دي مواقف نسائية يفترض الطاهر حسن التوم (يندقر راسو لما نجيب سيرتها).
* بعد هذا يستحسن أن نقول: (الرجال مواقف وكذلك النساء) .
* المواقف يصنعها (الرجال والنساء) هكذا أثبتت الثورة السودانية العظيمة.
* وبما أن ذلك كذلك فنحن ننتظر من نجوم الهلال الرجال (مواقف).
* ننتظر منهم مواقف تشبه مواقف كل من حمل الهلال هماً وعشقاً.
* هي (180) دقيقة، نصفها بعد غدٍ في زيمبابوي ونصفها الآخر بأم درمان.
* حقت زيمبابوي نصيبنا فيها سيكون الدعاء فقط.
* فهي مسؤولية نجوم الهلال عندما يواجهون فريق بلاتينيوم عصر السبت، في مباراة يلزم أن لا يخسرها الهلال.
* مباراة لن تكون سهلة برغم أن الخصم ودع البطولة.
* بلاتينيوم يلعب بدون توتر ويقاتل من أجل أن يحافظ على سمعته وشرف المنافسة.
* أما الهلال فإذا أراد المضي قدماً في درب البطولة عليه أن يكسب ثلاث نقاط أو نقطة على الأقل .
* نحن أكثر نادي في أفريقيا ينادي بشرف المنافسة .
* لما المنافسة تكون شريف فذلك من مصلحة الهلال .
* الفرق الأفريقية خربت طباع الحكام وأصبح البيع والشراء هو أساس اللعبة .
* الهلال لو كان بشتري المباريات كنا كل سنة بنجيب كأس أفريقي.
* الهلال لا يعرف هذه الأساليب غير الأخلاقية وهذا بشهادة أفريقيا كلها.
* الهلال هو أكثر نادي أفريقي اتظلم جوه إستادو.
* جوه إستادنا ظلمونا الحكام الما بخافوا الله .
* ولو كان الهلال (زي ناس تانيين) عليَّ بالقسم ما في فريق بيدخل إستادنا بيطلع سعيد .
* وعشان ما نمشي بعيد لو صحي الهلال بحسم المباريات خارج الملعب لما خسرنا أمام النجم بملعبنا قبل أسبوعين .
* المهم .
* ننتظر (مواقف) من نجوم الهلال .
* نطلب من اللاعبين أن يخوضوا مباراة بلاتينيوم ومباراة الأهلي من أجل هذا الجمهور الذي قدم (السبت) ولم يجد (الأحد).
* انسوا كل حاجة وخلوا همكم الجمهور.
* نحن عارفين عندكم باقي حوافز ومستحقات.
* وعارفين إنو الكاردينال اختصاصي تخدير كبير ولا يوفي بوعوده إلا بمزاجه.
* زول ممكن يضبح للأسود في حديقة القرشي حار حار لكن لما يسألوا من حافز مباراة النجم يقول ليك بكره .
* نحن عارفين الحاجات دي كلها، عشان كده بنقول للاعبين العبوا من أجل جمهوركم.
* حققوا المطلوب أمام بلاتينيوم ونحن مسؤوليتنا مباراة الأهلي .
* سنحول مباراة الأهلي لمعركة وبإذن الله يخسر المصري بقوة حناجرنا وعرق لاعبينا .
* (60) ألف حنجرة لما تقول (هلااال) عليَّ بالنعمة سمية الخشاب في الإسكندرية ترجف .
* مباراة الأهلي دي خلوها علينا .
* ومباراة السبت عليكم .
* تعادل في زيمبابوي وفوز على الأهلي بهدف في أم درمان يعني تأهل الهلال إلى دور الثمانية إن شاء الله .
* الموضوع ما صعب .
* نجتهد ونقاتل وسنحقق ما نريد .
* ولابد أن نتذكر أن الهلال هو الوحيد الذي يمثل السودان سنوياً في مثل هذه الأدوار .
* جنس تمهيدي .
* بمناسبة التمهيدي … إن شاء الله (الأسود) قاعدة تشرب شاي الصباح وكده ّ
* وغايتو جنس غايتو .
* ونركب صافنات ونجيبه (هلالابية) وأصلو الزول بيموت والذكرى تفضل حية .
* و..و..
* وبنهديك المشاعر وأنت …. (بتشتري في العجالي لأسود حديقة القرشي).