*زماااان
*قالوا في واحد داير يعرس غريبة
*لكن جدو محرم على القبيلة كلها عرس الغريبات
*داير تعرس
*إن مشيت بعيد جداً بت عمك
*صاحبنا ده اتكسر ليهو في كنداكة زي الورد
*وقرر يعرسها لو يطردوهو من القبيلة
*القبيلة شنو
*لو يطردوهو من الجنة وسقطها
*لملم بعضو ومشى لي جدو
*ياجدي يا كبيرنا ياساسنا وتاج راسنا انا بدور اعرس
*جدو برم شنبو وشال سوط العنج اده ليك نفسو سوطين زي الرصاص وقال
*العروس بت ياتو في اعمامك
*صاحبنا بلع ريقو تلاتة مرات ما اتبلع ليهو وقال
*ما بت واحد في اعمامي
*جدو قال ليهو بت واحد في خيلانك؟
*مالك مشيت بعيد كدي؟
*لكن مافرقت
*خيلانك برضو فرسان يملوا عين الشمس
*صاحبنا جا يبلع ريقو بلع لسانو
*جدو قال ليهو بنهره مدنقر زي الحريم مالك؟
*النهره دي طلعت لسان صاحبنا بعد بلعو وقال
*ما من بنات خيلاني ياجدي
*غريبة
*جدنا لما سمع غريبة شنبو نصو اتحت وتمالك نفسو وقال
*طويلة؟
*صاحبنا خاف يقول طويلة ووب يقول قصيرة ووب
*سكت ساكت
*جدو تاني سأل
*وصفها لي ؟؟؟
*صاحبنا قال
*لو جات مع الطوال اقصرن ولو جات مع القصار اطولن
*لو جات مع الخضر اصفرن ولو جات مع الصفر اخضرن
*جدو قعد يضحك وقال
*دي عروس ولا سوداكال؟؟؟؟
*صاحبنا قال لي جدو سوداكال كيف يعني؟
*جدو قال ليهو سوداكال لو جات ضرورة الدفع هو مع الاقطاب، بل اقطبن
*ولو جات سيرة الرئاسة والوجاهة هو ارأسن
*زولتك دي اختاها ياولدي
*بتركبك ماسورة
*اها
*نحنا في خصوص المجالس دحين آدمن ده ما تعبنا شديد؟؟؟
*المرحلة مرحلة صالح مريخ وبس
*والواقع يقول إن صالح المريخ ينحصر في اختيار مجلس قدر المرحلة
*بالقانون
*يعني بالسبل التي يكفلها القانون في دولة القانون
*وليعلم اعضاء مجلسنا إن الاستقالة هي عمل ديمقراطي وقانوني
*وانها ادب يتأدب به النخبة من البشر
*وهي وإن كانت تعبير عن الاعتراف بالفشل
*فهي ايضاً تحمل بين طياتها تعبيراً عن حب الكيان والخوف عليه
*لذا
*يا آدمن
*يا آدمن قروب المجلس
*فرتق القروب وروق القلوب لينعدل المقلوب
*هذا المجلس جاء بعملية ديمقراطية اياً كان شكل التشويه فيها
*ولكنه جاء يحمل اكبر عيوب لجان التعيين وهو الاعتماد على جيب رجل واحد لتسيير الامور
*والرجل الواحد اريتو لو ايدو فاكة
*رجل يفوق التش في مهارة المراوغة عند الدفع
*كنا قايلنك ياسوداكال دفع امامي
*اتاريك كاسر كرونة وركبة؟؟
*ايها الناس
*إن تنصروا الله ينصركم
*اها
*نجي لي شمارات والي الخرتوم
*والينا
*نحنا في دولة القانون دولة بقوانينا
*وطالما القانون قال البشير بريئ يا والينا
*يبقى نحترم البلد وقوانينا
سلك كهربا
ننساك كيف والكلب قال بريئ يابيه؟؟؟؟؟
والي لقاء
سلك