بالعربي الكسيح
محمد الطيب الأمين
في ناس مارقة عشان ما تموت في البيت !!
* كثير جدا من رواد مواقع التواصل الإجتماعي تحدثوا وانتقدوا سلوك المواطن السوداني واستهتاره بفايروس كورونا.
* تحدثوا عن أن الشعب رفض الجلوس بالمنزل وظل على الدوام في الشارع .
* مبادرات وحملات تطالب بالجلوس بالمنزل .
* كل ذلك من أجل الوقاية مقبول ومعقول.
* المرض خطير والسودان غير جاهز لهذا الوباء .
* ولكن نحن في عز هذه الحملة نجهل أمر هام جدا .
* ليس كل من يخرج من المنزل (قليل شغلة) .
* ما كل الناس مارقة ل(الربا والتلاف) .
* ما مارقين عشان يمشوا شارع النيل ولا مارقين عشان ست شاي أو عشان فارقة .
* في ناس مارقة عشان لو ما مرقت بتموت .
* مرقوا من البيوت عشان كان لازم يمرقوا .
* مرقوا عشان حق اللبن .
* عشان السكر .
* والدقيق .
* والرغيف .
* عشان حق الدواء.
* ما تسخر من الناس المرقت.
* ما كلهم راكبين رأس.
* في ناس راكباهم الظروف .
* لازم يمرقوا .
* انت سألت نفسك لما طالبت بالقعاد في البيت ، سألت نفسك الناس دي بتاكل من وين ؟
* سألت نفسك ولا بتتفاصح ساي ؟
* البيت فيهو أربعة وخمسة أطفال ورب البيت شغال رزق اليوم باليوم .
* بتقدر تجيب ليهو لبن؟
* بتقدر تجيب ليهو سكر ؟
* بتديهو سلطة ؟
* يبقى ما تتراشق ساي .
* ما تسخر .
* عندك توعية أو إرشادات قولها للناس باحترام وأدب عشان ما تجرح زول .
* في ناس بتقوم قبل صلاة الصباح بتمشي الشغل وآذان العشاء بياذن ليهم وهم في المواصلات راجعين.
* لا عندهم شغلة بي مطاعم ولا عندهم شغلة بستات شاي .
* كلنا عارفين إنو الصاح يفترض نقعد في البيت .
* ده الصاح لانو دي الوقاية الوحيدة .
* لكن هل كلنا بنقدر نقعد في البيت ؟
* هل كلنا ظروفنا واحدة ؟
* هل كلنا عندنا حسابات في البنك ؟ هل كلنا بنقدر نشتري مواد تموينية بالشهر أو بالأسبوع؟
* بطل رشاقة وخفة .
* ما تجرح الناس.
* الناس دي عارفة الكورونا وعارفة خطورتها وعارفة كل حاجة .
* مرقوا للشديد القوي .
* وما عندهم مشكلة يقاتلوا عشان لقمة العيش .
* بيقاتلوا حتى لو أصابتهم كورونا .
* وده الوقت المفروض نحن نقيف فيهو مع بعض .
* تعال بيوت الفقراء نزل شوال سكر وكيس لبن واديهم ألف جنيه .
* تاني ما ح يطلعوا من البيت .
* لكن داير تخش الفيس تقول ليهم (اترزعوا في البيت) ما في زول بقعد .
* ولازم تفهم الموضوع ما ركوب رأس، الموضوع اكل وشراب.
* الموضوع معاناة وحاجة وفقر .
* نحن مع الوقاية ومع التزام الناس في البيت .
* الكورونا بتكتل وفي ناس لو قعدت في البيت برضو بتموت بسبب الفقر والجوع .
* نسأل الله العلي القدير أن يلطف بنا ويحمينا من هذا الوباء ويحفظ السودان وأهل السودان .
* والله في .
