اعراض الكورونا الفلس وفي الحتة دي انا زي عاوز اقول

صابنها

 محمد عبدالماجد

اعراض الكورونا الفلس وفي الحتة دي انا زي عاوز اقول

الحصة الصباحية
واحد من الجماعة كل ما يجي الفرن يشيل (عيشو) اول واحد ويفوت – اول ما يقيف في الصف – الصف يتفرتك ويدوه (الرغيف) ويمشي البيت.
امو بتلقاه قدام الباب وتقول ليه : والله انت ود السرور.
في زول شافو كل مرة بدخل على صف الرغيف يفتركو ويقيف فيه اول واحد – قال ليه انت الناس ديل بتعمل ليهم شنو؟.
قال ليه : ابدا ما بعمل ليهم حاجة – بس اول ما اقيف في الصف بقول ليهم عندى (كورونا) يا شباب ، كلهم بقوموا جاريين من الصف اشيل (الرغيف) وامشي!!.
الكلام دا – انا قاصد اقول ليكم في ناس استفيدوا من (كورونا)…وتاجروا فيها – احسن اقول ليكم كدا عديل ..احسن من تسمعوا الكلام من برة!!.
…………….
• الطيب ملفحة – كان بيلفح الكلام – والزول البيلفح الكلام ما بنتظر الجملة تكتمل – بيلفح الكلام قبل ما يتم.
• بشيلوا ناقص.
• بمشي يزيد فيه ، عشان يكمل الصورة.
• اعملوا شير.
• ومرات كمان وقت يلقى الكلام ما فيه اثارة وخالي من (التشويق) ، بقوم يعمل ليه (بهارات) ، عشان يجيب دخل.
• الطيب ملفحة أي اتنين بلقاهم بتونسوا بكون عاوز يعرفهم بقولوا في شنو؟.
• بدخل بيناتهم – طوالي.
• بدخل في الموضوع وبعمل فيها فاهم أي شيء.
• الزول دا كان حضر معاك مباراة – أي قون يتسجل في المباراة يقول ليك (تسلل).
• مشاتر.
• زي (الفار).
• ضربة الجزاء لو حسبها الحكم يقول ليك ما فيها حاجة.
• لو ما حسبها يقول ليك (ضربة جزاء).
• شغال معانا كدا.
• المهم….(ما عاوز ادخل ليكم في التفاصيل).
• واطول ليكم في الموضوع.
• في ناس كدا – بحاولوا يكونوا عكس الناس.
• بتخيلوا ان (الخلاف) دا (شخصية).
• المعاكسة بتعمل ليهم حس وبيشعروا بي وجودهم.
• المهم….(ما عاوز ادخل ليكم في التفاصيل).
• واطول ليكم في الموضوع.
• الطيب ملفحة سمع بي (كورونا) وما فاهم عنها شيء – مرة جر ليه كرسي وقعد وقال لي انت (الكورونا) دي اعراضاها شنو؟…يمكن الواحد يكون شايلها وما عارفها.
• مرات بقوم من النوم اشرب لي (جك) موية.
• قلت ليه (الموية) ما مشكلة ..بل الموية محببة ومفضلة ..اعراض الكورونا وجع الرأس.
• قال الحمدلله / وجع الرأس ما عندنا.
• قلت ليه وبتعمل حمى شديدة – يعني ارتفاع في درجات الحرارة.
• قال ولا دي عندي.
• قلت ليه وبتعمل نزلة وبتعطس بصورة مستمرة.
• قال لي تاني.
• قلت ليه وبتعمل (ضيق في التنفس).
• من قلت ليه كدا وقف علي حيلو – وقال لي بتعمل (ضيق في التنفس)؟.
• قلت ليه ايوا – مالك وقفت؟.
• قال لي انت متأكد من كلامك دا – وإلّا دا كلام جرايد ساكت – كلام صحفيين.
• قلت ليه يا زول مالك؟ – مشيت منو بعيد – وقلت ليه اوعك يكون عندك (ضيق في التنفس).
• قال لي في الحقيقة انا.
• يا زول اتكلم في شنو؟.
• قال لي في الحتة دي انا زي عاوز اقول …
• اداني ليك احساس بي اعراض (كورونا) ذاتها.
• شفتوا الزول من يقول ليك في الحقيقة وانا زي عاوز اقول في الحتة دي – اعمل حسابك منو؟.
• بكون عاوز يضربك.
• او بكون عندو كورونا.
• والله اعلم.
• الاعراض دي حسب فهمنا.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• الطيب ملفحة رجع تاني وقال لي انت موضوع (ضيق النفس) دا اكيد.
• قلت ليه اكيد – في شنو؟.
• قال لي ابدا – بس نحن (ضيق النفس) بجيبوا لينا (الفلس).
• الواحد فينا من يكون (مفلس) – بيشعر بي ضيق النفس.
• والله الواحد نفسو يكتم.
• يا زول ما في اكعب من (الفلس).
• ووجع الرأس ذاتو بجيبوا الفلس.
• قلت ليه يا زول ارقد قفا – ضيق النفس بتاع (الفلس) خلوه – كلنا بنعرفو – ضيق النفس بتاع كورونا براهو.
• قال لي يعني كورونا دي ما عندها علاقة بالفلس.
• قلت ليه ابدا – يا زول كورونا دي لا بتعرف فقير ولا بتعرف غني ..ما بتفرق ..لا بتعرف افريقيا ولا اوروبا.
• الجنيه والدولار عندها واحد.
• الكورونا دي امريكا عندها زي الصومال.
• يا زول رحمة الله دي ما واسعة.
• الخواجات فاكرين نفسهم عارفين أي حاجة – اتخيلوا نفسهم وصلوا – فيروس كورونا جاب ليكم خبرهم.
• انتوا ما قلتوا خبراء.
• انتوا ما قلتوا علماء.
• لغاية الآن العلماء ديل ما عارفين طبيعة هذا الفيروس – ولا عارفين ليه دواء او مصل.
• فيروس بمسك من طرف.
• والله الفيروس ما بمسكوا شيء غير رحمة الله.
• هسع نحن في السودان ناس سلام ومقالدات ، واجتماعيات ، وبيوتنا فاتحة في بيوت بعض.
• في المناسبات بنرقد كلنا في برش واحد.
• وبندخل في صيوان كلنا سوا.
• مع ذلك الله حفظنا.
• المرض ظهر في (الصين) في اكتر دولة ما فيها اجتماعات وما فيها تواصل.
• المرض وصل ايطاليا – رغم القيود والتروس والحواجز التى تتبعها ايطاليا في امنها وفي حدودها.
• انتوا عارفين ايطاليا دي (مقفلة) اكتر من المخزن البكون فيه مواد التموين.
• ايطاليا زي علبة الساردين ..مقفلة من كل الجهات.
• مع ذلك فيروسات كورونا وصلتها.
• والامريكان – يضربوا في الافغان ويضربوا في العراقيين ..ويلخبطوا في الدنيا دي زي ما عاوزين – هسع كورونا لخبطت ليهم حساباتهم.
• يا سبحان الله.
• ترامب عاوز يسيطر على الخليج وعاوز يتحكم في الدول العربية عشان يديرها بالريموت كنترول من البيت الابيض.
• هسع ترامب بقى في رقبتو.
• 50 مليار دولار طلعتها الولايات المتحدة الامريكية من اجل محاربة (كورونا).
• يا سبحان الله.
• الدوريات وقفت…ولاعبو ريال مدريد دخلوا في حجر صحي.
• اصلو ما في كبير على المرض.
• الاسلام بتكلم عن (النظافة) – عندنا ادب في غسل اليدين ..وفي طريقة (العطس)…الاسلام نظم لينا الحاجات دي قبل اكثر من 1400 سنة.
• هسع الخواجات – يا دوب عرفوا فائدة غسيل الايادي.
• الناس ديل يا دوب فهموا معنى النظافة.
• اعملوا شير.
• انتوا عارفين الدين الاسلامي حقنا قدم النظافة واجلها وبجلها وخلاها تكون من الايمان.
• النظافة من الايمان.
• انتوا لو مسكتوا في (الدين) اصلو ما بتجيكم عوجة.
• تعاليم دينا.
• اخلاق دينا.
• هي البتحمينا.
• في الكثير من الامراض عندها علاقة بالاخلاقيات زي (الايدز).
• تمشي عدل – ما بتجيك أي عوجة.
• تقعد تلف وتدور – اصغر فيروس ممكن يجهجهك ويخلي العالم كله واقف على فد رجل.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• الغرب يبيد في الدول الفقيرة ويستفز فيها.
• مرات بالجوع.
• ومرات بالحروب.
• ومرات بالذل.
• الى ان جاءت (الكورونا) – ولم تفرق بين كبير او صغير – غني او فقير.
• الامير زي الخفير.
• امريكا زي الصومال.
• الله يشوفنا.
• والله يمرق العالم كله من امتحان (كورونا) الصعب.
• …..
متاريس
• الكورة اكتر حاجة تضررت من كورونا.
• الكورة انتهت.
• لو الموضوع دا استمر اكتر من كدا – الفيفا بتعلن افلاسها.
• لا دوري اسباني ولا ايطالي ..ولا الماني…ولا انجليزي.
• دوري ابطال اوروبا بدون جمهور وقف.
• ناس بي ان سبورت …تاني إلّا تنقلوا مفاوضات السلام في جوبا.
• قنوات بي ان سبورت كل مرة تزيد في السعر.
• وكل بطولة يعملوا ليها باقة براها.
• اها الكورة وقفت.
• لا تصفيات ..ولا كاس امم.
• كاس العالم ذاتو بالطريقة دي ح يكون مافي.
• الله يستر بس.
• ………..
• الصبة الاخيرة : المطرة لو بتدق الباب ما بتدخل بالشباك!!.