بيلعب الكرة (زي الما قاصد) .. عليكم الله جيبوهو لينا !!
بالعربي الكسيح
محمد الطيب الأمين
بيلعب الكرة (زي الما قاصد) .. عليكم الله جيبوهو لينا !!
* أجمل الحاجات في حياتنا قاعدة تحصل (صدفة كده) .
* بدون ترتيب .
* ممكن (١٢) سنة تكون بتفتش لحبيبتك الزمان ، وتجي (صدفة كده) تلاقيها في (صف رغيف) أو في (شماعة بص الوالي) .
* الحاجات البتحصل لينا ونحن (ما قاصدين) دائما بتكون عميقة الأثر وشديدة الدهشة .
* ولذلك كثير من الفنانين غنوا للصدفة ووثقوا للحظات الفيها بنكون ما قاصدين وعلى رأس هؤلاء الفنانين محمد وردي ومحمود عبد العزيز عليهما الرحمة .
* في كرة القدم (الهدف البيجي من نص الملعب بنقول عليهو صدفة) .
* وفي العادة بيكون هدف جميل وخالد زي هدف (صبحي) .
* حتى لو ما صدفة نحن بنحكم عليهو بالصدفة من شدة جمالو .
* وهدف صبحي كان (مقصود) لكن نحن عيونا ما صدقت فظننا أنه صدفة .
* والهدف البيجي من (الضربة الركنية) بنقول على صاحب الهدف (مرزق) و(ما قاصد) .
* يقول ليك : هو قاصد يعكس الكرة لكن جات قون.
* ما قاصد .
* وتاريخ كرة القدم الحديث حافل باللاعبين الذين يلعبون كرة القدم (زي الما قاصدين) .
* عندك مثلا (رونالدينهو) .. الزول ده بيلعب (زي الما قاصد) مع إنو هو (قاصد ونص وخمسة) .
* عندو خيال واسع وقدرات عالية وحضور مدهش .
* يمرر الكرة بيجيك إحساس إنو (ما قاصد يلعبها كده) .
* عقلك ما بستوعب (خيال رونالدينهو) عشان كده بتقول (الزول ده ما قاصد) .
* الكان بيعمل فيهو رونالدينهو أقرب للسحر .
* لحدي الآن أنا كل ما أكون زهجان بحضر مقاطع فيديو قديمة للرونالدينهو.
* الزهجة بتفك طوالي .
* اصلو نحن بنفك الزهج ب(٧) حاجات (٥) هي : باصات رونالدينهو وصوت عثمان حسين وخسارة المريخ بالسبعة أمام الوحدات الأردني.
* ما ببالغ لو قلت ليكم قاعد أشاهد ملخص خسارة المريخ أمام الوحدات الأردني أربعة مرات في اليوم .
* إحساس الهدف وهو داخل شبكة المريخ زي إحساسك لما تلقى ورقة ال(٥٠٠) جنيه واقعة .
* المهم .
* في ملاعبنا السودانية وفي التاريخ الحديث هنالك عدد من اللاعبين بيلعبوا الكرة (زي الما قاصدين) ، ومنهم أنور الشعلة ، هيثم مصطفى ، فيصل العجب ، مهند الطاهر وأخيرا عبد الرؤوف.
* في أفريقيا حاليا في لاعب واحد فقط بيلعب الكرة (زي الما قاصد) .
* لاعب واحد ونحن بصدد الكتابة عنه اليوم ونتمنى من القلب أن يكون من نصيب الهلال .
* اللاعب هو (لاس جسي) نجم خط وسط فريق بلاتنيوم الزيمبابوي.
* نجم من طينة الكبار .
* والله العظيم لو كنت املك المال لما اتأخرت دقيقة في تقديم هذا اللاعب هدية للهلال .
* جسي .. تذكره جماهير الهلال جيدا فقد شارك في لقاء الإياب أمام بلاتنيوم بزيمبابوي في النسخة الاخيرة من دوري الأبطال.
* اللاعب لم يكن موجود في مباراة الذهاب بأم درمان فقد تم تسجيله في فترة الإنتقالات التكميلية وصنع الحدث في مباراة الإياب.
* لاعب وسط من طراز عالي ، طويل القامة وصاحب رؤية وخيال وحركة لا تهدأ.
* بيلعب ليك (الباص) زي الما قاصد .
* نوع الباص البيخلع داك .
* رشيق وحسن التصرف .
* استايلو بشبه النجم النيجيري (كانو) .
* أنا بطلب من الأخ الطاهر يونس والأخ نزار عوض مالك والأخ عبد المهيمن الأمين والكوتش الفاتح النقر بطلب منهم يشاهدوا تسجيل لمباراة الهلال وبلاتنيوم.
* شوفوا واحكموا براكم.
* في النهاية نحن بنساعد بالرأي.
* نحن ما مدربين لكن كمان (الفيهو طيب بنشم) .
* الزول اللعاب من (وقفتو) في الملعب بتعرفو.
* والزول ده لعااااب .
* ولو ما كورونا جسي ده ما كان قعد في بلاتنيوم لحدي اليوم .
* وهسه ما بقعد .
* ح يمشي مازيمبي ومنه إلي أوروبا.
* لو جبناهو ح يكون خير إستثمار.
* سنة واحدة وح يجيب ٢ مليون دولار .
* اللاعب ده بشبهنا ياخ .
* كورتو طاعمة وفيها نكهة .
* زول مختلف وبيلعب زي البرقص .
* في كورتو في موسيقى وغنا.
* أتمنى والله من القلب أن يكون هذا النجم من نصيب الهلال.
* ده خط وسط براهو .
* تلعبو هو ومعاهو أي ارتكاز والوسط بيكون مليان .
* فتشوا وكيل هذا اللاعب ولن تندموا .
* اتواصلوا مع سادومبا خلوهو يساعدكم ولن تندموا.
* الزول ده بيرجع العافية للهلال ، وبيرجع ليكم الجمهور للمدرجات .
* وبالمناسبة.
* (جسي) لم يكمل عامه الأول مع بلاتنيوم وعمره لا يتجاوز ال(٢٥) سنة .
* يعني نار وفي النار (نار ضلع).
* ونركب صافنات ونجيبة (زيمبابوية) واصلو الزول بيموت والذكرى تفضل حية .
* و..و..
* والليهو في الأفراح نصيب بيجي يوم وياخد قسمتو .