التكشيرة بالتكشيرة والبادي أهبل !!
بالعربي الكسيح
محمد الطيب الأمين
التكشيرة بالتكشيرة والبادي أهبل !!
* ليس هنالك فرحة تضاهي فرحة طفل (نام) بملابس العيد يوم الوقفة .
* النوم بملابس العيد قبل حلول العيد مرحلة مر بها نصف الشعب السوداني عندما كانوا أطفال.
* أذكر أنني واحد من الناس نُمت وأنا (شاكي الفانلة داخل الرداء) .
* نمنا بالجزمة والشُراب .
* ويا ريتنا لو كنا بنوم نوم مستقر .
* نومنا كان مقطع زي نوم رمضان عجب ومحمد الرشيد هذه الأيام.
* والله صحي.
* فرحتنا بالملابس الجديدة كانت تفوق أي فرحة أخرى.
* أي شئ جديد في حياتك يمكن أن يحميك النوم في أول ليلة.
* وبما أن ذلك كذلك فإن لاعب المريخ المصري عمرو علاء قد نام بالكدارة والتشيرت في الليلة الأولى بعد تسجيله في المريخ .
* من الفرحة نام بالكدارة .
* وهي أول مرة يلبس فيها كدارة.
* إتخيل معاي .. محترف أجنبي أول مرة يلبس كدارة .
* قالوا المصري ده الليل كلو كان بيعاين في (كدايس) الكدارة .
* غايتو دي سوداكال بالغ فيها .
* اااي المريخ بيستاهل لكن كمان ما للدرجة دي يا سوداكال .
* ما لدرجة تجيب ليك (بتاع كاشير من مطعم في الخرطوم ٢) .
* كده أوفر يا سوداكال .
* حبيبنا سوداكال اتفوق على جمال الوالي في الحتة دي .
* جمال الوالي زمان جاب محترف بوسني اسمو (نجاد) .
* نجاد عمرو كان (٤٢) سنة بيلعب مدافع .
* جمال الوالي شافو في مقر جامعة الدول العربية وجابو.
* عجبو الطول .
* شافو طويل قال ده معناها مدافع ناجح .
* البوسني نجاد كان شغال في جامعة الدول العربية في القسم الخاص بالأمن والسلامة .
* يعني زي شركة (الهدف) عندنا .
* هو (بوسني) لكن شغال في (جامعة الدول العربية) .
* الوظيفة دي كان أحق بها (مواطن عربي) .
* لكن ادوها للبوسني ده .
* جمال الوالي عجبو طول البوسني وسجلو طوالي .
* زمان جمال الوالي كان بيسجل اللاعب من (شعرو) .
* لو شاف شعر رأسك غزيز طوالي بيفاوضك .
* ويا حبذا لو كنت (مُمشط) شعرك.
* لو مُمشط شعرك جمال الوالي كان ممكن يطلع ليك (الجنسية) ويطلع للزول (المشطك) ذاتو .
* نجاد البوسني تم شطبه بعد (٣٤) يوماً واللاعب المصري سوداكال شطبو بعد (١٧) يوم .
* المصري ده ذكرني بالشاعرة روضة الحاج .
* روضة الحاج انضمت لحكومة البشير وبعد (١٦) يوم من انضمامها البشير سقط .
* نص مرتب بس .
* هسه المصري ده لو ما اديتو (نص مرتبو ده) بيمشي الفيفا .
* لكن بيني بينك زول (نام بالكدارة) ما بكون سمع بالفيفا.
* المهم .
* عندما غادر الهلال إلي يوغندا تم استقباله ب(البسمة) .
* إحترم فايبرز الهلال بصورة أكثر من رائعة.
* وعندما حضرت بعثة فايبرز استقبلهم الهلال بذات (البسمة) والإحترام .
* الآن في غانا يحاول الاشانتي أن (يُكشر) في وجه الهلال.
* حصلت جرجرة من الفريق الغاني والسلطات بمطار اكرا.
* وما معروف بكرة وبعد بكرة يحصل شنو .
* لكن بتجوا هنا يا حبايب .
* التكشيرة بالتكشيرة والبادي أهبل.
* والبسمة بالبسمة والبادي أجمل.
* السمح عندنا والشين عندنا .
* الهلال يجب أن يعامل الاشانتي بما يستحق.
* أول حاجة نفحص ليهم لحظة وصولهم المطار .
* على أن يكون فحص الفرد الواحد (٥٠٠) دولار .
* ونفحص ليهم عند وصولهم الفندق ، على أن يكون الفحص للفرد الواحد (٣٠٠) دولار .
* كتروا ليهم من الفحوصات عشان لما يرجعوا يكون مديونين.
* إلا يشيلوا سلفية من أسامة عطا المنان.
* وغايتو جنس غايتو .
* ملحوظة : (إن شاء الله سأكتب هذا العمود بإسم جديد خلاف الإسم الحالي اعتباراً من العام الجديد لأسباب سأشرحها لاحقاً) .
* ونركب صافنات ونجيبة (رفاعية) واصلو الزول بيموت والذكرى تفضل حية .
* و..و..
* وقالوا متألم شوية ياخ ……… (المصري نام بالكدارة) .
يالجد عدم الموضوع مصيبة … سؤال للسادة القراء ماذا استفدتم غير ضياع زمنكم في قراءة مثل هذه المواضيع الفارغة المكررة والممجوجة .. بالله عليكم احترموا عقول القراء فيما تنشرون فمنهم العلماء والبروفات والدكاترة وقبيلة المثقفين .. وللتأكد أعيدو القراءة مرة واثنين وثلاثة فيما يكتب في هذا العمود الأجوف 99% غثاء ويريد صاحبه تغيير اسمه يا ريت تغير المحتوى كمان هذا اذا كنت تملك محتوى …
هههههه هاااااااا. قال العمود اجوف!!! طيب وكت اجوف انت حارق رزك فوق كم؟؟؟ واصل حريقك ياود الطيب واديهم بالحتة الفيها الحديدة. 😂😂😂
طبعا مقالك ما عجبني والله لانه فارغ بمعني كلمة فارغ لكن بعد تفكير اتضح لي انك لازم تكتب اي حاجه لانه بالك مشغول والرجفه حاصله مباراتكم قربت ومن مقالات الهلال يرعب الاشانتي الهلال يحذر الاشانتي بهدف الغربال في التمرين الهلال ووووووالخ صدعتو راسنا والان مافي ولا كلمه عن الهلال كله كلام خارم بارم والمصري والكداره وملابس العيد
بالمناسبه الجزمه وشراب شنو البستهم زمنك كان سفنجه وفي العيد تموت تخليه وكان محظوظ يمسحوك بي زيت سمسم من الغبيش والتراب وعيدك بنتهي بي ركوب طوطحانيه لفه واحده ..يتني الكداره ما بتعرفها يا فرده جديده عليك وزي ما قلت ليك بقينا نتسلي بمقالاتكم ونفخكم الكضاب
فكها يافرده وبلاش التكشيره دي
وعاين للصوره ما تنسي
متابعك انا كويس
فردتي