فرح الزول الخايف بخوف!!

بالعربي الكسيح

محمد الطيب الأمين

فرح الزول الخايف بخوف!!

* أثبت علماء النفس أن (تقليم الأظفار بواسطة الأسنان) يعتبر حالة من حالات التوتر .
* في ناس الواحد بيأكل اظافرو.
* حركة لا شعورية تظهر عند التوتر وفي بعض الأحيان تظهر عند الخجل وربما الخوف .
* هذه الحالة قد تبدأ معك في اللحظات المذكورة أعلاه ولكنها مع الأيام تصبح عادة.
* والعادة عادة يصعب التخلص منها .
* واحد تلقاهو عندو (ضفارة) في جيبو ومع ذلك بيضفر بخشمو.
* حتى لو ما متوتر بيأكل اظافرو.
* التوتر كعب .
* وبما أن ذلك كذلك فإن الأخ محمد عبد الرحمن الشهير ب(لو رجعت السودان ما بلعب إلا للمريخ) ، يعاني من حالة توتر غير مبررة.
* محمد وفيني كلاهما يحس بشئ من التوتر والقلق بسبب عدم التسجيل .
* هما يحسان بأنهما بحاجة لأكل اظافرهما أثناء سير المباراة .
* لعب الهلال حوالي خمس مباريات ودية لم يسجل من خلالها الغربال هدفاً .
* خمس مباريات بالخرطوم والقاهرة ابان فترة المعسكر .
* وذات الشئ بالنسبة للكنغولي فيني .
* الكنغولي بخلاف الوديات فقط غاب عن التسجيل في جولتي التمهيدي .
* محمد عبد الرحمن لن (يأكل أظافره) ولكنه قطعاً إذا سمح للتوتر بالسيطرة عليه سيضيع كثير من الأهداف المضمونة .
* نعم .. مهمة المهاجم الأساسية تسجيل الأهداف وله مهام أخرى ليس من بينها هز الشباك.
* الذي يجب أن يعلمه الغربال هو أن أي توتر أو قلق ليس من مصلحته .
* نحن يا أبو حميد ما مستعجلين.
* براحتك .
* واثقين منك .
* الشبكة ترفض مرة واتنين وتلاتة ولكنها في النهاية لا تملك إلا أن تستجيب و(لا كتر خيرها) .
* وصيتنا لمحمد بأن لا يشغل باله كثيراً .
* ألعب بعيداً عن التوتر وستصل لما تريد وبإذن الله ستنافس على لقب هدافي أفريقيا.
* الوقت ما زال مبكراً فلا داعي للقلق والتسرع .
* وهذه وصيتنا لكل نجوم التسجيلات الذين يستعجلون إثبات ذاتهم .
* الاستعجال يأتي بنتائج غير جيدة .
* الغربال هو المهاجم الأول في البلد ولذلك لا خوف عليه ونتمنى أن لا يخاف هو من عناد الحظ .
* ما تشيل هم يا حمادة .
* وبمناسبة حمادة .
* والله يا جماعة أنا في حاجة مؤثراني تأثير لا يعلم به إلا الله .
* وقدر ما أتذكرها بتأثر من جديد .
* آخر يوم في التسجيلات الأخيرة.
* وحوالي الساعة (٦:٤٣) دقيقة جدد المريخ عقد التش وبيبو.
* وتم رفع الصور .
* الكلام ده كان آخر يوم في التسجيلات .
* والجماعة شافوا الصور والفرحة كتلتهم.
* ما مصدقين إنو التش جدد ليهم .
* فرحوا فرح خوف .
* والخايف لما يفرح فرحتو بتكون كعبة .
* الناس ديل كانوا خايفين من السوباط والطاهر يونس خوف لا يعلم به إلا الخالق العزيز.
* ما صدقوا لما جددو للتش مع إنو عقد التش ساري .
* التش جدد الساعة (٦:٤٣) دقيقة والتسجيلات كان باقي ليها حوالي خمس ساعات وتنتهي .
* والهلال كشفو تامي (٣٠) لاعب .
* عشان كده بعد التجديد للتش المريخاب زادوا عيار الفرح وافتكروا إنو دي نهاية التسجيلات .
* بالضبط الساعة (١١:١٢) دقيقة ناس الهلال وقعوا عقد مع محمد عبد الرحمن الشهير بالغربال والمشهور ب(لو رجعت السودان ما بلعب إلا للمريخ) .
* وتعال شوف البكا .
* المريخاب لو قلت ليهم التش يجدد ليكم ولا محمد عبد الرحمن ما يمشي الهلال كان ممكن يقولوا ليك محمد ما يمشي الهلال .
* أنا مهما أقول ليك عودة الغربال عملت شنو في المريخ ما بتصدق.
* الموضوع حار جداً .
* أنت كهلالابي سيد بلد ما بتكون حسيت بالوجعة التي عاشها التمهيداب لحظة توقيع الغربال .
* في مريخابي لما شاف صورة الغربال مع الطاهر يونس ونزار عوض مالك قال وهو يبكي : (يارب يارب يارب الصورة تكون فوتشوب) .
* بكا شديد .
* نحن عالجناك.
* نحن قدمناك.
* رابطة قطر ما قصرت معاك .
* بكا أشكال وألوان.
* هسه خلوا رابطة قطر تعالج التش وبعد يبقى كويس برضو بنشيلو إن شاء الله .
* نحن تاني بس بنشوف أي لاعب عالجتو رابطة قطر بنسجلو.
* حتى لو ماسورة .
* ختينا رابطة قطر في رأسنا .
* المهم.
* الثقة بالنفس والصبر والإجتهاد هي مفاتيح نجاح الغربال واخوانه بغانا .
* ما نستعجل.
* ما نقلق .
* نركز ونثق في أنفسنا وسيتحقق المراد إن شاء الله .
* قودوين نجح بعد موسم ونصف .
* سادومبا سجل أول هدف له مع الهلال بعد أربع مباريات افريقية.
* الكنغولي فيني سينجح إن شاء الله فقط عليه أن لا يشفق ولا يتوتر.
* وانيمبا النيجيري كذلك .
* ملحوظة : (اعتباراً من السنة الجديد سأقوم بتغيير إسم عمودي هذا لاسم آخر إن شاء الله) .
* ونركب صافنات ونجيبة (هوارية) واصلو الزول بيموت والذكرى تفضل حية .
* و..و..
* ولو رجع الحنين عاود وليك من تاني وداني …….. (ما بلعب في السودان إلا للمريخ) .