عندما تنظر لاي سعر يصيبك الخجل

في السلك

احتراما للجمل

عندما تنظر لاي سعر يصيبك الخجل

بسم الله الرحمن الرحيم
*ليس خجلا علي فقرك وعدم مقدرتك علي الشراء
*ولكنه خجلا علي قيمة الجنيه
*فالتدهور الشنيع في قيمة العملة حقتنا
*دفع من تسبب فيه لتغيير الجنية لدينار
*وعملوا الدينار بجيب عشرة جنيه
*عشان في خجلة لما تقول رطل السكر بعشرة جنيه
*شوية بتبقي مستورة لما تقول رطل السكر بدينار
*دينار سوداني
*وكأن عثمان دقنة هو عثمان الصباح دقنة
*وكأن محمد احمد المهدي هو محمد احمد قابوس المهدي
*والقصة ماسترت الجنيه
*تركوا الدينار وعادوا للجنيه ولكن الجنيه الذي يضم بين حناياهو عشرة جنيهات
*وازدادت الفجوة وتوسعت الخجلة واضحي الجنيه مخجلا جدا
*فجادت قريحتهم بدفس كل الف جنيه داخل جنيه
*اصبح المليار مجرد مليون
*ولم ينفع ذلك الاحتيال
*ويواصل جنيهنا مسلسل التدهور المخجل
*اخجلنا وخجلنا ليهو وخجل لينا هو وخجلنا منو
*وفي الذاكرة الجنيه ابو جمل
*وياحليل زمن الجنيه ابو جمل
*جنيه كان بجيب تلاتة اربعة دولار
*الوكت داك اليورو ما اتولد
*الدنيا كانت حلوة ومافيها كورونا
*الكورونا الوحيدة كانت في تشيكوسلوفاكيا
*كانت بتساوي قرشين سوداني
*القرش زاتو كان ليهو قيمة
*كيفن ماتكون ليهو قيمة عاد
*قرش زمان ابو جمل
*وشلنا الجمل وختينا صقر الجديان
*وبدينا
*نازل نازل نازل
*الجمل فات والصقر مات
*لذا
*وحفاظا علي السمعة الطيبة للجنيه ابو جمل
*اقترح نشيل تلاتة اصفار تاني من جنيه الليلة ده
*وبعد داك نسميهو ريال
*ريال سوداني
*جواهو في الف جنيه من جنيه اليومين دي
*ومليون جنيه من جنيهات آخر حذف لتلاتة اصفار
*علي الاقل بدل الواحد فينا يقول اتعشيت بالف جنيه
*يعني اتعشيت بمليون جنيه
*يقول اتعشيت بريال
*عليها قطرة وعقال
*ونبقي كلنا شهادة عربية
*روقة زي الروقة
*تمشي تشتري عربية
*بدل تقول بتمنية مليار
*تقول بتمنية الف ريال
*قريبك في السعودية يرسل ليك اتنين ريال سعودي
*تصلك ريال الا ربع سوداني بكل فخر
*بدل يحول ليك الف ريال تسوق بوكس خمسة شنكل عشان تستلم مقابلها بالسوداني
*وكدة نكون احترمنا جنيهنا ابو جمل
*ومالعبنا بسمعتو
*اللهم عافي جنيهنا واعده كما كان بجملو يقدل فوق عديلو يسر الناظرين والقابضين والقابضين علي جمر القضية
*ايها الناس
*غدا كورتنا الافريقية
*نحترق اختلافا ونغيب التفافا
*فالانتصار للذات اضحي عند بعضنا اهم من الانتصار الافريقي
*ولكنها وصية للاولاد
*كل المشاكل دي ابعدوا عنها بعيد
*فكروا في مريخكم وتأهلكم وتتجويكم الذي يضيف لسيرتكم فخرا
*امضوا علي الدرب حتي المنصة
*لترافقوا جيل مانديلا الذي اعياه البقاء لوحده علي منصات التتويج
*واوصي الشفوت الشرفاء بالبعد عن اسباب الشتات
*والاهمام بكيان جمع الناس في الحب والخير
*لاعلي التحزب والتعصب والاختلاف
*ايها الناس
*ان تنصروا الله ينصركم
*اها
*نجي لي شمارات والي الخرتوم
*قلت لي كيف يا والينا؟؟؟
*ولا الكيف جبنة وشاي يا اخينا ؟؟؟؟
*ناكل بعضينا ؟؟؟
*نعضي الكلب قبل يعضينا ؟؟؟؟
*بقينا زي جمل العصارة لافينا لافينا
*لاسمسم بنقدر لينا
*ولا دقيق فينا
*جمل الشيل تلتين سنة بقينا
*نموت يا والينا
*ولا جمل الجنيه ترجعوهوا لينا ؟؟؟؟؟
سلك كهربا
ننساك كيف والكلب قال ياحليل الجمل الكان جوة الجنيه
والي لقاء
سلك