وضاح احمد: العالم كلو حاليا بتعامل مع كورونا والاحتفالات شغاله عادي ..
الخرطوم – خاص كورة سودانية
في حديثه مع كورة سودانية أوضح الفنان الشاب “وضاح احمد ” أنه في صدد التحضير لإغنيات جديدة ،ستعرض واحدة منها في مطلع العام القادم وهي أغنية (فراقو تم سنه) كلمات احمد ارباب والحانه ، وسيصور عدد من الكليبات لإغنياته الجديدة منها فيديو كليب دويتو يجمعه مع إحدى الفنانات ، وانه في صدد التحضير ايضا لعمل ضخم فكرته جديدة والاولى من نوعها في السودان ومن الممكن في الوطن العربي .
– وعن رأيه في إيقاف الحفلات الجماهيرية؟
قال” وضاح” : (العالم كلو حاليا بتعامل مع كورونا ، الاحتفالات شغاله عادي ، بقى كل زول مسئول عن نفسو ، ايقاف الحفلات الجماهيريه او الخاصه ما بغير شي ، طالما انا بلاقي نفس الناس في الاسواق، وفي المناسبات العزاءات والمواصلات وصفوف البنزين والعيش وفي كل مكان فيهو تجمع ( مافي زول بسألهم ؛ الحاصل للفنانين ده ظلم كبير والمسأله شخصيه تجاه الفنانين واضحه من طريقة تتبعهم ومراقبتهم بشكل واضح في الحفلات وطريقة القبض عليهم كأنهم مجرمين مخدرات والغرامات الغير منطقية ، مع انه الفنانين كان ليهم دور كبير في جائحة كورونا الاولى ، دعم معنوي ومادي ) .
– وفيما يتعلق بالجانب الرياضي ذكر “وضاح ” أنه يشجع محليا فريق المريخ وعالميا ريال مدريد وبايرن ميونخ ، وانه يمارس كثير من الرياضات كالسباحه والتنس بانواعه و لكن الاساس عنده كرة القدم .
