مريخ الأمل

في السلك

بابكر سلك

مريخ الأمل

*بمنتهي الهدوء والعقلانية وقتل الملعب (تكشيفا)
*وضع الواعد الجزولي الكرة محل برك الطير
*النزول بمتوسط عمر لاعبي المريخ هو خطوة في الطريق الصحيح
*ومريخ اليوم هو مريخ الأمل
*الأمل الذي ننشده سنين طويلة
*بناء فريق بطولات بحق وحقيقة
*ولا يتأتي ذلك إلا بالاعتماد علي مواهب شابة
*نفجر طاقاتها وتكتسب خبراتها كي تنضج في عمر يمكنها من نيل البطولات القارية بسهولة
*لأن سياسة الاعتماد على الجاهز
*وفقه جابوا لينا وسجلوا لينا
*لم يقدنا لمنصة ولم يزعمنا على رصة
*فالتسجيلات كنا نديرها بفكر هدوم العيد
*مجرد تكديس
*وشوفونية واستعراض وترضية لمصالح ومصلحجية
*فيهم لاعبين لما تشوف الواحد فيهم تقول ده أبو العريس
*وواحدين أبو أهل العريس عديل كده
*على كلٍ ديك مراحل لا أظنها عائدة في عهد أهلية وديمقراطية الرياضة والتي بدل أن نتبعها طوعاً فرضتها علينا الفيفا
*المهم
*في عهد ديمقراطية الرياضة
*أكرر من عزام ولي قدام
*من عزام مروراً بالجزولي ولي قدام
*ومن عشوائية إدارة ملف الإحلال والإبدال
*نشطب كرنقو وخميس قبال دهر من الزمان
*لنعيدهما الآن
*واحد من الإداريين قلت ليهو ليه بتتخلوا عن المواهب الشابة
*قال لي عشان يربوا ويكتسبوا خبرات
*وبعد داك الدايرنو نرجعو
*قلت ليهو موش الأفضل يربوا في المريخ ؟
*قال لي الجماهير ما بتصبر على لاعب
*بالله شوف
*إداري مهمتو إدارة النادي وقيادة الجماهير لفهم علمي يخدم النادي ويصعد بفكرهم
*ينزل لمستوي الفهم العام
*يعني زي الفنان البغني هابط
*ويبرر ذلك بأن الجمهور عايز كده
*أيها الناس
*الموجهات الدولية من محاسنها إنها تجبرنا على التطور وتغيير الأفكار البالية والرجعية
*العالم عالم ديمقراطية والزمن لا يتسع لأي فكر رجعي
*وللأسف قد تعشعش الأفكار الرجعية داخل فواخير قرت
*ولكن القلم ما بزيل بلم
*أيها الناس
*مباراة الأمس لم تكن بالسوء الذي تناوله البعض
*قد تكون أخطاء التمرير مزعجة
*ولكنها تنتج عن ضغط ذهني أو شرود أو إفراط في الإعداد البدني
*وفي العموميات ما كانت كعبة
*وبعدين أليس أمل عطبره من فرق الممتاز؟
*الا يحق له التفكير في هزيمتنا وهزيمة كل فرق الممتاز ؟
*وهل غريب عليه أن يهزمنا؟؟؟؟
*يبقى تبخيس أداء المريخ لأن الأمل وقف نداً له
*لا مبرر له
*وما تقول لي الأهلي والمجموعات
*لكل مقام مقال
*والدوري تنافس نعم ولكنه خير إعداد للمجموعات
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*المدارس ولو جزئيا فتحت لينا
*المحاكم من الليلة زينة في زينة إتملت بينا
*متأكدين كورونا مشت ولا ماخدين منها إذن يا والينا ؟؟؟؟

سلك كهربا

*ننساك كيف والكلب قال كان زول عطس في محكمة إتخارج واخسر قضيتك أخير ليك
وإلى لقاء