قصتنا ورصتنا
في السلك
قصتنا ورصتنا
*القصة ما قصة مريخ وهلال
*القصة قصة منظومة واستراتيجيات
*نحن
*كلنا
*نحن والهلالاب
*نحلم بالتتويج بالبطولات الأفريقية
*نأمل في ذلك ولا نعمل لذلك
*نأمل ونحلم ونتمني ونتوقع
*لكن بدون أي استراتيجية
*القمة عندنا تحلم بكل ذلك
*وتبحث عن راع
*تبحث عن رئيس مقتدر يستطيع الصرف على النادي
*ورغم كل ذلك نحلم بالبطولات
*رئيس مرطب
*يدفع لوحده ويدير لوحده
*ويغير المدربين على كيفو
*فالفول فوله زرعه وحده وحصاده بالطبع له وحده
*رئيس بماله يشتري سبهللية النادي وعواطف الجمهور وما يعرض من الإعلام للبيع
*فتضيع القضية
*لنعاود الحلم بالأميرة الأفريقية في موسم جديد
*القادم أحلى
*أيها الناس
*كورتنا بتشبه لقمتنا بتشبه رغيفتنا بتشبه غنوتنا بتشبه فطرتنا بتشبه بيتاننا القوي
*وعلة الرياضة تكمن في إدارة الرياضة عندنا
*على مستوي الدولة وعلي مستوى اللجنة الأولمبية وعلى مستوى الاتحادات العامة وعلى مستوى الاتحادات المحلية
*لا خطط ولا تخطيط ولا استراتيجيات ولا أهداف ولا غيرو
*دخلنا مع الأهلي في مجموعة واحدة
*ودخلنا مع صن داونز في مجموعة واحدة
*لو عندك سيارة أوروبية موديل السنة على الزيرو
*ومعاها سيارة أي كلام كلها أعطال
*وماشات بورتسودان مثلاً
*ممكن لحدي التفتيش أو جياد يكونن ماشات مع بعض
*قول للمسعودية
*لكن بعد داك الشارع بفتح
*وبظهر فارق السرعات والجاهزية
*بتاع الكركعوبة لما يبرك في مدني
*التاني بكون وصل بورتسودان وفضل ليهو كورة السوبر بس
*ده حال كركعوباتنا أقصد أنديتنا
*زحمة الأدوار الأولى بتخلينا ماشين مع الفارهات ناس الأهلي وصن داونز والوداد
*ولكن بعد جياد
*هيهات هيهات
*لا جن ولا سحرة
*أيها الناس
*الأهلي الأدانا تلاتة ده لا يبحث عن ملياردير ليرأسه
*ماااالي كيسو
*بقوانينو ولوايحو وسقف تسجيلاتو
*لذا ما عندو سقف طموح
*الأهلي الأدانا تلاتة ده
*شايل كأس أفريقيا تسع مرات ويسعى للعاشرة
*الأهلي الأدانا تلاتة ده
*عندو تيم سلة أفريقياً بطل
*وتيم طايره زي الطايره
*وأعضاء يتسابقون لسداد عضويتهم مقدماً سنوياً مبلغا يخر له الجبابرة ساجدينا
*ونحن عضويتنا خمسة جنيه
*كيس تسالي ما بتجيبو
*ولما يفكر زول يزيدها
*يواجه بالطعون والإعتراضات
*نحن لسه ما بنشبه ديك
*خلونا في غيبوبتنا نحلم
*يا شفينا
*يا متنا سريرياً لما يفكوا الأجهزة تلقانا لربنا مشينا
*أيها الناس
*قبل سنين كتيرة كان عندنا كورة مع الأهلي ده ذاتو
*الطموحات والأمنيات فل الفل
*كنت بتكلم مع الكابتن مأمون حاج حسين قسم السيد
*جناح المريخ الخطير في الخمسينات
*قال لي انا جاي من التمرين
*أولادنا ديل حا يغلبوا الأهلي
*في اللحظة دي كان في فيلم مصري شغال في التلفزيون وهو متابعو
*الفيلم بتناول المشاكل الزوجية
*الزوجة نضمت نضم شديد خلاص
*(حؤوء) المرأة ومساحات المحبة (وحأ) الأطفال وواجبات الزوج
*جابو الزوج كمان رغى رغى
*كلام زي الموسيقي
*حتى الشافع
*بالغ بوليغ
*يا ماما افهموني
*أنا كطفل من حقي أنعم بالاستقرار والحب
*إنت وبابا لو عندكم مشاكل بعيد عني
*ما تحسسونيش بالخوف والرهبة وعدم الأمان
*يا ماما لازم توفروا الحب في البيت ده
*هنا مأمون عاين لي وقال
*ياسلك نحن الناس ديل مابنغلبهم
*وقد كان
*خسرنا منهم بمازمبية
*مأمون لما عرف إننا ما بنغلبهم ما شاف تمرينهم
*لكنو شاهد الفيلم البيظهر قدرة الناس ديل عليى التعبير
*وفهم مدى تملكهم لأدواتهم
*حتى شافعهم بعرف يعبر عن نفسو
*ونحن شافعنا كان رده نقول ليهو ما ترد اوعك ترد
*وكان ما رده نقول ليهو ما بترد مالك
*حيرنا الشافع ذاتو
*أيها الناس
*إن الله لا يغير ما بقوم حتى يغيروا ما بأنفسهم
*فلو دايرين نغير واقعنا الرياضي ده
*تعالوا نغير ما بأنديتنا واتحاداتنا ووزارات رياضتنا واستراتيجياتنا
*وإلا
*خلونا نحلم لنأمل في الموسم البعدو وهكذا
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*قول لجبريل لو دايرنا بتعيينك نقول جد لينا
*النقل المكنيكي والأشغال يا أخينا
*فركشتهم كانت أولى خطوات الفساد فينا
سلك كهربا
ننساك كيف والكلب قال لما شفت التراب عامل ضباب أمس في الخرطوم قربت أنبح بالإنجليزي…. عاصمة التراب يا عمك
وإلى لقاء.
هههههههه هااااااااااي. رحم الله امرئ عرف قدر نفسه يا عمنا تنقو. الحمد لله علقة الاهلي اعادتك الي صوابك وتم تنفيسكم بنجاح بعد مباراة الاهلي. قلنا ليك بطل النفخات الفارغة لان التنفيس امر محتوم والمجموعات شعرها ماعندكم ليهو رقبة والحمد لله صعقة الكهرباء وعلقة كلب الليدو اعادتك لصوابك كما حصل مع ثلاثية ساماتا التي بددت هلاويس ريحة المطار. مصيبة الكورة السودانية في ثقافة الاحقاد والتعصب الاعمي التي نشرتموها بقيادة اليخماو ابو الاحقاد وكوراله ومن لف لفهم في تاجيج الحقد والفرقة بين الهلال والمريخ. منكم لله. عودوا الي صوابكم واكتبوا خيرا او اصمتوا.
شهادة لله دي اول مرة تقول فيها الحقيقة يا سلك. علينا ان نعترف بأننا ندور في حلقة مفرغة وندعو لمؤتمر جامع تتداعوا فيهم انتوا اهل الاعلام على التوافق على ميثاق تبعدوا فيهو عن العصبية والنفخة الكذابة. نعمل مع بعض على هدم القديم والبداية من الصفر. هذا هو الحل. الحمد لله انك فتحت اخيرا.