لا يا فارس.. الكواي ما بيعمل كدة)..!!

*كرات عكسية – محمد كامل سعيد*
*(لا يا فارس.. الكواي ما بيعمل كدة)..!!*
* لا تزال اصداء القمة الاخيرة تزحم المكان، خاصة بعد ما تبددت احلام اصحاب الغرض والمرض، وتحولت الى اوهام وخزعبلات.. فغاب من غاب، واحتجبت الكثير من المقالات التي تخصصت في بيع الوهم، ونشر التعصب، حيث تأكدنا من حقيقة ان (الحل لا يكون دائما في البل)، لان الهروب يكون احيانا هو احد الحلول..!
* وعشان ما نطول عليكم، نخش في الموضوع طوالي.. (اها ممكن نسألكم اولا انتو كقراء، عايزني اغشكم، واسوقكم بالخلاء، والا عندكم فهم تاني..؟!.. عموما، وعشان ما نجيب ليكم الحقيقة (رب رب كده)، لازم نديكم شوية (مخدر) عشان ما تتخلعوا لينا..!!
* في البداية، لابد لنا ان ننسى ما انتهت عليه مباراة القمة الاخيرة، ولنعتبر ان المريخ هو الفريق الذي حقق الفوز.. وعلى ذلك الاساس (ح اغشكم)، قصدي ح (اسرح بيكم)، لا لا ح (اكتب ليكم بضمير) لاني موجود هنا علشانكم انتو يا حبايب..!!
* لنبدأ: (الحمد لله والشكر لله.. اناء الليل واطراف النهار على النصر العزيز والغالي الذي حققه المريخ على الهلال، وكفل له الحصول على لقب الدوري، لو بواسطة كأس او غيرها، لان البطولة ستسجل للاحمر حتى ولو كانت بقرار مكتبي)..!!
* (الواد سيما اعاد الذكريات الاليمة).. “هاها يلا اضحكوا كلكم.. ما دي نكتة لازم تضحكوا، لان العبارة دي بتغيظ الهلالاب، وبتكويهم كي، زي ما الكواي كواهم وهرد فشفاشهم.. قرقرقر، والله حالة تحنن”..!!
* “نخش يا جماعة على الامتحانات.. ااي عندنا امتحانات لزوم العبط والهبل وكدة.. يعني لو سالتكم في العلوم، وقلت ليكم: حددوا لي سرعة الكرة المعكوسة من فارس لرأس مزمل المدمر بتكون كم”..؟!
* طيب نتحول للرياضيات ونسال: “كم عدد التمريرات التي سبقت تسجيل المدمر للهدف الثاني براسية قوية حريرية، ولمسات فنية عالية التركيز، لا نشاهدها الا في الدوريات الاوروبية”..؟! *********************** بكري الكواي.. وبعد ما غلبتوا.. قصدي بعد ما تعب من عدم تعاون زملائه معه، تحول للصناعة، فمرر الكرة بطريقة سحرية للتكت، الذي لم يستوعب العقلية المتقدة وسرعة البديهة التي تعامل بها الكواي مع الكرة، وكاد من الخلعة ان يهدر الهدف، وبعد الهدف همس تكت في اذن الكواي (براحة علينا يا سيدا)..!!
* التش يا جماعة حقو من الليلة نسميهو الكشة لانو بيسوق مدافعي الهلال قدامو سيرة بس.. وهم سغالين ترترة لي وراء.. زكيف ما يترتروا وهم خايفين من الشطب والدنبا قبايل تنقلات وكده.. قرقرقر اضحكوا يا مريخاب يا اصلاء دي نكتة بتضحك..!!
* فاز المريخ على الهلال.. السؤال هنا كلمة (فوز) دي، فيها كم نقطة..؟! برافوووو.. نقطيتن، اي ان المريخ قد فاز على الهلال بهدفين.. ياخ والله انتو شطار، وناس فاهمين، والمخدر ده بيعمل عمايل، انا ما عارف لو ما كان موجود، كنت ح اعمل معاكم شنو..؟!
* نرجع للاكاذيب والافتراءات التي رددها الاعلام الازرق، والمحاولات المفضوحة للنيل من الكواي، والمتمثلة في التصريحات الفشنك لفارس، الذي اكد ضلوع بكوري، وتفوهه باساءات عنصرية، شملت لاعبي المريخ قبل الهلال..!!
* قال الاعلام المفتري، ان الكواي اساء لزملائه قبل ان يسيئ الى لاعبي الهلال.. كيف الكلام ده يحصل..؟!.. لا لا لا يا فارس، قول ليك حاجة تانية، لانو بكوري ما بيقول الكلام ده، ولا عندو اي سوابق، لا مع حكم، ولا صحافي، ولا حتى الجمهور..!!
* “بس انتو يا هلالاب، قولو انكم متغايظين من شقلوب، الذي اجاد الشقلبة بعد تمزيقه للشباك الزرقاء بلا رحمة، عشان كدة انتو دايرين تدمروه، وتاثروا على نفسياتو ومستقبلو، وتفقدوه الثقة في نفسه، لكن هيهات هيهات، الكواي ده قاااعد، ولسسه قدامو 3 سنة”..!!
* “القائد امير يا سلاااام، لقد ابتعد عن مسرح الاحداث، لحظة انفجارها، لانو قبل كده حاول يتدخل، وبكري لم يسمع كلامه نهائيا، ودي (حركة قيادية، لا تصدر الا من الكبار، ووجب علينا ان نحي عليها امير الخطير”..!! *********************** “الكواي، ولو انت ما عارف يا فارس، تعرض لظلم الحسن والحسين من عدو المريخ الاول كمال شداد، الذي حلف بالطلاق انو لازم ينتهي من حاجة اسمها الكواي، عشان اللاعب اختار المريخ، وتفضيله لااخمر على الازرق.. وطبعا رئيس الاتحاد هلالابي بيشاكل عديييل كده.. وكم مرة اهدى كل القاب الدوري لفريقه المحبب”..!!
* “بعدين يا ناس الهلال، لازم تعرفوا اننا عندنا شكوى مضمونة، تتمثل في اعتراضنا على دخول جماهير الاولتراس للمدرجات، بعد نهاية اللقاء، رغم جائحة كورونا، والاحتفال مع اللاعبين دون اي اعتبار لخطورة تلك الخطوة.. وصدقوني يا صفوة، لو اتحاد شداد ما ادانا حقنا، ح نمشي كأس، (والرهيفة التنقد)”..!!
* لا تزال قصة (سيدنا يوسف) تحاصر عقلي وبالتحديد مشهد مجموعة الكهنة الذين يعرف كل واحد منهم درجة الوهم التي يتعامل بها (كبيرهم اليخماو)، ورغم ذلك يصرون على التسبيح بحمده ليل نهار، رغم علمه بانه موهوم، وهم يفعلون ذلك من باب الحرص على مصالحهم الخاصة وما اكثر مثل تلك النوعية في زماننا الحالي.
*تخريمة اولى:* معذرة للقراء الاعزاء، فقصة اليوم كتبناها من وراء حجاب، حيث تضاعفت معاناتنا، قبل واثناء وبعد الكتابة بتلك الطريقة البائسة حقيقة.. اعذرونا لان الوصول للاهداف يمر من هذه السكة الغويطة المظلمة..!!
*تخريمة ثانية:* امتلأ بريدي الالكتروني، ووصلت الرسائل الى رقم مخيف، وجل الذين ارسلوا، انقسموا ما بين مؤيد ومعارض، لما ورد في هذه الزاوية تعليقا على القمة.. شكرا للجميع..!!
*تخريمة ثالثة:* سمعت ما قيل عن سيطرة مجموعة الحديقة (الكومبارسية)، على لاعبي المريخ.. بالله ده اسلوب يتحدث به احد الاطراف المشاركة في الصدام..؟!
*حاجة اخيرة:* (هاااتشيين).. ده كلو من تجارة البهارات، اللي بتضر اول ما بتضر (الناس الشغالين في التعبئة)..!!
*همسة:* يظل قرار نقل مباريات المنتخب الى خارج البلاد، وصمة عار في جبين كل سوداني اصيل.. نكرر (اصيل)..!