عبر من قطر

في السلك
عبر من قطر

*مر خبر عدم اعتماد استاداتنا مرور الكرام
*زعلة دقائق وانتهى الخبر
*تابعنا بطولة (الوطن العربي) بقطر
*برغم أن أداء منتخبنا كان (عبرة)
*إلا أن السعيد من اعتبر
*أدهشتنا الإستادات
*فاستدعت الذاكرة خبر إستاداتنا
*ونزلت فيديوهات كانت مخزنة بالذاكرة
*جلاليب مرفوعة ووجوه مقبله على الحيطة
*حيطة الإستاد
*فالجماهير التي ترتاد الإستادات تحمد الله على عدم إصابتها بالفشل الكلوي
*لذا تحمد الله الذي يذهب عنها الخبائث ولو على حائط الإستاد
*وفي ناس ما شاء الله
*بحفروا حفر ويتركوا أثر
*بوكلينات بس
*ونتحدث عن ريادتنا لكرة القدم
*ونتعصب
*وممكن نبيت حراسة في سبيل العشق الذي نتبول على حائط إستاده
*أما إستادات قطر فلقد ألجمتنا دهشة
*لو داير تلد في محل للولادة
*وما تقول لي قطر عندها بترول
*فصندوق الطماطم في السوق العالمي قد ينافس سعر برميل البترول
*الفرق أن قطر استخرجت بترولها ونحن لم ننقب بعد عن طماطمنا
*وحتى لما طلعنا بترولنا
*طلعنا عينو
*أخرجناه من بئر وادخلناه في بئر أعمق من تلك التي استخرجناه منها
*ما استفدنا منو في البنيات التحتية
*ولكن استفاد منه الناس العملوا كروش وقروش وضاع البترول والجنوب والوطن
*ونحن نرفع في جلاليبنا ونقبل على حيطة الإستاد
*وممكن كمان أثناء القبيلة ديك نواصل نقاشنا عن المباراة
*قطر ما عندها بترول وبس
*قطر عندها طموح
*الطموح ده خلاها تكون عندها إرادة
*وتلك الإرادة تحتاج حقيقة لإدارة جيدة
*ونحن نعاني من ضعف الإرادة وسوء الإدارة
*لذا نبني كروشنا بقروش الدولة ونفسد
*وبعد ده يجيبوا لينا مولودة شييينة نسميها جميلة
*أسوأ زول نسميهو حسن
*ونطلق القلعة على حوائط نتبول عليها
*ونسمي الجوهرة لإستاد ترتاده الجقور من الزريبة أكتر مما ترتاده البطولات الجوية
*أيها الناس
*نحن شعب حالم
*نحلم ونستمتع بالحلم ولا تداعبنا رغبة تحويل الحلم لواقع
*لأن علاقتنا بالوطن ضعيفة
*نبيع الدولار سوق أسود
*نتاجر ونهرب المواد التموينية
*نختلس مال الدولة
*نحتكر التعامل والاستثمار مع الدولة طالما كانت الحكومة حكومتنا
*لمن تجي حكومة جديدة تاكل الوطن وتاكل ناسها كمان
*لاقاكم قطري شغال دولار ريال شيك سياحي؟
*مش أسي
*قبل ما البترول يطلع
*لاقاكم قطري هرب السكر والدقيق والجاز لأرتيريا أو إثيوبيا أو شاد؟؟؟؟
*والله ما مؤخر البلد دي غير سلوكنا
*وتفشي السلوك الذي يضر باقتصاد البلد
*حتى أضحى سلوكا قبليا
*ناس فلان شغالين دولار
*ناس فلان شغالين تهريب جاز
*وناس علان شغالين تهريب سكر
*عرفتوا بلدنا دي كل يوم ماشه ورا ليه؟؟؟؟
*يا نحارب الكلام ده بقوانين رادعة عقوبتها الإعدام أو الإعدام
*يا نرفع جلاليبنا ونتبول على حوائط الوطن ونتونس كمان
*أيها الناس
*نسمي القلعة والجوهرة لأنو الطشاش في بلد العمى شوف
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا المكلف علينا
*الزول قالوا ماشي مخلينا
*يمشي وين يا والينا
*عشان يجوا الجماعة يبرطموا فينا؟؟؟؟

سلك كهربا

ننساك كيف والكلب قال يبرطموا في منو؟؟؟؟ والله ياهو الفضل
وإلى لقاء