من أين أتى هؤلاء
وكفى
اسماعيل حسن
من أين أتى هؤلاء
كما هو معلوم…. قروب “صفوة بلا حدود”، واحد من أعرق وأهم القروبات في الوات ساب..
يضم في عضويته عددا كبيراً من الصحفيين الحمر، وعدداً أكبر من أبناء وأقطاب ومحبي المريخ في مختلف الدول العربية والآسيوية والأوروبية وأمريكا.. منهم محمود الجلعوب المقيم في دولة قطر الشقيقة..
قال في مداخلة بالقروب أمس الأول: (زمان إسماعيل حسن كان بقول المريخ عمل صالح، فهل يا ترى لا زال عند رأيه أم يرى أنه أصبح عملاً “مسكونا”..
قلت له… بالذمة يا جلعوب، هل المريخ الذي نراه في السنوات الأخيرة، له علاقة بالمريخ الذي كنا نقول إنه عمل صالح..؟؟!! هل هو المريخ الذي أحببناه من قلوبنا، وجرى في عروقنا مجرى الدم ؟؟!!
لا يا جلعوب… مريخ السنوات الأخيرة على قولك (عملٌ مسكون) … حاجة ما مفهومة… ملطشة لليسوى واللي ما يسوى…
كل من يريد أن يرأسه؛ يرأسه.
كل من يريد أن يكون ضمن عضوية مجلسه؛ يكون!
كل من يفكر في تدمير مجتمعه؛ يدمره بكل سهولة…
أقول ليك بقى شنو ما عارف.!!!
بقى “هوين”؟؟؟!!!
نعم بقى “هوين”..
بقى طارد؟؟؟!!!
نعم بقى طارد!!!
والأدهى والأمر.. يتحكم البعض فيه، ويدورون به يمين شمال رغم أنوفنا… يمرحون فيه، ويتلاعبون به، وفق ما يشاؤون….
ربنا ينتقم منهم… ربنا ينتقم منهم… ربنا ينتقم منهم….
علي باليمين يا جلعوب، نكهة المريخ.. وعظمتو.. وحلاوتو.. ماتوا جوانا…
واحساسنا بيهو بقى أغرب من غريب… ما الإحساس الكان زمان متملك الجوف والعصب…
لا حول ولا قوة إلا بالله… اللهم لا نسألك رد القضاء، إنما نسألك اللطف فيه..
آخر السطور
لعلم الإخوة في مجلس المريخ.. “لي كلارك” عاد للجهاز الفني بأمر الجماهير… ولن يذهب إلا بأمر الجماهير… نقطة سطر جديد.
إذا تلاعب الأهلي بذيله، وتحايل على قرار الكاف الذي سمح بموجبه بدخول 4500 من أنصار المريخ مقابل 500 من أنصار الأهلي في مباراة الجمعة، ح تكون فضيحة بجلاجل يسجلها التاريخ ضده، وضد الأخلاق الرياضية عموماً في مصر..
حازم التزم بكلمته لرئيس الأهلي وسيخوض المباراة في السلام، رغم أنها مباراتنا… وبالتالي، على رئيس الأهلي أن يلتزم أيضاً بكلمته لرئيس المريخ، ولا يلف أو يدور حول قرار الكاف.
أي نقيصة في العدد المسموح للمريخ، أو زيادة في العدد المسموح للأهلي بأي حيلة من الحيل، لن نصمت عليها، وعلى الباغي تدور الدوائر..
حسنا فعل حازم وهو يلطف الأجواء.. ويعيد الصفاء .. للديار الحمراء.
الخبر الذي راج في الأسافير أمس حول طلب تقدم به المريخ لقيام مباراة الجمعة بدون جمهور، أتمنى ألا يكون صحيحاً… إذ أنه إذا صح سيخدم الأهلي أكثر مما يخدم المريخ..
وكفى.
ههههههههه دااااابكم صحيتو من النوم وعرفتو انو كفيلكم فضيحة فضيحة بمعني الكلمة كل العفن وعدم الذمة وبيع الذمم من اجل التكويش علي الالقاب عملو ولا زال بعمل فيه وانتو ي هوينين ومهانين اهنتو الشعب السوداني كله وليس المريخ حينما تلطخت أيديكم بمصافحة الخطيب والاهلي الخبيث لسه تشوف اكتر من كدا
ود مزمل لا
ود مزمل لا
كيف يكون المريخ عملآ صالحآ وقد تأسس برعاية من المستعمر الباغي اللئيم الذي تململ من نضال الأهلة فسعى لرعاية فريق منافس له فرعى نجمة الملكة فكتوريا الذي يعرف اليوم بإسم المريخ….
الدلاقين نادي الحكومات والحكام….
أصلا طعم القروش في البداية حلو، خصوصا لو كانت جاية ملح ساكت، لكن صاحب القروش بعد يتوهط كويس ويمسك الدركسون بيوديكم محل ما عاوز، وكل ما تجعروا كل ما يروح عاصر على الأبنص زيادة 😆😆😆
ده حالكم يا مرخرخين، تشكروا وتمدحوا وتطبلوا للزول البغرقكم بالقروش أيا كان مصدرها، وأول ما الشغلانة تكتم والمركب تميل تطلعوا على الناس في صورة الناصحين المصلحين !!
سلم لي على الكاهن الأعظم أليخماو !!
أها أخبار الزول العزمك شية ضان إنت ورمضان عجب ومحمد الرشيد شنو 😝😝😝
زناطير اخر زمن ديل مالن المريخ عمل صالح مريخ شاخور ومانديل عندكم شنو يااصحاب الصفر الدولي قبل يومين في الجمعية حقتكم الكراسي تتطاقش والبونية داقة ولسه حاكماكم لجنة تطبيع وفالقننا بي نادي الحركه الوطنية والديمقراطية الهليل حايكون طول عمرو صفر علي الشمال لانهم حاقدين علي المريخ حتي اللعبية شفت الفرح الهستري مامصدقن انو يغلبو المريخ