جربنا العصر وهم جربوا الليل..روفا يا وش الخير

قزاز ورزاز

محمد الطيب الأمين

جربنا العصر وهم جربوا الليل..روفا يا وش الخير

* ماشاء الله تبارك الله.
* وتاني برضو نقول ماشاء الله تبارك الله.
* (فريق) الهلال بقى زي (فرقة) عقد الجلاد.
* متعة وجمال غير عادي.
* غنا بالكدارة.
* شكل ومضمون.
* فهم لأي وهم.
* البقابل الهلال الأيام دي إلا يعمل (ترس) بعد منتصف الملعب مباشرة.
* إلا (تقطعوا) الملعب وتحرقوا اللساتك.
* روفا ما بقيف إلا بالبمبان.
* هجوم مطر.
* هجوم الهلال يشبه (مطر القضارف).
* السحاب في القضارف بتجمع وببقي مطرة وبغرق الواطة … وكلو ده في ربع ساعة.
* مطر كثيف وسريع.
* المطرة في القضارف لا بتعرفها جاية من شرق ولا غرب.
* وهجوم الهلال حالياً زي مطر القضارف.
* الهجمة الهلالية بتجيك من حيث لا تتوقع.
* الجماعة قالوا الهلال لما يلعب بالليل بيفوز.
* وامبارح الهلال لعب في شمس لا يعلم بها إلا الله وبرضو انتصر وبرقم كبير.
* هم لعبوا مع هلال الساحل بالعصر واتعادلوا قالوا سبب التعادل السخانة.
* وطبعاً المريخ هو أول نادي في تاريخ العالم يخسر بسبب البرد.
* خسارة المريخ أمام الوحدات الأردني بسباعية سببها الأول قالوا هو (البرد).
* والتعادل أمام هلال الساحل سببو السخانة.
* والتعادل أمام الخرطوم الوطني سببو الليل.
* امبارح لعبوا مع الخرطوم الوطني بالمساء وبرضو اتعادلوا.
* يبقى المشكلة لا في العصر ولا المساء.
* الحكاية ما حكاية برد أو سخانة.
* الحكاية في الكباية.
* نحن بنغلب والشمس فوق، وبرضو بنغلب بعد الشمس تغيب.
* الموضوع ما موضوع عصر ومغرب.
* ما موضوع شمس وقمر.
* الموضوع موضوع هنا في روفا والغربال واجاجون وفيري.
* في الهلال في فنانين.
* بيغنوا بالكورة.
* عشان كده ما فارقة المباراة عصر ولا ضهر.
* العندو روفا ما بخاف من الشمس.
* سباعية في شباك الأمل.
* الهلال يضرب بقسوة.
* ويفرض شخصيته.
* ويتألق مجموعة وأفراد.
* والمريخ يقوم من تعادل ويقع في تعادل.
* وسباعية الأمل هيجت لهم الذكرى.
* اتذكروا الوحدات الأردني.
* الهلال قصد السبعة دي.
* المهم .. نقيف هنا ونكمل الباقي من خلال حلقة اليوم على قناة (دقايق) على اليوتيوب.
* و.. و..
* وروفا لأي زول.