حازم قال السوباط ما برد .. مش يمكن ما عِرف الرقم !!

قزاز ورذاذ
محمد الطيب الأمين
حازم قال السوباط ما برد .. مش يمكن ما عِرف الرقم !!

* من لطائف رئيس المريخ (المغترب) حازم قوله : اتصلت على السوباط وما رد علي.
* إحتمال ما عرف الرقم.
* احتمال ولا ما إحتمال؟
* حازم زعلان عشان السوباط ما رد ليهو.
* أنت اتصلت ولا مسكلت؟
* جائز يكون مسكول.
* لو مسكول ، السوباط ما برجع للمسكولات.
* ولو اتصلت عديل يبقى الرقم ما مسجل عندو.
* هو ذاتو كويس إنو ما رفض فيك المكالمة والله.
* كونو ما رد بس دي ذاتا حاجة كويسة.
* كان ممكن يرفض المكالمة عديل.
* ولو عمل كده معاهو حق برضو.
* ما فاضي.
* زول مسجل ليهو محترفين بحوالي سبعة ألف دولار دايرو يرد ليك؟
* ما فاضي ليك ولا فاضي لتلفوناتك.
* حازم السنة الفاتت زي الوقت ده تلفوناتو تطاقش مع كابتن محمود الخطيب رئيس الأهلي.
* الخطيب لو ما رد حازم بركب بمشي ليهو في مصر.
* بقى ليهو في رقبتو لحدي ما في النهاية تمت البيعة.
* بيعة (سوق العتبة).
* البيعة التي نصت على بند مثير للضحك والشفقة.
* نصت على (تاكلوا وتشربوا على حسابنا).
* بيعة من شروطها (المحشي والكُفتة) على الأهلي.
* وتاني؟
* يغلبوا ليهم الهلال رايح جاي.
* قوم على حيلك.
* وتاني؟
* يغلبوا ليهم صن داونز رايح جاي.
* قوم على حيلك.
* وتاني؟
* يدوهم لاعبين على سبيل الإعارة.
* إعارة ب(قا).
* هذه البيعة لم يلتزم فيها الأهلي بأي بند بخلاف بند الأكل والشراب.
* وحكمة الله الفريق الوحيد الشال من الأهلي 6 نقاط هو المبيوع نفسه.
* حازم وبعد أن علم أن الجاكومي قد خرب وش مع الأهلي من خلال ذلك التسجيل المصور الفضيحة قال احسن يرجع للسوباط.
* ننصح الأخ حازم بأن يتبع القنوات الرسمية في التواصل مع الهلال.
* حكاية التليفونات والماسنجر والايمو دي خليها.
* ده ما وقت ماسنجر.
* ولا وقت ايمو.
* رسل مشكلتك بالايميل.
* أو خطاب عن طريق الأمانة العامة.
* خليك زول مؤسس.
* وخلي شغل التلفونات ده.
* غايتو جنس غايتو.
* الله يكفينا شر (المُصدي) اللمعتو الأيام.
* و. و..
* دقيت ليهو ما رد يرن جوالو بي شدة!