انتوا (الاندية) دي بتجيبوها من وين؟

صابنها

محمد عبد الماجد

انتوا (الاندية) دي بتجيبوها من وين؟

• عندنا زول كبير في السن .. كل ما تكون في (سماية) في الحلة بيلبس جلابيتو ويدرع عبايتو السوداء في جسمو وبمشي يضرب ليك (اللحوم).

• ما بخلي ليه حاجة… يقوم من صينية لي صينية متل ماكنيكي السيارات .. وكل مرة بكورك جيبوا (الضلع) … الضلعة الفي الصينية دي صغيرة .. زيدوا (سلطة الاسود)… وملاح القرع دا مالو ملحو كتير؟ .. نحن عندنا الضغط الملح ما بنفع معانا.

• انتوا عاوزين تكتلونا.

• عمك يشتغل كدا من اول صينية تدخل للديوان لي اخر صينية. زي بتاع المرور البكون (لابد) تحت الكبري.

• او تحت شجرة ظليلة.

• ما تعرف تمشي وين؟

• عمك وقت خلاص يشبع ويقوم عشان يرجع لي اهلو .. بكورك لي اقرب شافع .. ويقول ليه عليك الله شوف لي فردة النعال دا وين جنا؟

• عمك شغال يضرب في اللحوم (حفيان).. قبل ما يطلع بشوف ابو المولودة الجديدة وبقول ليه : اها سميتوها منو؟.. البنية مبروكة.

• ابو المولودة بقول ليه : سميناها (لارا)… عمك يعاين ليه سمح ويقول ليه انتوا الاسماء دي بتجيبوها من وين؟ والله لو عارف اسمها (لارا) اللحمة الجبتوها لينا دي ما كنت مشيت عليها ولا بدخلها في خشمي .. عليك الله هسع لو سميتوها (كلتوم) على حبوبتها مالو ؟ .. والله البنت عندها حبوبة .. يختوها في الجرح تبرأ.

• عمك شغال كدا من سماية لي سماية متل المراجع العام.. كل سماية يمشي عليها بضرب اللحوم وما بخلي ليه صحن (سلطة اسود) لافي ساكت .. وكل ما خلاص يدور يقوم بيسأل ابو المولودة : اها البنية سميتوها منو؟

• ابو المولودة بقول ليه سميناها (لدن) … عمك بقول ليه : انتوا الاسماء دي بتجيبوها من وين؟ عليكم الله لو سميتوها على حبوبتها (ست النفر) .. الله كان بحاسبكم .. والله البنية دي كان عندها حبوبة .. ما بتغلط ليها على زول.

• الاسم دي مع اللحمة الاكلتها الليلة في السماية ح يغلط عليّ… والله لو عارف دا اسمها .. ما كان قعدت لي في صينية.

• موضوع عمك دا انتشر في الحلة .. بقى أي زول يشوف ليه زول بقول ليه نفس الشيء.

• يعني مثلا لمن تلقى ليك زول لابس ليه قميص غريب .. بتقوم تقول ليه : انتوا القمصان الغريبة دي بتجيبوها من وين؟

• وهكذا دواليك.

• هسع انا عاوز اقول لي ناس المريخ انتوا (الاندية) دي بتجيبوها من وين؟

• ارتا سولارا دا عمري ما سمعت بيه .. نادي زي فرق (الداخلية) .. كل لاعب من بلد.

• الغريبة اقل واحد فيهم عمرو (35) سنة .. الناس ديل قالوا بعد السن دي .. جابوا ليهم قون في المريخ الحكم ما احتسبو.

• عليكم الله هسع ديل عاوزين ليهم مساعدة من حكم.

• انا ما عارف (زارف مصطفى) زرف الدموع في جيبوتي على شنو؟

• دا فريق يزرفوا عليه دمعة واحدة.

• اكيد الزول دا اتذكر (ليليبو) في الهلال قام زرف الدموع .. وعمل الموضوع (فرحة).

• ويا خسارة (دموعي) فيك.

• المريخ اتأهل .. لكن نحن في الهلال لو قابلنا فريق زي ارتا سولارا دا بالتلفون بنتأهل للدور المقبل.

• عليكم الله هسع الفريق دا عاوز ليه سفر؟ .. ومعسكر؟

• وحكم!!!

• الموضوع دا كان ممكن يتحسم بالتلفون.

• من غير سفر.

• رئيس المريخ مع ذلك قعد يبكي بعد فوز المريخ على ارتا سولارا 2 / 1.

• اذا كان مستوى المريخ كدا .. اكيد السنة دي المريخ سوف يعاني كثيرا في الدوري الممتاز.

• ناس الفلاح وحيدوب والزومة حظهم.

• المريخ سوف يعاني امام الزومة .. فريق ارتا سولارا دا ما يغشكم.

• دا فريق متواضع… اظنهم كونوه بي جمعية خيرية.

• أي بي (ختة) صندوق.

• والله يا جماعة مستوى البطولات الافريقية اصبح يخجّل .. مباراة المريخ وسولارا امس مستواها كان ضعيف .. والتلفزة زي كتابة االجواب باليد .. من زول طالع من سنة رابعة.

• على الاتحاد الافريقي ان يعمل من اجل رفع مستويات بطولاته القارية. وان يضع شروط ولوائح صارمة للمشاركين في البطولات الافريقية.

• ان شاءالله الهلال يطلع من المستوى دا ويشارك في بطولة السوبر الافريقي.

• حقيقة مستوى البطولة الافريقية للإبطال مخجل.

• طبعا هذا الحكم .. ليس على كافة الاندية .. لكن هناك الكثير من الاندية يجب ان لا تمنح فرصة المشاركة في البطولة القارية الاولى.

• كذلك لا نستطيع ان نعفي الهلال .. يفترض ان يكون مستوى الهلال ودرجاته تعفيه من المشاركة في المرحلة التمهيدية.

• الهلال كان يجب ان يكون في مستوى الاهلي المصري وصن داونز والترجي والوداد ولا يلعب في مرحلة التمهيدي.

• تراجع الهلال في السنوات الاخيرة جعله يلعب في بطولة الاندية الافريقية للإبطال من مرحلة التمهيدي الاول.

• الهلال قبل سنوات كان لا يلعب في التمهيدي مثل الاهلي المصري وصن داونز والوداد.

• الوداد والترجي والاهلي الآن ما احسن من الهلال في شيء.

• نتمنى ان ينجح الهلال في هذا الموسم في تجاوز مرحلة المجموعات والوصول الى الادوار النهائية حتى يرفع من درجاته في التصنيف الافريقي ويشارك في الموسم القادم في بطولة السوبر الافريقي.

• وقبل ذلك طبعا على الهلال ان يتجاوز باذن الله سانت جورج اليوم ويتأهل على حسابه للدور المقبل.

• الكرة الاثيوبية طبعا متقدمة كثيرا على الكرة الجيبوتية.. وليس هناك مقارنة بين سانت جورج وفريق سولارا .. وان كان سانت جورج نفسه في مباراة الذهاب امام الهلال لم يظهر بشكل جيد .. مع ذلك استطاع الانتصار على الهلال لأن الهلال كان غائبا نهائيا في بحر دار.

• نتمنى ان يعدّل الهلال الصورة الباهتة التى ظهر بها في المباراة الاولى ويقدم مباراة كبيرة ورائعة امام ضيفه على ملعب الهلال.

• ننشد اليوم انتصار كبير للهلال ان شاءالله .. يعيد به الفريق الثقة لجماهير الهلال التى وضعت طموحات كبيرة على فريقه من منطلق مستويات المحترفين الذين ظهروا بها مع الهلال.

• ان شاءالله الهلال قادر اليوم ان يقدم مباراة كبيرة ورائعة وان ينتصر على الفريق الاثيوبي الذي حالفه التوفيق في المباراة الاولى وانتصر على الهلال رغم انه لم يقدم مستوى جيد في تلك المباراة.

• الهلال يحتاج لهدف نظيف حتى يتأهل لدور الـ 32 وهذا يعني عدم الاستعجال اليوم او الاندفاع غير المبرر.

• سوف يأتي الهدف .. على الجماهير ان لا تستعجل النتيجة وان كنا نتمنى ان يحسم الهلال المباراة مبكرا حتى يريح اعصاب جماهيره.

• مطلوب فقط من الجماهير عدم الاستعجال او الانفعال .. سوف يتأهل الهلال اذا توفرت الثقة في المدرجات.

• ثقة الجماهير في فريقها سوف تنتقل للاعبين .. امنحوا لاعبي الهلال الثقة.

• المباراة ان شاءالله سوف تكون ممتعة ورائعة .. لهذا اتمنى ان يكون مجلس الهلال قد حسم امر تلفزة المباراة حتى لا يحرم جماهير الهلال في الولايات وفي العاصمة نفسها وخارج البلاد من العرض الرائع الذي سوف يقدمه الهلال اليوم ان شاءالله.

• في تلفزة مباراة اليوم رسالة للجميع … ودرس يمكن ان تقدمه الجماهير للاتحاد الافريقي وللأندية المنافسة عن عظمة جماهير الهلال وروعة الملعب.

• لا تحرموا جمهور الهلال خارج الاستاد من حق الاستمتاع بفريقها في مباراة اليوم.

• مباراة اليوم سوف تكون مباراة للتاريخ .. من حيث الكثافة الجماهيرية والتنظيم وروعة الملعب وقبل ذلك حلاوة الاداء وجمال الانتصار ان شاءالله.

• اظنها سوف تكون بإذن الله مباراة للتاريخ .. لذلك يجب تلفزة المباراة حتى يشهد الجميع للهلال بذلك.

• …………

متاريس

• اخشى من انفعال اجاجون وصلاح عادل .. اذا فقد الهلال في مباراة اليوم لاعبا بسبب الكروت الملونة سوف يصعّب من مهمة تأهله.

• لهذا اتمنى من مدير الكرة عبدالمهمين الامين ان يشدد على اجاجون وصلاح عادل تحديد ويطلب منهما الهدوء وعدم الانفعال او الاستجابة لاستفزازات الخصم.

• علينا ان ندرك ان انتصار اليوم سوف يتحقق عن طريق الهدوء والتركيز وعدم الانفعال او الاستعجال.

• ما تشيلوا هم على الهلال سوف يتأهل الهلال ان شاءالله بعد ان يقدم مباراة رائعة وممتعة.

• العبوها بالرواقة.

• واحدة واحدة.

• وبالتوفيق للهلال.

• ….

• ترس اخير : والله غالب.