كأس العالم بالردمية..!!
صابنها
محمد عبد الماجد
كأس العالم بالردمية..!!
• اكتب قبل مباراة الافتتاح التى تجمع بين المنتخب القطري صاحب الاستضافة ومنتخب الاكوادور – واستحضر الاحساس للحدث الاكثر متابعة في العالم ، حيث لا يوجد حدث يحظى بالمتابعة حد الشغف مثل نهائيات كأس العالم – الحدث الذي يجمع العالم كله حول الشاشة.
• الغريبة ان نهائيات كأس العالم قبل ظهور الفضائيات كانت تجمع الشعوب حول التلفزيونيات المحلية والوطنية – وكانت شعوب العالم حتى في الدول الفقيرة تشاهد مباريات كأس العالم وتتابعها من خلال التلفزيون المحلي – وكان الذين لا يتمكنون من متابعتها تلفزيوينا يتابعوها من خلال الاخبار والصحف والاذاعة واحاديث الناس وتعليقاتهم.
• يعني كان في الامكان ان تجد زول في قرية صغيرة تقع على الهامش يحكي ليك كل تفاصيل مباراة البرازيل والارجنتين التى لعبت في نهائيات كأس العالم 1982 وفاز فيها المنتخب البرازيلي 3 / 1 رغم عدم مشاهدته للمباراة.
• السودانيون عندهم قدرة فائقة للحديث عن الاشياء التى لم يشاهدوها.
• ما بخلوا حاجة.
• يجيبوها ليكم بي كورنراتها.
• الواحد منهم تحلف تقول كان جزء من المباراة او كان الحكم الرابع او مراقب المباراة.
• نحن نتميز بذلك.
• ما عارف الحكاية دي كويسة في حقنا وإلّا لا؟
• ما تسألوني كتير.
• وما تقيفوا لي في اي حاجة.
• خلوا الموضوع يمشي عادي.
• الدنيا برد!!
• هسع علاقة البرد بالموضوع دا شنو؟
• ما تسألوني.
• الحديث عن كأس العالم … خلاني ارجع بالذاكرة شوية الى الوراء واقيف في بعض الامور التى كنا نعتبرها من الثوابت.
• في حاجات كتيرة اتغيرت في الدنيا وفي الكورة وما في زول بتكلم فيها.
• شوفوا العالم دا تطور كيف؟
• زمان نحن وقت كنا بنلعب كورة .. كان في اي فريق لازم يكون في (مدافع) مهمتو في المباراة يطفش الكورة.
• دي شغلتو.
• ويا ريت (تطفيش) الكورة كان بكون لي قدام.
• اقول ليكم.
• زمان وقت تكون في مباراة بتجمع بين فريقين .. كان بتكون في كورة واحدة .. وكان الفريق الذي يسجل هدف او يكون متقدم في المباراة بكون عندو مدافع قدر ما الكورة تقع قدامو بشيلها ويطفشها برة الملعب.
• الجهاز الفني المباراة كلها بكورك ليه (طفش بس).
• الكلام دا قبل (تسقط بس).
• الكورة سابقة في اي حاجة.
• عارفين (التطفيش) ليه؟
• عشان الكورة وقت تطلع برة الملعب .. بتأخد ليها على الاقل (5) دقائق .. عشان يجيبوها والمباراة تلعب من جديد.
• المباراة بتقيف …الكورة واحدة.
• لذلك كان اي فريق بكون عندو (مدافع) بيشتغل (تطفيش) .. وكلما كان المدافع (طفاش) … بكون احسن.
• مباريات الروابط طبعا بتلعب في الاحياء .. والميدان بكون وسط البيوت .. والمدافع الشفت بطفش الكورة في تلك البيوت.
• الفريق لمن يكون مغلوب كابتنه وقت الكورة تطير وتقع في حوش احد البيوت القريبة من الميدان بمشي يدق الباب عشان يجيب الكورة بطلع ليه عمك كبير لابس ليه (عراقي) قديم.. يسمعه الف كلمة فارغة .. ويقول ليه الكورة دي قبل كدا كسرت (اللمبة) بتاعة الحوش (ولا بطون في كلام بالشكل دا) وانا الكورة دي لو وقعت تاني في البيت دا بنفسها ليكم.
• زمان كانت نص مشاكل الكورة الموضوع دا.
• كورة تقع ليها في بيت تكسر (لمبة) الحوش.
• مدافع يطفش الكورة .. الكورة تقع في احد البيوت … لاعب يمشي يجيب الكورة .. عمك يطلع ليه يسمعو الف كلمة فارغة.
• نص كور زمان (اتنفست) بذلك السبب.
• عشان كدا كورتنا لغاية الآن منفسة.
• اتخيلوا هسع اي مباراة بكون فيها (25) كورة برة … جاهزة… طلعت كورة برة الملعب ما بمشوا يجيبوها .. بيلعبوا بي كورة تانية.
• لكن في مدافعين لغاية الآن شغالين بالعقلية القديمة .. بطفشوا الكورة وبفتكروا الموضوع دا ممكن يعطل المباراة شوية.
• والله نحن زمان الموضوع دا سمعنا فيه جنس كلام فارغ.
• زمان كان في ناس صعبين .. اعمامك في الحتة دي ما بتفاهموا … الكورة وقت تقع في بيوتهم بعتبروا هذا الموضوع بمس كرامتهم وشرفهم .. يقع صاروخ في بيتهم وما تقع كورة.
• الكورة لا.
• الناس كانوا صعبين.
• يمكن عشان كدا الكورة كانت طاعمة.
• هسع قدر ما تابعت لي مباراة .. ما لقيت لي مدافع عندو القدرة يطفش ليه كورة عشان تقع في البيت المجاور للملعب.
• المدافع لو بالغ كورتو بتطلع من خط 18.
• قدر ما ينفخ ما بتطلع من خط 18.
• الحاجات اتغيرت.
• الحاجات ابتدلت.
• زمان برضو كان بقولوا ليك قرار الحكم نهائي .. والحكم لو اتخذ قرار .. تاني لو السماء انطبقت مع الارض ما بتراجع منه.
• تعال شوف هسع.
• الحكم ممكن يتخذ قرار .. يحسب هدف .. واللاعبون يحتفلوا بالهدف والكورة يودوها النص.. يقوموا ناس (الفار) يستدعوا الحكم .. الحكم يمشي على الشاشة .. ويرجع من قراره عادي وينقض الهدف.
• عادي يرجع.
• وممكن ينقض ليه هدف والكورة تكون شغالة .. الحكم بعد 120 ثانية يرجع ويحسب الهدف.
• الكلام دا هسع مافي.
• معقولة ضربة الجزاء يرجعوا ليها بعد (3) دقائق.
• قرارات الحكم بقت اي كلام.
• الغريبة الناس البحللوا في الفضائيات بقولوا ليك لغاية الآن قرار الحكم نهائي.
• مع (الفار) الحكم بقى يرجع من قراره عادي .. ولا بتلفت .. حليل زمن قرار الحكم كان نهائي.
• مباريات كأس العالم بقينا هسع نشعر بيها شيء (معلب).
• المباريات بقت (معلبة).
• بقى ما فيها طعم.
• الصناعة في الكورة غلبت على الموهبة.
• المباريات بقوا يهتموا فيها بجوانب النقل والتصوير.
• بقوا يركزوا على الملاعب.
• الخطط التكتيكية بقت مسيطرة على سير المباريات.
• ما في لاعب بطلع ليه كورة ساكت.
• اللاعب بقى كأنو ممتحن كيمياء.
• اللاعب بمشي بالتعليمات زي (الضابط).
• ما في حاجة ساكت.
• اللاعب عارف متين يطلع الكورة ويطلعها وين؟
• ويعمل شنو بعد ما يطلعها.
• ما في حاجة ساكت.
• اللاعب بتقدم بحاسب.
• وبقيف بحاسب.
• اي حركة محسوبة.
• يا جماعة اذا كان اللاعب بترصد تحركاته (30) كاميرا.
• اللاعب متابع من الحكام ومن غرفة تقنية الفيديو.
• يعني لو عمل (مخالفة) في سرو … بجيبوه.
• ما في حاجة ساكت.
• هذه الوضعية تضع اللاعب تحت الضغط .. وتجعل كل تصرفاته محسوبة.
• العالم كله بتابع فيه.
• وشيء اعادة.
• وشيء من زاوية عكسية.
• وشيء من كاميرا من فوق.
• الاطباء في غرفة العمليات ما بكونوا تحت هذا الضغط والرصد.
• تتخيلوا بعد الكلام دا المباراة بحللوا فيها اسبوع … بل ان المباراة تظل في موضع النقاش والتحليل لسنوات عديدة.
• في ناس لغاية الآن بحللوا في كأس العالم 1986م.
• ما في حاجة ساكت.
• ……………….
متاريس
• نحن مع الكلام دا وين؟
• نحن بعدين.
• وما اظن نصل.
• العالم فات.
• في الكورة ما بنلحقهم.
• في (اللعب) ما بنقدر عليهم.
• شوفوا قطر حصل فيها شنو؟
• قطر بقت جمهورية كرة القدم.
• اي حاجة فيها كورة.
• اي شيء كورة.
• الناس ديل شغالين صاح.
• تكلفة قطر لترتيبات وتجهيزات كأس العالم (200) مليار دولار.
• نحن في السودان لو وجدنا هذا المبلغ كان بحل لينا مشاكلنا كلها.
• السودان لا يصرف هذا المبلغ .. لا في الامن ولا في الجيش ولا في الصحة ولا في التعليم .. قطر صرفوه في كورة القدم.
• الله يكون في عون السودان.
• الله يشوف السودان.
• ان شاءالله ما نكتفي بالمشاهدة فقط.
• نحن قدرنا اكبر من ذلك.
• نحن باسطين شديد.
• نحن في الهلال فرحانين بافتتاح الملعب الرديف … ملعب (مقعد) واحد ما فيه.
• وناس المريخ فرحانين بالنجيلة (التركية).
• الله يعدل الحال.
• ونقدر نعمل حاجة مع كل هذه الاوضاع.
• نحن قادرين .. نعمل شيء.
• حتى لو كان ما عندنا امكانيات.
• ح تفرج.
• وح نعبر.
• وننتصر.
• قولوا يا رب.
• ……….
• ترس اخير : خلوها على الله.
فعلا الكورة زمان عندها طعم
ههههه مرات واحد يكون لاعب حفيان وأضافرين رجله سقالة بنطون يشوت الكورة ضفاري ويطرشقها ويتفرتق التمرين وعشان الناس تلم قروش الكورة عايزين ليهم إسبوعين ودا غير البجيك بسروال وعراقي وعايز يتمرن بالقوة وغير صاحب الكورة لم تقول ليهو غير يقوم يهددك بشيل الكورة تقوم تخليهو وهو لولا أن الكورة ملكه لا يصلح أن يأتي بالكرة من الخارج
الكاتب الجميل جدا محمد عبدالماجد ….. تحياتي