بقاء الهلال أهم من انتصار المريخ
من خلف الكواليس
عصام هجو
بقاء الهلال أهم من انتصار المريخ
*ماشاهدناه في مباراة المريخ والهلال من هراء وعك ولعب على الاجسام لاعلاقة له بكرة القدم على الاطلاق وكما كنا نقول باستمرار الناس (بيلعبوا كرة قدم على اصولها )وجماعتنا في السودان بيلعبوا لعب على كرة القدم وماشاهدناه قد تكون أي لعبة اخرى ولاتستحق أن نطلق عليها مباراة كرة قدم وباختصار نحن خارج نطاق اي حاجة … نعيش في كوكب آخر ….. كوكب قدر ظروفك او مشي حالك.
*المصيبة (الغمة) بضم الغين التي تسبب (الحمى ) بضم (الحاء وفتح الميم) وتسبب الضغط والسكري جاءت بعد نهائيات كاس العالم وبعد ان كنا نستمتع بمشاهدة قمة فنون وجماليات كرة القدم وجدنا انفسنا نتفرج على مسخ مشوه يستحق ان نطلق عليه (كرة ندم) لأنها ليست كرة قدم ولا علاقة لها بكرة القدم التي نعرفها لامن بعيد ولا من قريب … يعني العين او النظر ذاتو احتار كان بعاين وين وأصبح يشوف في شنو .
*نفس الأمسية التي مات فيها الأسطورة بيليه يجب عليننا ان نعلن موت الكرة السودانية التي تستحق ان نحمل نعشها ونودعها الى مثواها الأخير رأفة بالمشجعين والمساكين من عشاق المستديرة وبمناسبة الاسطورة بيليه فقد سالته وجها لوجه في اخر زيارة له الى دبي عن زيارة نادي سانتوس الى السودان واللعب ضد الهلال قال بصراحة الكلام دة ماحصل واذا حصل انا مامتذكرو واول مرة اسمع بحاجة اسمها (هلال )والكلام للمرحوم بيليه انا ماقلت حاجة. .
*طبيعي ان يكون فريق نادي المريخ بلاروح وبلاارادة وبلاحماس لانه لاول مرة في تاريخ النادي الاحمر يدخل الفريق الى ارض الملعب وهو بلا ادارة وكما اسلفنا طبيعي ان يكون بلا اداردة وطبيعي ان يكون كل لاعب شغال على (كيف كيفه ) في الملعب وكان عاديا طبيعيا ( ريكاردو يجلط وإبراهومة ينطط) بدلا من ان يخطط .
*أما جمهور نادي المريخ فقد كان مشغولا بالعملية الانتخابية والجمعية العمومية اكثر من انشغاله بمباراة (الغمة) فقد كان منقسما مابين (أيمن وحازم) لاحظوا معي وشوفوا الزمن ودانا وين فمن بعد الأسماء التي مازال لها إيقاع وتسبب الرعب وزي مابيقولوا (أسماء تهز وترز وتملأ الخشم )وعلى راسهم على سبيل المثال وليس الحصر الحاج عبدالرحمن شاخور وحسن ابوالعائلة وعبدالحميد الضو حجوج ومحمد الياس محجوب وجمال الوالي وخالد حسن عباس وبشير حسن بشير وعبدالعزيز شدو فلاتعليق لأن جمهور نادي المريخ وجمعيته العمومية حائرة بين أيمن وحازم .
*السؤال الذي يطرح نفسه اذا فرضنا ان المريخ يعيش في قمة (الجهجهة والبتشنة) في ظل انعدام الاستقرار الإداري والذي تحول الى فراغ اداري بالكامل فطبيعي ان يكون بلا إرادة طيب الهلال (مالو) ماسبب معاناته لانه يتمتع بكل أنواع الاستقرار الإداري والفني وفوق هذا وذاك الإمكانات المهولة حيث يجري ويصب ويتدفق فيه (نهر السوباط قروشا واموالا ضخمة ) ومعه الشاب المتميز العليقي الذي يعتبر واحدا من اهم انهار البترول وكل مشتقاته.
*اذا أجرينا مقارنة بسيطة بين استقرار الهلال والبهدلة والمشاكل التي يعاني منها لاعبو المريخ فيمكن القول انه اذا حصل لاعبو المريخ على ربع مشتقات البترول التي يتمتع بها لاعبو الهلال يستطيع لاعبو نادي المريخ مقارعة كليان مبابي واسود الاطلس ونجوم كرواتيا وهولندا وصربيا وكل من أبكاهم وتلاعب بهم الأسطورة ليونيل ميسي أما اذا تحصل لاعبو نادي المريخ على البترول صافيا من غير مشتقاته سيكون عندهم كلام مع ناس ميسي ابطال العالم
*على قدر مافكرنا في مصاب الهلال وأسباب تراجعه وتواضعه ومعاناته لم نصل الى نتيجة وبصراحة اذا كان رمضان او السماني عملوها الهلال ماكان بتقوم ليه قايمة تاني وكان اتفرتق (حتة حتة وصفر صفر) لكن الحمدلله ربنا ستر وجات سليمة وخرجنا بمكسب كبير ارجو الا تفهموني غلط ماقاصد (صفر كبير )والمكسب الحقيقي والكبيرهو المحافظة على بقاء الهلال في الوجود وهذا في حد ذاته يشكل مصدر فخر لجمهور نادي المريخ العظيم .
*يحفل تاريخ نادي المريخ بانه الأول في كل شيء له علاقة باشراقات الكرة السودانية وحقق الفوز بالبطولات الخارجية منذ قبل أكثر من 30 سنة ومازالت بقية الأندية السودانية التي يجرها من خلفه تلهث لمجرد تحقيق بطولة وهمية وضعيفة وبطولة مجاعة مثل سيكافا او بطولة التواني مثل كاس الكؤوس الافريقية ومازالت امام الأندية السودانية وعلى راسها ابوالهل شخصيا سيكافا والكونفيدرالية ودوري الابطال.
*باختصار ولانريد ان نسترسل في التاريخ وبصفة عامة ومن الاخر كدة أي حاجة بقولوا عليها اول وأول وإنجاز واعجاز التاريخ بيقول ان المريخ عملها اول واخر حاجة ان المريخ كان قاعد (سليقة ساي من غير بصل وتوم وشمار ) لارئيس ولا إدارة ولا أعضاء ورغم كل هذه النواقص لم يخسر من الهلال ونحن كمريخاب فرجانين بالتعادل اكثر من فرح الهلالاب لان التعادل هو النتيجة الوحيدة التي ضمنت لنا بقاء الهلال في الوجود كي نستمتع في المستقبل فنحن نظر الى قدام وبقاء الهلال في الوجود يهمنا لانه جزء من المريخ وفرع او باب من كتاب التاريخ المريخي وضلعة خرجت من ضلوع نادي المريخ فالإبن مهما بلغت درجة عقوقه في النهاية يصعب على الاب وطبعا قلب (الوالد حنييييين) وهكذا كان تعامل العم رمضان والشفت السماني مع الجماعة في الزريبة.
*من ححق الهلال ان ينظم مهرجان وكرنفال جماهيري حاشد للاحتفال بالتعادل مع المريخ لان التعادل يعتبر نتيجة إيجابية كونه تحقق بعد سلسلة من الضربات الموجعة على مختلف الطرق السمانية والرمضانية والتكتية والهاشمية والله لينا (ومركوب الجنينة) وكل مدن السودان وعواصم الدول المجاورة تشهد لينا وجوبا مالك علي والقاهرة بالسماني والجنية بالتيكيت وكوستي بدحدوح والكاملين بمامون صابون وسانتو برفاعة وزيكو بمدني والدحيش بالشكابة وابراهومة بالمسعودية وبورتسودان وصلاح بمبان .
*وكان رجعنا زمن ناس ماجد وجقدول زمن المتواليات الدقت فوق سقف المرمى ووصلت التمانيات اما زمن ناس العجب وكلتشي وطمبل وكليتشي وايداهو دة اسمو زمن الضرب بالدور يعني كانت مضمونة اكتر من ضمان موظف الحكومة للمرتب في اخر الشهر.
*اللهم احفظ لنا الهلال موجودا في الساحة فهو ابننا وزبوننا الدائم ونحن نحبه وندعم وجوده ولانرضى له الفرتقة والشتات مع خالص الشكر للسماني رغم انه كان حالف يرقص تاني وتالت ورابع لكن في النهاية اقنعوه ورمضان كمان قال المرة دي أعفوني شوية تعبان والتكت من يوم الجنينة قال للجمهور خلونا نتفاهم معاكم بفقه الضرورة طبعا الجمهور ماكان فاهم حاجة بس التكت قال ليهم ضرورة بقاء الهلال وغايتو بعد تعب الجمهور فهم واقتنع .
*برضو كمان ماتنسوا اول قمة حسب الطلب مش الهلال طلب الحكم طلب مثلما يجلس الواحد فيكم في المطعم ويقول لصاحب المطعم لوسمحت (فول مصلح) بالجبنة والبيض والشمار والبصل شفتو كيف بالطريقة دي الهلال طلب صحن حكمو وبرضو مافاز .
*يعني أول قمة طلب حكم وبرضو الهلال مافاز في قمة طلب صحن حكم مصلح .
*نشوف نتيجة الانتخابات ونواصل غدا.
عصام هجو
كنت فاكر إنك صحفي وناقد رياضي،لكن خسارة تشيد بفريقك، ولم تتطرق إلى الشماريخ أو اللوحات الممتدة التي تحمل إساءة للآخرين، لا علاقة لكم بتطور الرياضة ولا الذوق، يهمك بيع سمومكم حتى ولو كانت إساءة للآخرين، خسارة يا عصام هجو،الرياضة ذوق ومتعة واخاء ومحبة، لكن فاقد الشيء لا يعطيه، قال صفوه قال.
عليك الله كلمنا عن كأس الراحل جعفر حسين سنة 1989… اسف اقصد كأس مانديلا المزعوم…
وكمان كلمنا عن أهداف الأسطورة الراحل الكابتن صديق منزول في مرمى الدلاقينوكم عددها.. لو عارف عددها فدي مصيبة وإذا ما عارفها فدي كارثة…
الرقم القياسي لعدد الفوز في مباريات متتالية في مباريات القمة هو 10 مباريات متتالية لصالح الاسيااااد….
سؤال بريئ ارجوك رد عليه بكل وضوح ( من الذي اطلق لقب الدلاقين على والسبب شنو) كدا بتعرف قيمة الأسياااااااااد…
جمال الوالي ماكان فاتح ليكم أموال الدولة وبنك الثروة الحيوانية واموال ولاية الخرطوم مع ذلك لم تفوزوا بالدوري الا من المكاتب وكنت دايما طيش المجموعات انتو ماطلع ليكم ريش الا في عهد اتحاد الحكام اقصد اتحاد اللقيمات قال يقارع ميسي نشوفكم تعملوا ايه في المجموعات
أنته خلي بيليه الله يرحمه أنته رأيك شنو سانتوس زار السودان ولا لا وياربي لعب مع الهلال بس ليه وسؤال برئ أنته سألت بيليه الله يرحمه بأي لغه
ابرويس ظهر تاني؟؟؟😹😹😹😹كنت مختفي وين المدة دي كلها؟؟؟
“ولا نرضى له الفرتقة والشتات”؟ دة ما الحاصل ليكم انتوا هسع؟ المريخ الان يعاني من الفرتقة والشتات بعد ان قصمت الصراعات والانشقاقات ظهره. فريق باربعة رؤساء واربعة ادارات واربعة قطاعات جمهور وبلا استاد وتتحدت عن الفرتقة والشتات؟ اما محاولة استحضار الماضي فيبدو انك نسيبت فترة هلال هيثم مصطفى وسادومبا ونسيت هلال المتوليات لما كان بيدرب الهلال فوزي المرضي. والله العظيم المريخ فلت من الهزيمة. اما جمهوركم الذي تدعوه زورا وبهتانا بالصفوة فقد اظهر درجة غير مسبوقة من السقوط الاخلاقي. وصدقني لن ينفع الهلال شىء سوى “نواياكم الطيبة” وسوف يظل الهلال بدرا فوق رؤسكم مهما عملتوا. “آل فرتقة وشتات آل” والله مسخرة.
الرئيس الحقيقي للدلاقين ياود التجاني هو اليخماو صاحب السر المقدس فهو الآمر الناهي بس بدون صرف كالمثل الفائل عمدة بلا اطيان
كاتب ومن اسمو –هجو — لا عرفناك بتهجو في المريخ ولا عرفناك بتقلل من قدر الهلال — يا اخي ديل كتاب اخير منهم — كرشوم وبعشوم — وكسرة — والله كسرى ما عارف
الشي دا كاتب معانا هنا
اللهم لا تخولقنا ولا تعولقنا
غايتو المريخ دا فيه العجايب لكن الزول طلع هجو من الحجم العائلي
من وشك الصاريهو وما فيهو بركة ده عرفت كيسك فاضي، ولولا الملامة كان قلت ليك وشك نحس 😆😆😆
الحلامبشة بجيبوا الناس ديل من وين ياربي؟
نجهت قطر وكجيت السعودية، وطيرت حازم وشكلك حا تلحقه أبو جرابين برضو، والخوف على حلمبوش ذاته 😝😝😝
السلام عليكم يا هجو انا مرخابي اخب أوضح لك شي كلامك عن بيلية قال مابعرف حاجه اسمها الهلال انتي … انا كنت في انجلترا عام ٧٣ سبعين وكنت مسافر الي السودان في تلك الفتره يا عزيزي الفاضل اتصل على المرحوم حسن أبو العائلة كان الملحق العسكري في انجلترا طلب مني أن اخذ طقم الملابس الرياضة الكي أسلموا الي الاستاذ احمد عبدالرحمن الشيخ ريس مجلس إدارة بنك الشعب التعاوني وريس نادي الهلال في ذلك الزمن هذآ الي العلومية