زهور ابوجيبين..!!

صابنها
محمد عبد الماجد
زهور ابوجيبين..!!

• ربما هو الشخص الوحيد في المريخ والأندية المجاورة واتحاد العمال في بنغلاديش الذي احتفل وفرح بعودة امير كمال قائد المريخ السابق الى كشوفات المريخ. اتحدث هنا عن رئيس نادي المريخ ايمن مبارك ابوجيبين الذي ظهر (بين الزهور متصور) مع اللاعب امير كمال واحتفى احتفاءا كبيرا بعودة امير الى الديار الحمراء.
• هسع اتحاد العمال في بنغلاديش ذنبهم شنو؟
• الموضوع بتاع امير كمال ما بستحق.
• الكلام دا الجاكومي ممكن يقوم بيه.
• ابوجيبين على شنو؟
• الموضوع ما كان عاوز ليه (زهور).
• الشيء ما بستاهل.
• حدث ذلك في الوقت الذي تم الاستغناء فيه عن بكري المدينة بطريقة تؤكد ان الثمانية اعوام التى لعبها بكري المدينة في المريخ راحت ساكت. ابوجيبين الذي احتفل بعودة امير كمال على صفحته في مواقع التواصل الاجتماعي كان من باب الذوق والأدب ان يودع بكري المدينة بكلمة او صورة او شكر صغير.
• ان شاءالله بي (زهرة) واحدة.
• ما قدمه بكري المدينة للمريخ في سنوات لعبه للمريخ .. ما في لاعب في المريخ في السنوات الماضية قدمه للمريخ.
• جمهور المريخ كانت طموحاتهم عالية بعد فوز ايمن ابوجيبين في الانتخابات الاخيرة للمريخ .. وكان العشم كبيرا بعد الوعود التى اطلقها مجلس المريخ المنتخب وهم يتحدثوا عن التعاقد مع اربعة برازيليين من اختيار المدير الفني للمريخ البرازيلي هيرون ريكاردو.
• من غير (الزهور).
• المريخاب سوف يندموا على ادم سودكال الذي تميزت فتراته بأفضل تسجيلات للمريخ في السنوات الاخيرة (دي حقيقة).. كرشوم وطيفور وبخيت خميس والجزولي نوح وغيرهم من المحليين .. وفي المحترفين كفى ان نذكر انتوني.
• المريخاب حتى حازم مصطفى (زرّاف الدموع) سوف يندموا عليه اذا كان رئيس نادي المريخ (فرحان) بعودة الكابتن امير كمال بعد الاصابة بالرباط الصليبي .. والاعتزال على ما اعتقد والعودة من جديد.
• زول فرحان بأمير كمال .. تتوقعوا منو شنو؟
• عبدالحميد السعودي يمكن يرجع.
• سانتو.
• زيكو.
• احتمال.
• ما في حاجة بعيدة.
• ابوجيبين اتصور في استاد المريخ .. وقال المريخ سوف يلعب مباريات المجموعات في استاده.
• الكلام دا ما حصل.
• الموضوع طلع (صور) ساكت.
• ابوجيبين اتصور في المدينة الرياضية وقال المريخ سوف يلعب مباريات مرحلة المجموعات في المدينة الرياضية.
• وبرضو الكلام دا ما حصل.
• الموضوع طلع (صور) ساكت.
• ابوجيبين قال المريخ سوف يلعب في استاد الهلال.
• وما حصل.
• الزول دا في الصور والتصريحات خطير.
• كمان جابت ليها (زهور) في الصورة!!
• الناس ديل ما عندهم قروش .. وإلّا ما لجأ المريخ الى اسامة عطا المنان من اجل استلاف 150 الف دولار حتى فك الحجز على مستحقات المريخ عند الاتحاد الافريقي.
• 150 الف دولار ما عندكم .. طيب الفصاحة في شنو؟
• ابوجيبين على شنو؟
• والله عمليتك دي زول بجيب واحد ما بعملها.
• جيبين في الفاضي.
• على الاخوة الافاضل في قروبات المريخ النشيطة والفاعلة القيام بنفرة سريعة للإيفاء باستحقاقات التسجيلات.
• نفرة مستعجلة كدا.
• لقطوا حق التسجيلات.
• اصلا البرازيليين ديل ما اظن يكونوا عاوزين قروش كتيرة – ديل بالوعود ممكن يوقعوا.
• ما تتعبوا معاهم شديد.
• شابكننا السنة كلها .. المريخ يتعاقد مع اربعة برازيليين.
• المريخ يتجه للمدرسة البرازيلية.
• المريخ يرصد اربعة برازيليين بواسطة ريكاردو.
• ريكاردو يختار.
• ريكاردو يحدد.
• وفي النهاية وصلوا برازيليين ما عندهم علاقة بكورة القدم.
• وما عندهم علاقة بالبرازيل من الاساس.
• ديل جبتوهم لينا من وين؟
• اول مرة اشوف ناس المعاشات بتاعين البرازيل.
• واحد عمرو 30 سنة والتاني 31 سنة .. والبرازيليين في العالم كله معروفين بعتزلوا في هذه السن.
• بنزلوا معاش.
• ما بعمروا في الملاعب بعد الثلاثين.
• رونالدينو .. وربينيو .. وكاكا .. كلهم بعد سن الثلاثين ما بقدموا حاجة.
• عاوزين ماتيوس كوتيلو يقدم ليكم حاجة.
• كمان قالوا ماتيوس شهير بـ (ماتيوزينهو).
• يا زول.
• دا إلّا يلعب في عمود مزمل القاسم.
• اما البرازيلي سيرجيو رافائيل .. فهذا في صفحة القراء ما بيلعب .. وعلى ما اعتقد كدا يصرفوا النظر منو؟
• إلّا اذا.
• إلّا اذا ماذا؟
• إلّا اذا الوقت ضايّق على المريخ واجبرهم عامل الزمن على التسجيل من طرف … كما فعلوا مع امير كمال.
• الصيني لاعب المحور العصري طار من المريخ .. ليتجه المريخ الى لاعب برازيلي .. في حوش الخليفة عبدالله التعايشي ما بلعب.
• الخبر الجميل .. ان لجنة الاستئنافات قبلت استرحام الصيني وعادت الى الصواب بعد طلب المراجعة من قبل اللاعب ومن قبل الهلال.
• حيث تم تقليص العقوبة الى 4 شهور بدلا من 6 شهور لتنتهي في 18 فبرائر.
• الصيني جاهز.
• ينتظر ان يحظى اللاعب في اول تمرين للهلال بعد الراحة السلبية الى استقبال كبير من جماهير الهلال.
• الفرحة التى وجدها الصيني من جماهير الهلال على مواقع التواصل الاجتماعي تؤكد ان اللاعب سوف يجد استقبالا كبيرا من جماهير الهلال في اول تمرين للفريق.
• جمهور الهلال فاهم.
• وعارف.
• والصيني ان شاء الله سوف يكون اضافة كبيرة للهلال.
• الحمد لله ولدنا ورجع لينا.
• نرجع للمريخ .. ونقول تسجيلات المريخ اذا كانت بهذا المستوى .. بنقول ليكم سجلوا ساي.
• قشرة ما تعتر ليكم.
• الحمدلله الفيفا سمحت للمريخ بالتسجيل.
• هسع انتوا يا ناس المريخ دفعتوا ليكم قرابة 500 الف دولار عشان السيستم يفتح وتسجلوا ماتيوس وسيرجيو وصابون.
• كان احسن تخلوه مغلق.
• امل المريخ الوحيد بقى في مشاطيب الهلال.
• غير كدا ما عندهم حل.
• الزمن ضايق شديد.
• والحل في مشاطيب الهلال.
• عشان كدا ناس الهلال يكونوا مفتحين .. ما في لاعب من الهلال يطلع ساكت.
• ويطلع اللاعب المفروض يطلع.
• سدوا الطريق على المريخ.
• بالطريقة دي بنزلوا.
• لا ملعب.
• ولا تسجيلات كمان.
• المريخ عندما كان بدون مجلس كان احسن.
• كان افضل.
• معقولة بس .. ريكاردو جايب ليه (سمكرجية) من البرازيل عشان يلعبوا في المريخ.
• اول مرة اشوف لي برازيلي عاطل.
• نوع ديل في ميدان عقرب في احسن منهم.
• الموضوع ولا محتاج للبرازيل.
• ولا عاوز ليه جواز سفر.
• او زهرة واحدة.
• الزهور تطير عيشتها.
• الليلة قبلت على (الزهور).
• ……………..
متاريس
• الخبر الاكيد ان الهلال شغال على مواهب صغيرة من اجل المستقبل والحاضر.
• الهلال في هذه التسجيلات موعود بجارجو اخر.
• اصبروا انتوا بس.
• ربنا يكلل الخطوات بالنجاح.
• الناس ديل شغالين.
• ما تستعجلوا.
• الليلة ما عاوز اجيب سيرة (خ 910).
• ولا عاوز اقول أي كلمة.
• عشان الموضوع ما يكون ظاهر.
• نكتب قبل مباراة المنتخب .. نتمنى ان يكون المنتخب قد نجح بالخروج بنتيجة ايجابية امام المنتخب الغاني.
• معسكر الهلال في كيب تاون ح يكون في اجواء مثالية.
• ومعسكر المريخ في القاهرة ح يكون في برد يلخم.
• كتروا السيوترات.
• اعداد الهلال ينطلق داخليا.
• ينتظر ان يحظى نجوم التسجيلات باستقبال كبير وحار من جماهير الهلال.
• سليمان عز الله سوف يكون (مفاجأة).
• انتوا على موعد من الابداع كله.
• بكرة القمة المصرية التى تجمع بين الاهلي والزمالك في الدوري المصري.
• قمة مصرية تهم القمة السودانية.
• لا الزمالك ولا الاهلي في مستواهما.
• …………
• ترس اخير : نقوم نشوف باقى المباريات.