الوصيف خفيف خلونا في الدوري والاهلي!!

العمود الحر
عبدالعزيز المازري
الوصيف خفيف خلونا في الدوري والاهلي!!

*انا ماعارف الهلالاب ديل ناس كده، لا تعرف تتعجب من ردود افعالهم لا تعرف توافق عليها
*الهلال دا ليهو فترة زمنية اكثر من عامين عديل شغال يصقع ويطقع في المريخ دا شمال ويمين حتي نسينا انه ند للهلال
*ما الهلال براهو حتي الفرق الموريتانية شغالة فيهو فتك ومتك !!
*المريخ يعاني خلو يفرح شوية ..ياهلالاب عيب عليكم
*يعني هزيمة بنقص عددي واضح كده وحكم متحامل ومجامل زي دي والهلال لاعب تسعة قصاد حداشر من اهل الوصيف والحكم ال12 دي براها بالمناسبة محتاجة قعدة ومباركة
*عارف في ناس كده من الهلالاب يقول ليك ماعاوزين شماعة، هي شماعة شنو اكتر من كده
*اسه لو قلبنا الشغلة دي والمريخ كان ناقص تسعة موقفو كان بكون شنو امام نجوم الهلال مش كان اتفرتق عديل ولا امير كمال هرب وشرد بالكورة زي ما زيكو عمل واتكررت الفعلة الشنيعة ديك
*غايتو انا حمدت الله انو الطرد دا للهلال وفرصة نشوف مستر فلوران والناس المختلفة معاهو هل ينجح ولا لا
*فلوران أكون صادق دائما بطبز في التشكيلة الاولي وبحاول يعالج القصة في الشوط الثاني ومنها تكون البليلة خلصت والقصة انتهت
*فلوران ماقاعد يخاف يعني نقول مدرب شجاع لكن ما ممكن تكون الشجاعة بالصورة دي تقعد ناس ايبولا بره وتلعب ياسر صاحب التجربة الجديدة ولا تجازف بضيوف المبتعد عن المشاركة وكمان تزيد الطين بله بوجود بوغبا المصائب والعائد من إصابة
*اها براحة كده الموضوع دا مش ساهم في الهزيمة زاتا ..يعني نحنا فوتنا حقت مازيمبي تقوم تطلع لينا بهزيمة من عاشر الدوري المويتاني اللي هو لا وصيفنا لا بشبهنا لا مستوانا
*كمان السيد العليقي صاحب المشروع البابور جاز شغال يصرح ويوزع في الأموال قال ايه صرف كامل الاستحقاق ! يا اخي ماهي دي الشماعة زاتا اسه زي فلوران دا بصرفو ليهو خلي اللاعبين نقول هم عبد المأمور
*كدي خلينا من دا كلو رئيس نادي الوصيف نمر فرحان شديد خاااااااالص وانا عاذرو وانتو زاتو اعذرو هو ناس موريتانيا واتحادها وناسها عذروهو فريقو دا لو طلع عاشر الدوري الموريتاني كويس
*ضفاري حبيبنا وصديقنا قال الهلال فاقد ناقص تسعة لاعبين والمريخ ناقص دين وعقل لذلك لا عذر للهلال في الهزيمة ولا شماعة له
*ماعلينا المباراة دي انتهت بخيرها وشرها لكن قصة فلوران والبدايات الصاح واحترام الخصوم دي عاوزه ليها قعدة عديل
*اسه مع الأهلي الهلال دا لو لعب كورتو وتشكيلتو الصاح مافي مشكلة تاني لكن لو قعد ينظر فلوران تنظيراتو دي ..حتكون نهايتو الحتمية
*الهلالاب ديل فيهم حاجة عجيبة جداً، صفة كده (حقتهم)، يستحيل ان تقنعهم لو عملت السبعة وذمتها
*ما قدرت اعرف الحاجة دي تميز ولا حاجة أكبر من كده شوية يا ناس الهلال في ناس موافقة وما بتشوف غير فلوران وناس علي الجبهة الأخرى مقتنعة بفشل فلوران دا كلو هين البقنع العليقي منو!
*يستحيل ان يجتمعوا على رأي واحد، لكن عشقهم واحد هو لهذا المارد الأزرق
*من بعد مباراة القمة والهلالاب ما بين رأي يطالب ببقاء المدرب ومنحه الفرصة الكافية وعدم فرض أي تدخلات علي عمله رافضين حتي المساعد الوطني البديل لخالد ووجود أي وطني اخر في قطاع الكرة من قدامي اللاعبين علي ان يبقي الوضع كما هو عليه وعلي المتضرر ان يلجأ للصبر او يعتبر مهاجما ومعادي لمشروع العليقي ومجلس السوباط
*كلمة أخيرة…دائرة الهلال وخاصة الشفافية معدومة وقبول السلبيات ممنوع بخط دفاع فولاذي لا يقبل الا التطبيل
*اخر كلمة تقييم الوضع الحالي هو الأهم
كلمات حرة
*جماعة المشروع وفلوران دعونا نقيس الأمور بالمنطق ونتفق علي ان الصبر علي المدرب مفتاح النجاح, لكن يبقي السؤال المهم الاحتفاظ بالمدرب ومازالت الأخطاء متكررة ومحلك سر! الا يدعو ذلك لوجود خطب معين في الجهاز الفني ويجب ترميمه !
*التعليل بمشروع الهلال وهذه الأسطوانة التي مللنا سماعها كثيرا يدعو للدهشة اسمعوا من يختلف معكم وعالجوا السلبيات بدلا عن الإصرار الذي اضاعنا وأضاع دعم الفريق بتسجيلات وفقدنا اهم عناصر الهلال لاعب الوسط الفنان والخبرة ابوعاقلة
*في اغلب فرق العالم بل في مجملها يوجد مساعد اول وثاني للمدرب من أبناء الوطن والحالة التي يعيشها الهلال الحالي حالة فريدة
*كل هذا اقلق الكثيرون كون ان الامر الفني لا يراجع لأن رئيس القطاع الرياضي العليقي مهما قدم من مجهودات يشكر عليها ..هل لديه الدراية والمعرفة لمناقشة الجهاز الفني عن أسباب الخسارة من المريخ وهل لديهم المعرفة بالنقاش الفني مع الطاقم
* نجاح المشروع الذي يطبق في الهلال لأول مرة يحتاج لمساعدة ووجود وطنيين مقربين من الجهاز الفني واخرين في دائرة الاستشارة الفنية للتنوير والتبصير فحتي من حقهم ان يناقشوا غياب بعض النجوم والاستماع لتبريرات المدرب بدل ان يحكم المدرب علي لاعبين بالفشل والإصرار علي تكرار الاخطاء
*النقاش مع المدرب وتوصيل رؤية معينة من حق أبناء الهلال فلا يمكن ان نظل طول الخط متفرجين علي الجهاز الفني ونترك له الحبل يفعل ما يشاء حتي لو كان علي خطأ!
*تظل المطالبة بوجود استشارية فنية ومساعد وطني ومعد نفسي مع الهلال مطلب يمكن ان يفيد المشروع الذي تتعلون به لبناء الهلال
*الإدارة الذكية هلي التي تعرف موطن الداء وتقوم باستئصاله او منحه الترياق الشافي!
*كلمة حرة أخيرة …حالة فريدة يا عليقي!!
…
اخر الحكاية
نعمة أن بلّغك الله رمضان، فاشكره على ذلك، أن أطال في عمرك لتتمتع بالصيام والعبادة.