شِـلنَـا نَصِـيبنَا مِـن الفَـرَح (صقـرِيّة)

صَـابِنَّهَـا
محمد عبد الماجد

شِـلنَـا نَصِـيبنَا مِـن الفَـرَح (صقـرِيّة)

نحن تعوّدنا أن نمارس الفرح (خلسةً)، عندما نضحك أو نبتسم، بدون أن نشعر نجد أننا نخفي ابتسامتنا بـ«كُـم» الجلابية أو القميص، أو ننصرف بوجهنا في الاتّجاه المُعاكس عندما نضحك.
زي كأنه الفرحة عيب.
وإنت صغير لمن تمشي ليك حفلة لازم تمرق من البيت متخفياً ـ عيب أنك تحضر ليك حفلة.
لو في زول شافك في حفلة، بشيلوا حالك وبكلموا ليك أبوك.
نحن صعبين شوية.
لمن نشوف لينا زول بضحك، بنقول ليه يا زول إنت بتضحك مالك؟
ولمن نلقى لينا زول (ضحّاك) بنقول عليه قلبه ميِّت.
خليك جادِّي شوية.
الزول الحَـزين هو عندنا الزول العبقري والعَـارف كل شئ.
نحن الفرحَـة ممكن ترفع لينا الضغط وترفع لينا السُّكّري، يقولوا ليك جاتو صدمة سُكّري، عشان فرح شَـديد.
دخل في كومة سكري عشان اتصدم بالفرحة.
الباسطة ممكن تعمل ليك مشكلة عشان سكرها تقيل.
الحزن ما بعمل لينا أي حاجة.. مشكلتنا نحن مع (الفرح).
نحن لمن نأكل لينا حاجة حلوة بنشيل منها (قطعة) واحدة أو (لقمة) بنخاف جسمنا يزيد، ولمن يجيبوا لينا الشاي بنقول ملعقة واحدة بس، وعندما نشرب القهوة بنشربها سادة.
قطع ناشف.
وفي السخانة دي بنقفل الشُّبّاك والمروحة، والمكيف ما بنشغِّله إلا للضيوف.
ما بنشغِّله إلا في الشديد القوي.
وعندنا الزول البحب (الترطيبة) ما زول شغل ولا تنتظر منه فائدة.
دا زول بتاع ترطيبة ساكت.
نحن لمن نفرح دموعنا بتجري.
ولمن نضحك دموعنا بتجري.
الدموع ما بتفارقنا حتى في الفرح.
ويوم العيد من الصباح بنتذكّر الزول الغائب أو الزول المات.
نحن في الأحزان بنقيف زي الأسود ـ الحارّة ما عندنا معاها مشكلة.
لكن في كل الأحوال جباهنا عالية، وما بنعرف الانكسار حتى في أحلك الظروف.
سودانية جدّ.
محمد المكي إبراهيم وقع على بطاقتنا الشخصية بهذا القول:
قلبي لكم وعليكم..
وسواعدي ضد الشروط وضد احناء الجباه الفارعة..
وتذكروا إني أعود أمد صحراء الهروب شوارعا..
ومحمد طه القدال منحنا قوة العين التي نشمر بها عن ضرعاتنا:
وأقول غنوات في البلد
البسير جنياتها لي قدام
بقول غنوات في الولد البتل ضرعاتو
في العرضة
ويطير في الدارة صقرية
ولو السمحة تلت إيد
ومدت جيد يقوم شايلاه هاشمية
يشيل شبالو ختفة ريد
وفرحة عيد
وريدة روح
وحمرة عين وايديه
نحن وقت نقوم صعبين.. لا بنعرف نيجيريا ولا بنعرف السنغال.
عندنا رأي في المنتخب الإسباني ـ ممكن نعمل تحليل فني للمنتخب الإسباني نطلعهم كلهم ما بعرفوا كورة، ولا عندهم علاقة بيها.
غلبنا المنتخب المصري أربعة بعد أن تُوِّج ببطولة الأمم الأفريقية للمرة الثالثة على التوالي.
ما عندنا كبير.
المصريون قالوا الجماعة ديل قالوا لينا ح نديكم (سيارات)، أدونا (أربعة).
أبعدنا جنوب أفريقيا من التصفيات وحرمناها من الوصول لنهائيات الأمم الأفريقية، ثم جاء منتخب جنوب أفريقيا في بطولة الأمم الأفريقية بعد ذلك، وأخرج المنتخب المصري في أرضه ووسط جمهوره من دور الـ16 في نهائيات بطولة الأمم الأفريقية.
نحن في تصفيات “الكان” الأخيرة، أخرجنا منتخب غانا وتأهّــلنا للنهائيات على حسابه.
لا عندنا دوري ولا عندنا ملعب، ولا عندنا استقرار.
منتخبنا بيلعب برّه وبغلب وبتصدر.
والهلال بيلعب في الدوري الموريتاني وبفوز بالدوري.
نحن صعبين.
نحن شُفوت.
ما عندنا أي حاجة.
لكن عندنا كل شئ.
عندنا منتخب مُحترم ـ عندنا الهلال وعندنا المريخ، عندنا الزمالة أم روابة، والأهلي مدني والرابطة كوستي وهلال كريمة والسهم الدامر.
عندنا كورة.
منتخب بيلعب بدون معسكر وبدون مباريات تجريبية، دخلنا البطولة بتمرين واحد أو اثنين.
وفعلنا كل ذلك.
نحن كان قمنا صعبين، ما بنتفاهم، لا بنعرف البرازيل ولا بنعرف الأرجنتين.
الكورة لو أنصفتنا لو لعبنا بدون إعداد وبدون مباريات تجريبية بنعمل العجب.
بنسوِّي الهوائل.
ولا بتفرق معانا ـ الأربعة عندنا زي الواحد، وضربة الجزاء عندنا أسهل من الكورنر.
نحن لو قمنا ما بنتفاهم ـ القوون الرابع روفا بقى يجيبو قبل الثالث.
قادر الله.
وعشان المريخاب ما يزعلوا ونحن في حضرة الوطن، نقول ليهم موسى كانتي عنده عكسيات زي حلاوة ماكنتوش، قدر ما تشيل منها حبة تكون طمعان في الحبة التانية.
كانتي عكسيته لو ما لقت ليها مهاجم زميل، بسجِّل منها المدافع هدفاً عكسياً.
هدف عكسي من عكسية كانتي ـ برضو فهم راقي.
برضو نظام عال.
والي الدين خضر (بوغبا) أثبت أنه صاحب أعلى معدل (كنترول) في الكرة السودانية ما شاء الله عليه.
أعتقد أنّ بوغبا بالع ليه جهاز تنقيب عن الذهب.
وأعتقد أن هذا الجهاز الذي بلعه بوغبا نزل في قدمه اليمين.
قادر الله.
وقبل ديل يستحق كواسي أبياه ـ الاحترام والتقدير والحب.
أهم حاجة في كواسي أبياه أنه مدرب مُـوفّـقٌ مع المنتخب
المدرب المحترم (نعمة).
أهم ميزة في المدرب، قبل أي شئ أن يكون (مُحترماً).
وكواسي أبياه مدرب مُحترم جداً.. بعرف يضع التشكيلة الصاح وبعرف يلعب بالخطة الصاح، وبعرف يفوز في كل الظروف، وما عنده مشكلة يغيب رمضان عجب يجيب ياسر جوباك، يغيب الغربال يجيب علي عبد الله كبه، ولا فارقة معاه.
منتخبنا أصبح ينتصر بدون أي مُسبّبات.
ما عاوزين أي مبررات ـ المنتخب بفوز في كل الظروف.
نعترف نحن في الإعلام، إننا نتجاوز المنتخب ولا نعطيه حقه، وعندما نكتب عنه نُجبر على ذلك.
حتى الجمهور، علاقته مع المنتخب علاقة (انتصار).
ليس الإعلام وحده ـ الجمهور أيضاً مقصر في حق المنتخب.
في الهزيمة كلنا بنقعد ننظر ـ نحن ما قُلنا، ونحن ما حذّرنا، وعاوزين تمشوا وين بي فريقكم دا؟ ولمن المنتخب ينتصر نبقى أسيادها.
هذه حقيقة لا ننكرها ـ عندما ينتصر منتخبنا نشيل (بستلتنا) ونمشي على تكية الفرح.
الواحد بدون ما يشعر بيلقى نفسه مشى على (الطابونة) عشان يجيب ليه رغيف.
والرغيف الحار دائماً بيصل البيت ناقص النص.
اشتقنا لطقطقة (الكمساري)، بتحاول تتطارشه وتعمل فيها ما سامع وهو يطقطق ليك، وقت الطقطقة تكتر، الزول القاعد جنبك (بيلكدك)، تقوم تمد ليه القروش وتقول ليه خمسة.
أربعة في الحافلة بضحكوا لي هنا.
اشتقنا ننسى الباقي عند الكمساري، لمن هواء كوبري المنشية يضربك.
اشتقنا لاستاد الهلال أي زول تلاقيه بعرفك، كأنه بيناتكم قرابة، بدون مقدمات تتكلّموا عن التشكيلة وعن المباراة الفاتت وعن الحكم، وعن ضربة جزاء، الحكم لم يحتسبها لينا.
اشتقنا لفول النوش، لمن تلقى ليك صندوق بيبسي تقعد فيه زي كأنك لقيت مقعدك في الطيارة.
اشتقنا لميدان الخليفة، وليالي المولد في أم درمان، وشارع العرضة.
اشتقنا للسوق العربي، إنت ماشي جوار الجامع الكبير، تلاقي زول ليك منه عشر سنوات.
يا زول وين إنت؟
اشتقنا للمحطة الوسطى بحري، تشتري ليك فول سوداني وتبقى مارق.
اشتقنا لشارع النيل الخرطوم ـ النيل قادرٌ أن يغسل كل الأحزان، تمرق منه كأنك طالع من صالون حلاقة.
زول جديد و(مفرفش).
عندما ينتصر المنتخب بنفتح باب الديوان، ونقعد نتغالط في الهدف الرابع.
الهدف الرابع دائماً هدف غلاط، في الدافوري لمن يسجلوا الهدف الرابع بتحصل مشكلة.
وسيد الكورة لو كان مغلوب بشيل الكورة ويفوت.
روفا وقّع في كشوفات المريخ مرتين ـ زي الخميس البقع عطلة مع الجمعة.
ثم وقّع روفا في كشوفات الهلال مجدداً عقده مع الهلال ثلاث سنوات، يُقال اربع لضرورة القافية.
ثم وقّع روفا في شباك المنتخب النيجيري أيضاً مرتين.
علاقة المريخ بالمنتخب النيجيري شنو؟
عشان روفا يسجِّل في كل شبكة مرتين.
وعشان في المباراتين روفا يعمل جدل وضجة في الهدف الرابع.
الهدف الرابع بحسم كل شئ.
انتهت.
يا دوب لقيت لي عذر لـ«علي الجمل».
الجمل ما غلطان ـ الهدف الرابع بتسجل في أفضل المنتخبات.
أتوقّع بعد خروج المنتخب النيجيري بالأربعة، أن يعفوا الجهاز الفني للمنتخب النيجيري.
ويشيلوا الجهاز الإداري للمنتخب النيجيري.
والجكومي بتاع المنتخب النيجيري يعمل مشكلة ويرشح نفسه لرئاسة اتحاد الكرة النيجيري.
بعيداً عن ذلك، أعتقد الإضافة الحقيقيّة التي قدّمتها بطولة “الشان” هي مُشاركة عناصر صغيرة مع المنتخب السوداني مثل طبنجة وموسى كانتي وياسر جوباك ومازن سيمبو وعلي عبد الله كبه ومازن فضل ـ هذه عناصر شابّـة يمكن أن تلعب للمنتخب عشر سنوات قادمة.
بطولة “الشان” منحتنا الثقة في أنّ المنتخب في بطولة “الكان” يُمكن أن يفعل الكثير في وجود كرشوم وأبوعاقلة وكوكو والجزولي وعودة الغربال وإرنق ومويس.
الأمر الغريب أنّ لاعبي الهلال تعرّضوا في هذا الموسم لأكبر عملية استهلاك، مع ذلك أجادوا وأحسنوا وأبدعوا.
في مباراة المنتخب الأولى أمام الكونغو شارك في تشكيلة المنتخب الأساسية 8 لاعبين من الهلال، وفي المباراة الثانية أمام نيجيريا شارك في تشكيلة المنتخب الأساسية 7 لاعبين من الهلال ـ هؤلاء اللاعبون شاركوا مع الهلال في الدوري الموريتاني وشاركوا مع الهلال في الدوري السوداني ولعبوا نهائي كأس السودان أمام التقدُّم بورتسودان بعد انسحاب المريخ، وخاضوا مع الهلال مباريات دوري أبطال أفريقيا (12) مباراة، وقبل ذلك شاركوا في سيكافا مع الهلال، إلى جانب ذلك فإنّ أغلبهم لعب مع المنتخب تصفيات “الشان” وتصفيات “الكان” وتصفيات كأس العالم وتنتظرهم بقية تصفيات كأس العالم وتصفيات كأس العرب، إلى جانب نهائيات “الكان” وربما نهائيات كأس العرب، إضافةً إلى مشاركتهم مع الهلال في الموسم الجديد في سيكافا ودوري أبطال أفريقيا والدوري المحلي، هذه وضعية يمكن أن تكون شاقّـة وصعبة على العناصر الوطنية في الهلال، ويمكن أن يُعرِّضهم الإرهاق والضغوط إلى الاستهلاك والإصابات، لذلك على الهلال أن يتّجه لراحة عناصره الوطنية التي تلعب للمنتخب ولو لمدة أسبوع أو عشرة أيام، ويُفضّل أن يُشارك الهلال في سيكافا بدون عناصره الوطنية التي شاركت مع المنتخب في “الشان” من أجل الحفاظ عليهم، وحتى يدخلوا للموسم الجديد بعد أن يكونوا نالوا قسطاً من الراحة.
بطولة سيكافا يمكن للهلال أن يشارك فيها بالمحترفين ونجوم التسجيلات الجدد، إلى جانب بقية العناصر الشابة في الهلال، على أن يتم إبعاد تسعة أو عشرة لاعبين من لاعبي الهلال الذين شاركوا بصورة مستمرة في المنتخب في بطولة “الشان”، خاصةً أنّ فرص المنتخب السوداني في التقدم ببطولة “الشان” بفضل الله أصبحت كبيرة.
العناصر الوطنية في الهلال والتي شَـاركت مع المنتخب في بطولة “الشان” في حاجة للراحة حفاظاً عليها من أجل الاستفادة منها في البطولات القارية القادمة.
أجانب الهلال لم يشاركوا مع منتخبات بلادهم في بطولة “الشان”، ولم يشارك منهم غير ثلاثة مع الهلال في الدوري السوداني، وحتى ذلك كان في آخر ثلاث جولات ـ لذلك على الهلال أن يعتمد على عناصره الأجنبية في بطولة سيكافا.
…
متاريس
صلاح عادل مع الهلال ومع المنتخب يقدم في أفضل مستوياته منذ أن انضم للهلال.
وبوغبا وصل إلى قمة مستواه وأصبح لاعباً لا غنىً عنه لا في الهلال ولا في المنتخب ـ بوغبا نسيج وحده.
أما روفا، فقد أصبح حكاية ـ عليكم الله شوفوا لينا قصة روفا مع الهدف الرابع شنو؟
روفا كان نجم مباراة القمة الأخيرة بعد أن سجّل مرتين.
وفي بطولة “الشان” كان رجل المباراة أمام الكونغو وأمام نيجيريا، وهو الآن هداف المنتخب.
سجّل بالشمال وسجّل باليمين في شباك النسور، والهدف العكسي يفترض أن يُحسب له لأنّ مدافع المنتخب النيجيري سجّل من كرة لعبها روفا وصدها القائم.
ما شاء الله على لاعبي المنتخب وربنا يحميهم من الإصابات.
شكرا محمد النور ابوجا ـ شكرا الطيب عبدالرازق.
…
ترس أخير: ربنا يغطِّيهم ويحميهم وينصـرهم في كل المُـباريات إن شاء الله.