بالدارجي الفاضح…يعني نحب ليكم الدعم السريع؟
بالدارجي الفاضح…يعني نحب ليكم الدعم السريع؟
* أي زول بحاول يتعاطف مع الدعم السريع، أكيد ده زول ما قعد في السودان ولا شاف البشر ديل بعملوا في شنو؟.. عشان كده بجيك متفلهم وطواالي يقوم يحشر الكيزان ويلف ويدور، وكل مرة نقيف ونحاول نتكلم من زاوية تصرفات وسلوك، ونحاول نختصر الفكرة كلها في نطاق السلوك الإنساني..وسلوكك كفرد هو البحدد نظرة الناس ليك، وهل بحبوك والا بكرهوك؟، ونحن بنكره الدعم السريع عشان عمايلهم،.. ماخلوا موبقة وجريمة ما إرتكبوها في حق الشعب السوداني.. نحبهم يعني؟
– أكيد حا نكره ميتينهم ذاتو، ونكره أي زول يتعاطف معاهم والعدوان معلن مع أي زول متحالف معاهم.. تأسيس والا غير تأسيس..!
– يا ناس.. الدعم السريع محل ما سيطر بدل ما يكسب المواطنين العاديين ويكون في خدمتهم وتأمينهم زي ما بعمل أي زول سوي وعايز يجيب الديمغراتية، لكن أول حاجة بعملوها بقتحموا بيوت الأسر ويغتصبوا البنات ويسرقوا العربات وتحت التهديد والسلاح ينهبوا كل الممتلكات (قروش، دهب، بهائم) وأي حاجة بتعجبهم في البيت بشيلوها، ولو فتحت خشمك راس مالك طلقة واحدة وتسكت للأبد.
– أي قرية سمعت الناس ديل دخلوها أول حاجة بتحصل الناس بتنزح منها لي أقرب منطقة تحت سيطرة الجيش، وده الشيء المعتاد في التلات سنوات الفاتت ومافي زول بقدر يغالط فيها، صحيح بجوك كم نفر يقول ليك: نحن ناس محاربة الظواهر السالبة، ونحن ناس الشرطة العسكرية، لكن في النهاية إنت قاعد في مناطق سيطرة الدعم السريع ما حاتكون آمن.
– الناس بتفتش للسترة، عشان كده مافي زول بتكلم عن الإغتصابات، لكن في مئات من حالات الإغتصاب للقاصرات، خاصة بين النازحين من شمال كردفان وفي ضحايا وصلن الجزيرة ووضعن بدون ما يقابلوا دكتور أو ترصدهم منظمات أو يتلقوا أي دعم نفسي والنتيجة شنو؟.. أكيد أشباح بشر تأكل وتشرب بدون ما تعرف أي معنى للحياة..!
– كل المناطق المسيطر عليها الدعم السريع الآن خالية من الحياة المدنية الآمنة والمظاهر السلمية، وترتكب فيها الجرائم الخارقة والغريبة على الأخلاق والدين والأدب والذوق، لكن الغرابة وين؟.. لما يجي واحد يبذل مجهود كبير عشان يقنعنا بي إنو الجيش زي الدعم السريع، وإنو لما يدخل مكان بعمل نفس الحاجات.. ديل كذابين ومنافقين.
– الجيش لما يحرر منطقة الناس بتستقبلو بالزغاريد والهتافات والمسيرات، وما يفضل زول جوة البيوت، أطفال، نسوان، عجائز، إحتياجات خاصة وأي زول بطلع بالحاجة العندو عشان يكرم الضيوف من رجال الجيش ويعبر عن فرحتو عشان الكابوس انتهى.. وهم في اللحظات ديك لا بعرفوا كيزان ولا قحاتة..!!
– الموضوع ده من الأول واضح.. أي مشروع لبنيان السودان مستقبلاً لازم يبدأ من نهاية الدعم السريع.. وبعدين نشوف الحايحكمنا منو؟
– أول زول حايندم علي التحالف مع الجنجويد هم أعضاء تأسيس كلهم بدون فرز.. حاتجي اللحظة البنشوف فيها الدموع.. لأنو قيادات الدعم السريع ما عاهدوا عهداً حفظوه وصانوه..!!
أبوعاقله أماسا
