البولِـيس السِّـرِّي
صَـابِنَّهَـا
محمد عبد الماجد
البولِـيس السِّـرِّي
قلت لمُحدِّثي وهو (بجغم) في شاي اللبن من كباية شب كبيرة، عندما (يجغم) منها يحتاج إلى أن (يشب) لها ويشمِّر عن سواعده، مُكفكاً أكمام جلبابه، ومحدرا طاقيته، ثم يُكرِّس كل قوته في شطف (جغمة) شاي كبيرة، والجغم جاء من هنا ـ جاء من الشاي، و(الجغمة) الله يطراكم بالخير، تحديد عفوي لوزن الشئ الذي تم جغمه، يقال أديني (جغمة) موية، وجغمة غير لقمة، لأن الجغم يكون لسائل أو لمشروب، واللقمة من الطعام، وفي الجغم صوتٌ، إذن هو شئٌ له حسيس، حليل أيام زمان كان (الجغم) فقط في الشاي!! قلت ليه عشان ما أنسى واطلع من الموضوع، إنت عارف أنا ما خايف من (البوليس) في حد ذاته، أنا خايف من (البوليس السري)، وضع كباية شاي اللبن، وقصد أن يمنحني إحساساً بانتباهه لي، بل بدهشته، لأن عيونه اتّسعت عن قصد، وحواجبه ارتفعت بمبالغة واضحة، حتى إني تلفت خلفي وقلت في شنو؟ قد يكون هنالك (أسدٌ) ظهر فجأةً أو (مُسيّرة) أُطلقت بصورة عشوائية.. قال لي (البوليس السري) شنو؟ الهلال سوف يلعب مع البوليس الكيني، البوليس السري دا جبتو من وين؟ غايتو إنتوا يا إعلام الهلال عندكم جنس حاجات، إنتوا عاوزين تدونا إحساس أن الموضوع فيه (مخابرات)، ورأفت الهجان واللواء الأبيض، قلت في نفسي لماذا اللواء الأبيض وهي حركة (ثورية) وحركة حملت السلاح ضد المستعمر، واللون الأبيض هو لون السلام والصفاء والحوار، لماذا لم يطلقوا عليها ثورة اللواء الأحمر أو اللواء (الكريمي) باقي الأيامات دي مع التمهيدي دا في لون كريمي جديد ظهر، أجبت على نفسي، وقلت أكيد أعضاء ثورة اللواء الأبيض ديل هلالاب من يومهم، رغم أنهم سبقوا نشأة الهلال، لكن عظمة الهلال تتمثل في أنّ بعض من أسّسوا الهلال هم أنفسهم من أسّسوا اللواء الأبيض، عشان كدا نحن بنقول أو في الحقيقة التاريخ هو البقول إنّ الهلال هو نادي الحركة الوطنية، والهلال 1930م مثلما إرتبط أسمه بنادي الخريجين 1938م، كانت بذرة تكوينه كذلك قد غُرست سلفاً في اللواء الأبيض 1924م، شوفوا العظمة دي، أي حاجة عندها علاقة بالوطن سوف تجدوا الهلال من المؤسسين لها، بما في ذلك الجمعية التأسيسية، والنيل الأبيض والنيل الأزرق، لذلك فإنّ أجنة التكوين والنشأة واللون انعكست تلقائيا على الهلال في كل خطواته وتحركاته ويظهر ذلك في كل شئ قومي ووطني، بما في ذلك المنتخب الوطني، فهو من طبيعة حاله أن تجد في الغالب (8) في تشكيلته الأساسية من الهلال، خاصّةً إذا كانت المباراة مهمة وفاصلة ومؤثرة.. وكفى أنّ (في الفؤاد ترعاه العناية، بين ضلوعي الوطن العزيز)، كتب كلماتها الشاعر يوسف مصطفى التني وهو ايضا كتب (يا غريب يلا لي بلدك) وهو أحد مؤسسي نادي الخريجين، وأحد مؤسسي الهلال، وقد سبق الهلال نادي الخريجين وكان التني بعد الاستقلال هو أول سفير للسودان في جمهورية مصر العربية على ما إعتقد، وقد عمل في الصحافة وكان أحد كوادر حزب الأمة.
وبما أنّ الحديث جاء عن نادي الحركة الوطنية ونادي الخريجين، فإني أُحيِّي الأستاذ خالد عزالدين الذي يكتب لنا هذه الأيام عن أدب النشأة وعن وطن الهلال، ونرجو أن يواصل في كتابة هذا التاريخ الذي ينضح بالوطنية والكرامة والعزة والشرف.. وهذا تاريخٌ مُشرفٌ يجعلنا دائماً الأعلى أعناقاً بين الأندية.
أعود إلى مُحدِّثي الذي قلت لكم إنه قاعد يشرب ليه في شاي لبن باستمتاع ظاهر، وكأنه بسمع في محمد الأمين، وكان استمتاعه بذلك يصل حَـدّ الخيلاء، قلت ليه البوليس السري إنت عارفو منو؟
وضع كباية الشاي، وبدا لي أنه عاوز يغلق الشباك عشان اتكلم ليه براحتي، قلت ليه لا أقعد، البوليس السري دا هو المريخ، إنتوا يا هلالاب فاكرين الهلال دا سوف يلعب في التمهيدي الثاني فقط مع البوليس الكيني، الهلال سوف يلعب أيضاً مع المريخ (البوليس السري).
زولكم أبعد كباية شاي اللبن بعيداً وشبّح عيونه متل عيون التومة بنت جضل وقت تجيب ليها سمك من السوق، الحلة كلها تعرف، ثم شهق شهقة مصطنعة، وقال لي كيف الكلام دا، عندك معلومات؟
وأنا كنت أعرف أنّ مُحدِّثي عنده ولهٌ بالمعلومات، ومن أجل معلومة جديدة ممكن يعمل أي حاجة وممكن يخلي الشاي البيشرب فيه دا.. لذلك قلت ليه جيب الشاي دا، وبدأت عملية (جغم) مُمنهج ومدروس ،ومركز في الشاي، حيث إنني قصدت عندما انتهي من كلامي وأعرض معلوماتي أكون قد خلصت شاي اللبن، وكنت أضع خطة تناسبية توافق بين الانتهاء من حديثي والانتهاء من شاي اللبن، في وقتٍ واحدٍ، وفي بالي أنّ كباية الشاي كبيرة، لذلك لا بد من حيث التناسق والتناسب أن أجرجر في الكلام وأمط في المعلومات التي أعرضها بقدر الإمكان.
قلت ليه ناس المريخ فريقهم طلع من التمهيدي الأول، الناس ديل كرامتهم ما بترجع إلا إذا لحق بهم الهلال لا قدر الله وخرج من التمهيدي الثاني.. بقول في كلامي هذا، وأنا بشرب في الشاي وبعمل صوت في الجغم و(حشرجة) لتبيين وتوضيح أهمية المعلومات التي أقدمها.
ثم أضفت، الناس ديل هسه موش بطّلوا كورة، وتفرغوا للجان العضوية، وقنعوا من خيراً فيها، الناس ديل أول ما الهلال يخرج لا قدر الله، الروح بترجع ليهم، وبقعدوا تاني يتحدثوا ويتفاصحوا ويمدوا لسانهم.. ديل لو خرج الهلال لا قدر الله بعملوا من الموضوع دا بطولة.
الناس ديل في الموسم الماضي انتظروا الهلال يخرج من التمهيدي الأول ـ الهلال ما خرج.
انتظروه يخرج من التمهيدي الثاني ـ الهلال ما خرج.
إنتظروه يخسر في الدوري الموريتاني ففاز به.
عشموا في النخبة ففاز الهلال بالدوري السوداني.
انتظروه قبل ذلك يخرج من المجموعات ـ الهلال ما خرج وتصدّر مجموعته كمان.
وعندما خرج الهلال من ربع النهائي قعدوا يتفاصحوا ونسوا أنهم طلعوا من التمهيدي.
السنة دي ح يقعدوا يبارونا كدا من دور لي دور.
بس السنة دي إن شاء الله ح تطولوا، لأنّنا ح نصل إن شاء الله النهائي ونقاتل من أجل اللقب ونسأل الله أن نفوز به.
عاوز أضع كباية الشاي شوية في التربيزة كنوع من الاستعراض الذوقي، والخروج لفاصل إعلاني، ولكن تذكّرت أنّ معلوماتي لن تسعفني حتى أكمل كباية الشاي ـ قلت ليكم الكباية كبيرة.. لذلك قرّرت المواصلة في شرب الشاي تزامناً مع استعراض المعلومات.
قال لي لكن ناس المريخ علاقتهم شنو بالبوليس الكيني؟ ما بقدروا يعملوا حاجة، قلت ليه علاقتهم (سرية)، ما ح تكون واضحة، الجماعة ديل (لابدين)، أول ما تتعثّر لا قدر الله بطلعوا وبنتشروا على مواقع التواصل الاجتماعي ـ هسع هم مختفين، لكن مختفين بي فهم!
قال لي كيف يعني؟
جغمت لي جغمة كبيرة من الشاي لأني شعرت أنّ الموضوع عاوز ليه اجتهاد مني، فأستمديت بعض القوة من (الجغمة) وقعدت أشرح.
قلت ليه، شوف الناس ديل أكيد أمنياتهم ودعواتهم وفي الحقيقة مصالحهم أيضاً في خروج الهلال، عشان على الأقل يرتاحوا من موضوع التمهيدي دا، وعشان الهلال يبقى مثلهم قاعد في البيت، والاتنين نقعد نفتش لينا دوري لله يا محسنين.
شعرت ليك بأن زولي بدأ يفهمني، وفي ذلك خطورة على الشاي، عشان كدا قلت أحسن أتعمّق في الفكرة واتفلسف شوية.
قلت ليه زمان كان الناس واضحة، ما كان في حاجة سرية، الما بدورك بوريك عديل كدا ما بقعد يلبد ليك وينتظرك تقع.
من شدة وضوح الناس، زمان البوليس السري، بتلقاه كاتب في باب بيتهم (بوليس سري)، الأشياء كانت واضحة والشفافية عالية.. هسع صاحبك ودفعتك بكون (بوليس سري)، وانت ما عارف.
قال لي أي والله ـ كلامك كله صاح، أصلو ما بتقول حاجة غلط.
الحبيب أحمد محمد أحمد وهو من أقوى أقلام المريخ ومن أكثرها صدقاً، زمان كان واضح مع الجميع وقال (ما بنطير برانا)، الطريف أنهم طاروا براهم، وقد ظلوا على هذا الحال مُشغِّلين (وضع الطيران) إلى يومنا هذا، هم يطيروا ونحن نصعد ـ هم يطيروا ونحن نصعد والساقية لسه مدورة، هذا الفهم الذي أعلن عنه الزميل أحمد محمد أحمد هو يعبر تماماً عن المريخ، وأكيد هم الآن بتابعوا في النشرة الجوية وحركة الطيران في انتظار طيران الهلال لا قدر الله.
لذلك على الهلال أن يعمل حسابه ـ حصِّنوا فريقكم بالدعوات، عشان في دعوات معاكسة بتتمنى لا قدر الله خروج الهلال، ركِّزوا في المباراة وادعموا الفريق بالدعوات، واعلموا أنّ الهلال لا يلعب فقط أمام البوليس الكيني وحده!
قلت ليه وقعت ليك؟ قال لي بلحيل، كلامك كله صحيح، أصلو ما بتقول حاجة غلط، صادف كلامه هذا آخر جغمة في كباية الشاي جغمتها ووضعت الكباية وأنا شاعر إنِّي أنجزت، وقلت ليه نحن أي حاجة عندنا بي نظام.
نحن ما عندما حاجة ساكت ـ كله بالمسطرة.
كله بالمقاس.
نظر هو إلى كباية الشاي متحسراً وهي فاضية، بعد أن انتبه مؤخراً لها، محاولاً أن يلطف الجو ويؤكد أن روحه رياضية، قال لي: عليك الله الشاي دا كيف؟
قلت ليه كويس بس سُكرهُ خفيف.
شعرت بيه يقول لي طيب لو سُكرهُ مظبوط أو زيادة كنت عملت شنو؟ الكباية كان ما ح ترجع.
ضحكت وطبطبت على كتفه وبقيت مارق.
وعشان إنتوا يقع ليكم الفهم دا وتستوعبوا حكاية البوليس السري ـ جبت ليكم الشاي وطبّقت ليكم النظرية عشان الموضوع يقع ليكم.
البوليس السري شغال كدا.
المشكلة بعد الشرح دا وبعد الشاي دا كلو ـ ح تلقى واحد في التعليقات يقول ليك المريخ علاقته شنو بالموضوع؟
يعني تاني ابدأ من جديد؟
يا جماعة زمن المباشرة في علاقات الأشياء ببعضها البعض انتهى ـ زمان الفيتوري قال ليكم (والغافل من ظن الأشياء هي الأشياء)، إذا الكلام دا وقع لينا ح نفهم الدنيا صاح.
وعشان نوسع الدائرة.. الدعم السريع ما الدعم السريع، وحميدتي ما حميدتي، حتى لو كان حياً يُرزق.. وأقول ليكم أكتر من كدا الحكومة ذاتها ما حكومة، عشان ترتاحوا، وحمى الضنك ما حمى الضنك.
الموضوع أكبر من كدا وإنتوا فاكرين الحرب على السودان بالمسيرات.
الحرب على السودان هي في فهمكم دا الذي يساعد على زعزعة الاستقرار والأمن، وإشاعة الفوضى وتعطيل القوانين.
الحرب على السودان في تفكيك أراضيه وضرب وحدته وكل ساعة حرب نحن بنرجع 10 سنوات للوراء.
الكلام دا كبير، أحسن نخليكم في كورتكم، لمن تبقوا عليه بنشرحوا ليكم.
إنتوا فاكرنها لعب وشاي لبن.
في ناس فاكرين لو أنهم دكوا الكوتشينة ووزعوا من جديد بحلوا المشكلة.
وفي ناس فاكرين أنهم طالما (الجوكر) في إيدهم ما عندهم مشكلة.
والجوكر (بايظ)!!
وقعت ليكم؟
الموضوع أكبر من كدا ـ وإن لم نصل لدرجة عالية من الوعي سوف نظل ندور حول الأزمة بدون حل.
شفتوا موضوع البوليس السري وصلنا وين؟
ونحن أي حاجة عندنا بي نظام ـ حتى موضوع البوليس السري دا.
قلت ليكم الموضوع أكبر من كدا ـ اختزلتوه لي ساكت في كباية شاي اللبن.
القصة ما شاي لبن.
والله يحفظ السودان من أبنائه قبل أعدائه، ومن الذين مازالوا يظنون أن المشكلة في (الحل).
….
متاريس
المسيرات في الفقه العسكري هي لزعزعة الأمن ولضرب الاستقرار وليس المنشآت، علينا أن نفهم ذلك ونستوعبه حتى لا تكون جزءاً من زعزعة استقرار البلاد.
المسيرات هي سلاح نفسي وليس عيني.
العودة للعاصمة الخرطوم يجب أن تكون بعودة النشاط الرياضي وعودة الجرائد والمسرح والكهرباء والماء، حتى تعود الحياة إلى طبيعتها.
بس علينا أن نعرف أَنّ الكهرباء تأتي بعد ذلك ـ أعيدوا الحياة إلى الملاعب والمسارح ودُور النشر أولاً.. الكهرباء بترجع تلقائياً.
نحن عاوزين أي حاجة ترجع كيف إذا نحن ذاتو ما رجعنا؟
أرجعوا أولاً.
أعيدوا بناء الوطن بالعلم والثقافة والأدب والرياضة، الجهل يولد الفقر والمرض والحرب.
ووقت الحساب قرّب، وبالورقة والقلم.
بكرة الهلال يلعب في نيروبي، وانتصار الهلال إن شاء الله بكرة سوف يكون كبيراً.
شفتوا ليكم قوة عين أكتر من كدا؟
هي ما قوة عين.
هي ثقة.
ثقة والله.
الهلال قادر بإذن الله أن يحسم التأهل من بكرة.
يقولوا ليكم الكلام ألف مرة.
قولوا إن شاء الله.
عشان تقع ليكم خدمة العضوية الإلكترونية بالإنتساب دي حاجة زي هدف روفا الرابع.
يا ربي ناس المريخ ح يقلدوا الفكرة دي بعد كم يوم؟
ديل لسه معلقين في اللون (الكريمي) ، فاكرنه جدعة جديدة.
….
ترس أخير: الحِسَــاب قِــدّام.