قِــرَايَـة المسَــاء مَـا بتدخِّلكُـم المَجْمُـوعَــات
صَـابِنَّهَـا
محمد عبد الماجد
قِــرَايَـة المسَــاء مَـا بتدخِّلكُـم المَجْمُـوعَــات
المجموعات دي في الكورة بتعادل في كليات الجامعة (كلية الطب).
إنت في المجموعات يعني إنت بتقرأ طِـــب.
زمان أي طفل تسألوا لمن تكبر عاوز تبقى شنو؟ بدون ما يتلفت بقول ليك عاوز أبقى (دكتور)، والطفل المفلهم شوية وبقرأ مجلة ماجد والصبيان بقول ليك عاوز أبقى (طبيب)، رغم إنّه يخاف من (الحقنة)، وقد يكون أهله يخوِّفوه بالدكتور والبعاتي، وما في علاقة بين الطبيب والبعاتي، مع ذلك عندما تسأل أي طفل، لامن تكبر عاوز تبقى شنو؟ طوالي بقول ليك (طبيب).
علمياً كدا ـ هل نحن بنحب الأشياء التي نخشاها؟ نحب ما نخاف منه.
الهلال في كل سنة بقى يدخل كلية الطب، للمرة السابعة على التوالي وبدون دوري وبدون ملعب، بنتأهل، وجماعتنا ديل بطلعوا من (التمهيدي).
الشئ العجيب، الهلال دا قبل الحرب بيصل المجموعات، في الحرب بيصل المجموعات، بعد الحرب بيصل المجموعات.
إنتوا يا ناس الهلال الحرب ما تثبِّتكم.
لا دمار، لا خراب، لا مُسيّرات، لا شفشفة، لا جغم، لا بل بس قدر علينا.
قطار الهلال لا يتوقّف.
في السلم والحرب بنصل مرحلة المجموعات (مغمضين).
ما شاء الله ما في حاجة بتثبِّت الهلال، يلعب في استاده، يلعب بجمهور، أو بدون جمهور، برضو بيصل المجموعات.
ضربنا الأهلي المصري في استادنا بثلاثية (الما بريدك في الضلمة بجغمك).
وضربنا الأهلي في استادنا بهدف (شمسون) الجبار.
في المساء وفي العصر ـ الأهلي المصري تعيش إنت.
في الأولى، الأهلي قال أرهبوه، وفي التانية قال الشمس.
ليليبو، أصبح نهاريبو.
ونحن أي حاجة عندنا بي نظام.
أي حاجة بنقصدها.
ما عندنا حاجة بتجي صدفة ساكت.
نلعب جوّه البلد نتأهّل، في جنوب السودان نتأهّل، في موريتانيا نتأهّل، في تنزانيا نتأهّل، في ليبيا نتأهّل، وبرضو بنصل المجموعات.
كل المدن تؤدي إلى المجموعات.
كل البلد (أم درمان).
ما بنفرِّق، بنضرب من طرف.
أم درمان (إحساس)، هي في دواخلنا أينما كنا.
بنطلع من أم درمان ـ لكن أم درمان ما بتطلع مننا.
أي مكان في الكون عندنا (هنا أم درمان).
في العتبة أو في سوسة، في طرابلس، في نواكشوط، واشنطن، بنوصف باستاد الهلال.
أي واحد فينا بيسألك عن عنوانك، بقول ليك وين لاستاد الهلال وإن كان في الصين.
لا بنعرف مبرّرات ولا عندنا أعذار.
الحمد لله لا بنبني، لا عاوزين نعمل عربية.
بنعرِّس طوالي.
المجموعات عندنا متل إنك تشيل لحافك وتطلع من الصالون للحوش.
أو متل صينية الغداء، بعدها طوالي بجيبوا ترمسة الشاي.
أو متل (من علايل أب روف للمزالق).
وبتوع التمهيدي ديل روحهم طلعت، قدر ما عملوا وفكّروا وخطّطوا واجتهدوا وثابروا وذاكروا وبخروا أي شالوا ليهم (بخرة) في الامتحان، لم يتجاوزوا التمهيدي.
ما عارفين يعملوا شنو؟
معسكرات في ليبيا، في كيجالي، في جنوب السودان وفي أديس أبابا، وبرضو يكتبوا ليهم خروج.
لم ينجح أحد.
ديل مرة لعبوا مع بايرن ميونخ، وبعدها طلعوا من التمهيدي.
جدعة التماس بالألماني ما عرفوا ليها.
أبو جيبين.. لم ينجح أحد.
النمير.. لم ينجح أحد.
سهل.. لم ينجح أحد.
ديل ما في واحد فيهم شاف (المجموعات).
حدّهم التمهيدي ـ لو بالغوا بصلوا ود البشير.
التمهيدي التاني.
سادس الدوري الموريتاني، والمجندل من الزعيم الما لعب بالأربعة في الدامر.
ديل لو وصلوا المجموعات، يروحوا فيها، يضهبوا عديل.
فريق المريخ هذا عسكر مرة في مصر 6 شهور ولم ينجح أحد.
مجالس إدارة، شئ نفطي، وشئ دهّابة، وشئ من وارد الإمارات، وبرضو بطلعوا من التمهيدي (لم ينجح أحد).
جابوا النمير من الدهب ، وسهل من الجاز.
رئيس هيئة دبلوماسية، ورئيس منظمة دولية، ورئيس (أورنيك)، ورئيس (قوات نظامية)، ورئيس مرخص ترخيص العاصمة، ورئيس (إفراج مؤقت).
وكله ما جايب حقهُ.
أجهزة فنية، شئ مصرية، اسكت ما تعد، وشئ صربية تربيع، وشئ إيطالية، وشئ برازيلية، وشئ انجليزية، وبطلعوا من التمهيدي، و(لم ينجح أحد).
عادي عندهم.
محترفين من جميع الدول، وبيقولوا ليك بعد التعب دا كلو المريخ في مرحلة بناء.
إنتوا بتغشوا في منو؟
أقصد إنتوا بتبنوا في شنو؟
غايتو نحن بقينا ناس كلية طــب عديل كدا.
كل سنة بنخش طــب.
وإنتوا يا مريخاب، أكون واضح وصريح معاكم، قرايتكم دي ما بتطلِّعكم من التمهيدي.
لو بالغتوا حَـدّكم (التمهيدي التاني).
ود البشير في زول نازل؟
قراية المساء ما بتدخِّلكم طــب.
ما في طــب بالمساء.
زمان في أي مدرسة ثانوية، كان في فصل اسمه فصل المساء أو فصل الإعادة، هذا الفصل بدرسوا فيه الطلاب الراسبين في امتحان الشهادة أو العايدين، أي واحد أهله شبّكوه في الطب وهو ما عندهُ ليه قدرة، بتلقاه “إعادة” في الفصل دا سبع مرات.
يفضل يعيد ويعيد، لمن في النهاية ينزل معاش وهو طالب.
عندنا طالب دخل كلية الطب بعد أن أصبح جَـدّاً.
وشغّـالين كدا ـ من ضل لي ضل، بهذا التمهيدي قاعدين يتفاصحوا، بقلدوا في الهلال وبيلافحوا في الكلام.
قالوا ح يحوِّلوا الهلال إلى الكونفدرالية، واخدوا أربعة.
وقبل كدا قالوا ما بنطير برانا، الجماعة لغاية الآن شغّـالين طيران والهلال بتأهّـل.
قالوا فلمو قاصر.
وقالوا ح يبعدوا الهلال من دوري أبطال أفريقيا، وكذلك الأندية الكونغولية.. والمريخ سوف يتأهّل من غير أن يلعب، لامن مدربهم صدّق.
داركو للطيران رفض يلعب مباريات ودية في مرحلة الإعداد، باعتباره “مُتأهِّل.. مُتأهِّل” يلعب لي شنو؟
لا أبعدوا الهلال ولا أبعدوا الأندية الكونغولية، وفي النهاية المريخ لعب وطلع من التمهيدي!
والتمهيدي الأول كمان.
الناس ديل عملوا أي حاجة، عشان يبقوا زي الهلال.
هسه العضوية الإلكترونية بالانتساب قالوا بقوا يطلعوها (متك).
شغّالين بس تقليد في الهلال!
ديل من التقليد قرّبوا يلبسوا «أبيض وأزرق»، جابوا ليهم خلطة كدا قالوا عليها لون «كريمي!»
وبيلبسوا (أزرق) عادي، عشان يطلعوا من إحساس التمهيدي.
الناس ديل سافروا ليبيا لابسين أزرق.. وبعد دا طلعوا من التمهيدي!
قلنا الزعيم ـ لفحوا اللقب!
قلنا نادي الشعب، لطشوه!
قلنا نادي الحركة الوطنية، الشفشفة بقت ليهم صعبة.
غلبتهم ـ دي ما بتتشفشف!
خلينا ليهم البلد مشينا الدوري الموريتاني، مشوا الدوري الموريتاني!
ويا ريت لو بنستروا في الدوري الموريتاني ـ عشر هزائم في موريتانيا، آخرها خسروا بالأربعة من لكصر، وحلوا في المركز السادس!
رحعنا الدامر، لحقونا، عشّمناهم في اللقب وضربناهم أربعة!
خلينا ليهم البلد ومشينا روندا، لقيناهم ورانا!
إنتوا ما قلتوا ح تلعبوا في ليبيا؟
ح تظلوا (ضُــل) الهلال كدا لمتين؟
الناس ديل عملوا أي حاجة عشان يطلعوا من التمهيدي.
في البداية ـ أيام جمال الوالي، زمن استخراج الجنسية من (سلم الطيارة)، صادر سلم الطيارة، أيام كانت الجنسية بوقِّـع عليها (كابتن الطيران)، وشهودها بتكون “مُضيفتين”، كان المريخاب بعتقدوا أنّ الهلال سره في (الجنسية)، مرة صلاح إدريس جنّس ليه لاعب مشت معاه، ناس المريخ قالوا بس السر في الجنسية، بقوا أي أربعة أجانب بجنِّسوا منهم خمسة.
جابوا عصام الحضري بالحريات الخمس، ونحن السودانيين حرية واحدة ما لاقنها، وجابوا رمزي صالح بجامعة الدول العربية، والجامعة العربية ما شفنا منها غير (الشجب والإدانة والاستنكار).. الحكومة ما قصّـرت مع المريخ، النونو ووارغو والنفطي وسعد عطية وعلاء الزهرة، وبرضو الحال في حالو!
الولاية تدعم.
الجهاز يدعم.
السد يدعم.
والاتحاد يدعم.
الإذاعة والتلفزيون تدعم.
ديل من (الدعم) الكتير، جابوا ليهم (4) من الدعم السريع، واحد في المجلس وواحد مستشار، وواحد ماسك لجنة التأهيل، واحد ماسك شركاتهم!
غير الكومي!
ديل وصلوا (حفتر) عديل كدا.
تاني أقول ليكم أكتر من كدا شنو؟
وبرضو لم ينجح أحدٌ.
تجري جري الوحوش وتجنِّس جالية كاملة وبرضو بتطلع من التمهيدي!
في الزمن داك ـ إنت السوداني بالميلاد لو عاوز تطلِّع ليك جنسية، إلا تعمل فيها أجنبي في المريخ، بقوموا يطلِّعوا ليك جنسية بالتجنس في 5 دقائق وإنت سوداني مُشَــلّخ!
مرت السنوات ولفّـت، وناس المريخ مع ديمومة الخروج من التمهيدي افتكروا أنّ سر الهلال وتقدمه يكمن في أنّه يملك في كشفه عدداً كبيراً من الأجانب، على هذا الأساس المريخ ما خلى ليه أجنبي ما سجله!
كشف المريخ الآن فيه أكتر من (13) أجنبياً، جميعهم خرج من التمهيدي، وبعضهم قبل أن يُعتمد في الكشف الأفريقي للمريخ، خرج من التمهيدي.
الثنائي الملغاشي فينو هلسينا ونيكولاس راندريا، قالوا المجموعات إلا يشوفوها في الهلال (فرجة).
يشوفها فقط في “بي ان سبورت” مع الهلال.
ديل جابوا سامر العمرابي من “بي ان سبورت”، وطلعوا من التمهيدي.
شاهدوا المريخ فقط في الصفحة الرسمية للنادي.
إنتوا ناس الهلال زعلانين من النقل ليه؟ هلالكم تاني ح تشوفوه في “بي ان سبورت”.
مرحلة الصفحات دي تجاوزنها من زمان.
وأجانب المريخ من تمهيدي لي تمهيدي.
حدّهم ود البشير.
آخرهم ود البشير.
مرة المريخ سجل ليه جالية برازيلية كاملة، ومرة تواطؤا مع الأهلي المصري، وكانوا حتى عندما يصلوا مرحلة المجموعات بطلعوا بفضائح.
أربعات الدامر بتشتغل فيهم برّه وجوّه في المجموعات.
المريخاب وقت جربوا أي حاجة وما في أي تحسُّن ـ الحال يا هو نفس الحال، قالوا المشكلة في (الجاز).
والحل تجيبوا لينا مجلس نفطي زي الهلال، نحن عاوزين نشتغل بالجاز.
الحل في الجاز.
ما خلوا ليهم طرمبة.. الحكومة جابت ليهم مجلس نفطي من الرئيس للخفير.
قايلين الحال بتغيّر.
الحال في حالو ـ بي جازهم طلعوا من التمهيدي.
بل إنهم طلعوا في هذا الموسم من التمهيدي الأول.
يعني ود البشير ما وصلوها.
إنتوا يا ناس المريخ مشكلتكم ما في الجاز.
ولا في البنزين.
ولا في الغاز.
إنتوا مشكلتكم في (العليقي).
وفي الحرب دي يجيبوا ليكم (عليقي) من وين؟
العليقي ما في تقليد.
ما في عليقي (متك)… بكتب ليكم لاحقا (فلطي سطر) تحت عنوان العليقي (متك).
أصبروا إنتوا لو بتصبروا ما بتجيكم عوجة.
نمن أي حاكة عندنا بنظام.
بنرصها صاح.
ما عندنا صدفة.
جماعتنا ديل يل انتظروا هيثم مصطفى (17) سنة، عندما شعروا أنّ خطورة الهلال وسره في البرنس.
هسع العليقي دا إلا تنتظروه (70) سنة.
عشان كدا حاولوا طوِّروا النمير أو كابو أو سهل، عشان الموضوع دا ح يطوِّل.
الذكاء الاصطناعي ممكن يقلب ليكم الموية (جاز).
ممكن اللبن يبقى (بنزين).
والكلام (غاز).
والحكاوي تبقى (خُبز).
والوصيف (زعيم).
لكن الصورة ما بتبقى أصل.
الذكاء الاصطناعي ما بقدر يعمل ليكم أبو جيبين أو النمير أو سهل (سوباط).
والضل ما ببقى (عليقي).
وبي تمهيديكم دا لو قابلناكم في روندا نص دستة ما بتمرِّقكم مننا.
قالوا (القاصر) بيسأل من أمير كمال.
…
متاريس
بحب الرقم 7، والهلال للمرة السابعة توالياً في المجموعات.
المرة دي ما بتجلي إن شاء الله.
السابعة واقعة.
شدوا حيلكم، وكمِّلوا الناقص خلال 72 ساعة.
إنتوا ما في حاجة ناقصاكم.
مريخابي قالوا ليه الهلال للمرة السابعة توالياً في المجموعات، قال ليهم الهلالاب ديل المجموعات عندهم أسهل من سوق ليبيا.
غايتو يا ناس المريخ الزول الشبكم حكاية المريخ في مرحلة بناء، مقلبكم جنس مقلب.
ح تقعدوا تبنوا كدا لمتين؟
عندنا جارنا، وصل السبعين، وكل ما نسألوا من العرس بقول لينا قاعد ابني في مستقبلي.
قلنا ليه يا حاج إنت مستقبلك دا ما أظن يديك أكتر من جمعتين.
يا زول عرِّس.
إنت عايش لمتين؟
مريخابي قال لي المجموعات حلوة؟
قلت ليه المجموعات لو ما حلوة إنتوا ما بتخسروا فيها (الجاز) دا كلو.
جابوا ليها قطر (أجانب)، وطلعوا من التمهيدي.
عندنا قريبنا من التمهيدي الكتير بقوا يركِّبوا ليه (أوكسجين).
حالتو بقت صعبة شديد.
مجلس المريخ يجتمع ويقرر المشاركة في الدوري الرواندي.
ما تخافوا الدوري الرواندي ما فيه (تمهيدي)، لكن موضوع (الأربعات) دا ما بنقدر نوعدكم.
داركو للطيران ما بقصِّـر.
بكرة إن شاء الله نتحدث فنياً عن مباراة الهلال والبوليس.
جهِّـزوا (الباسطة).
الشتاء دخل.
المريخ صيف، خريف، ربيع، شتاء دافئ ممطر (تمهيدي).
سهل فاكر الموضوع ساهل، كان غيرك أشطر، ما قدر ليها جمال الوالي تقدر ليها إنت.
تمهيدي طـول العمر.
…
ترس أخير: عَشَـان مَـا تِتحَسّـسـوا مَـا تَشغِّـلوا المَـروحَــة في (4).
