القُـرعَـة.. للكبار فقـط (ممنوع اصطحاب التّمهِــيداب)
صَـابِنَّهَـا
محمد عبد الماجد
القُـرعَـة.. للكبار فقـط (ممنوع اصطحاب التّمهِــيداب)
القرعة عند المريخاب بقت مثل علم الفلك، ما فاهمين فيها أي حاجة (علم الفلك: يجمع بين دراسة الأجرام السماوية والفيزياء والتكامل وعلوم الحاسوب، مما يجعله تخصصًا معقدًا يتطلب دراسة بعيدة المدى).
الموضوع دا عندهُ علاقة بالتنقيب عن الدهب؟
يا زول دهب شنو؟ أحسن تسكت ما تفضحنا ساكت.
عندهُ علاقة بالباسطة؟
مالك عاوز تثير فينا المواجع.
واحد قال أحسن يدخل في الموضوع طوالي وما يلف يدور ساكت، قال لي إنت القرعة يعني شنو؟ قعدت أشرح ليه وكأني بشرح ليه في ألفية ابن مالك.
طلع ما فاهم أي شئ.
فريق يطلع من (التمهيدي) شن خبرو كمان بعلم الفلك؟
أنا خايف الناس ديل يكونوا عداد الكهرباء عندهم شالوه.
خايفهم يكونوا رجعوا لي أيام الفانوس أم عوينات.
غايتو الحرب دي لو استمرت أكتر من كدا، عادي (التلج) عندنا يصبح من الكائنات المنقرضة.
يا زول ما تلخبط ـ التلج متين بقى كائن؟ في الحرب دي ما في حاجة غريبة، أي شئ جائز.
خلونا مع بتوع التمهيدي.
أنا حالف (التمهيدي) دا ما أخليكم عليه.
الناس ديل قرعة مرحلة المجموعات عندهم زي (علم دراسة طبقات الأرض وخصائصها هو علم الجيولوجيا، أو ما يُعرف أيضاً بعلم الأرض أو علم الطبقات. يهتم هذا العلم بدراسة بنية الأرض الصلبة، والصخور التي تتكوّن منها، والعمليات التي تحدث عليها عبر الزمن، ويشمل ذلك دراسة ترتيب الطبقات).
العلم بقول كدا.
عاد التمهيداب شن خبرهم بـ(الجيولوجيا)؟
لاقاني واحد تاني الصباح شايل باقي نومه في (بستلة) وحايم، قال لي (الجيولوجيا) عندها علاقة بالفول؟
قلت ليه ما عندها، قال لي عليك الله أنا من الصباح بفتش لي في (فولة) كاربة، أي حاجة ما عندها علاقة بالفول ما تجيب لي سيرتها.
الجيولوجيا حاجة غير القرعة، مالكم إنتوا زعلانين.
وغير الفول.
أكون صريح معاكم أنا موضوع (التمهيدي) دا ما بفكو.
شفتوا الكلام دا كيف؟ الجيولوجيا ممكن تقع ليكم لكن القرعة ما بتقع.
الموضوع دا عندهم أصعب من اللغة الصينية، ويا ريت تقيف عند اللغة الصينية، القرعة عندهم رموز غير مفهومة، ما فاهمين فيها (التكتِّحك).
الليلة القرعة!!
يعني شنو؟
يشرحوها ليهم كيف؟ أكيد صعبة عليهم.
الدكتور علي عصام قدم مادة شافية وكافية عن القرعة، شوف أرجع لبعض ما ذكره في تلك المادة ـ عشان القرعة تقع ليكم. (أعلن الاتحاد الأفريقي لكرة القدم عن سحب قرعة دور المجموعات لدوري أبطال أفريقيا اليوم الاثنين 3 نوفمبر 2025 الساعة الثانية ظهراً بتوقيت السودان ومصر وستقام القرعة في أستديوهات قنوات سوبر سبورت في جوهانسبيرج بجنوب أفريقيا).
تقلِّدوا في العليقي في أي شئ، أها العليقي سافر إلى جوهانسبيرج للقرعة، ح تعملوا شنو؟
ح تقلِّدوه في دي كيف؟
التمهيداب الكلام بتاع التمهيدي دا بكون عندهم زي (الدرّاب) ما بقع ليهم، ولا بتبلع.
بقيف ليهم في الزور.
معقولة بس.
معسكر في كيجالي.
ومعسكر في ليبيا.
ومجلس نفطي.
وجهاز فني صربي.
و13 محترفاً أجنبياً.
وفريق في بربر.. للمشاركة في دوري الدرجة الأولى ببربر.
وفريق في كيجالي للمشاركة في الدوري الرواندي.
وفريق سوف يشارك في الدوري السوداني في يناير القادم.
وبعد دا تطلعوا من التمهيدي.
التعب دا كلو عشان شنو؟ ـ عشان تقعدوا تتفرجوا في القرعة.
الفرجة لا تحتاج لكل هذا التعب.
القرعة ما عاوزة ليها 13 محترفاً أجنبياً.
جالون جاز كتير فيها.
يقال (كان افلاطون أول من حاول يضع نظرية الفنون والآداب، ثم جاء (بيرك) و(جوتيار ينولدز) و(دافنسي) و(تولستوي) و(ركسن) و(جروس)…).
الكلام دا عندهُ علاقة بالقرعة؟
دا علم ساكت.
افلاطون علاقتهُ شنو بالقرعة؟ مالك إنت عاوز تعمل للتمهيداب (خلعة).
وركسن.
وجروس.
تولستوي خلوه يمكن يحشر نفسه في القرعة.
ما غريبة عليه.
الكلام دا من صميم القرعة.
يعز عليّ أن أكتب عمود صحفي أو مادة صحفية ولا أقدم معلومة للقارئ الذي يمكن أن يضيع وقته معنا دون أن يخرج بفائدة.
الموضوع ليس كله (الكورة).
الكورة وسيلة وليست غاية ـ الهلال وطن وليس نادياً.
في حقيبة الذكريات كتب البروفيسور عبد الله الطيب عن الزعيم إسماعيل الأزهري (في سيارة أستاذنا إسماعيل الأزهري ركبنا ذلك اليوم. كان يدرِّسنا منهج الرياضيات الإضافية في سنتنا النهائية لإعدادنا لامتحانات شهادة كامبردج. كان رحمه الله محبوباً عند الطلبة، وكان آنئذٍ رئيس مؤتمر الخريجين في سنواته الأولى. وكان معروفاً عند الطلبة، وعرفه الوطن كذلك من بعد، بالأناة والصبر والإصرار مع روح من أريحية النفس والفكاهة، رأيناه مرة يركب دراجة فتعجب التلاميذ وقالوا: (وانت تعرف تركب العجلة يا أستاذ؟) وضحك وقهقه ورفع رجليه ووضعهما على الميزان ورفع يديه وقال: (وكمان أعمل حركات). وكان رحمه الله أكثر ما يلبس بدلة بيضاء وقميصاً أبيض. رأيته بهذا الزي عندما كان (مدرِّساً)، ثم من بعد هذا هو (رئيس البلاد) والزعيم. كأني بصورته الآن ماثلة أمامي وهو يخطب بالقاهرة بنادي القوات المسلحة مساء يوم 19 مايو سنة 1955).
يعني الزعيم قبل 56 أو في الأربعينات وبداية الخمسينات كان بركب عجلة، وبعمل بيها حركات وهو يقصد من ذلك ممارسة الرياضة.
اشتهر الأزهري بالزي الأبيض، وهنا يلتقي مع الزعيم الهندي غاندي الذي اشتهر أيضاً باللون الأبيض.
اللون الأبيض لون الزعماء ـ لون الملوك.
وعشان ترتاحوا، وما تتحسسوا الكلام دا ما عندهُ علاقة بالقرعة.
لكن لو قعدنا في الواطة ممكن نلقى ليه طريقة.
شخصيات زي الزعيم إسماعيل الأزهري ويحيى الفضلي والشريف زين العابدين الهندي مفروض أي مادة يدخلوا فيه.
هذه الشخصيات نادرة، وهم تاريخنا الحقيقي ـ لكن نحن من أكبر عيوبنا إننا نشوه الرموز ـ نشوه من نختلف معهم.
الوطنية عندنا (إشعار بنكك).
ما تقولوا (اتحادي) ـ الموضوع أكبر من كدا ـ عشان في مرات أخرى سوف تجدوني أتحدّث عن شخصيات وطنية في أحزاب أخرى.
الكلام دا كله في القرعة؟
إنتوا برضو ما فهمتوني.
زمان كان عندنا تلفزيون عندهُ (نفسيات)، لمن يكون عندنا حاجة مهمة عاوزين نتابعها بتقوم الصورة تطش.
فجأة كدا الصورة تطش.
يعني يوم الهلال يكون عندهُ مباراة منقولة، عادي الصورة تطش.
ومرات تكون منتظر نتيجة المباراة في النشرة، أول ما تجي النشرة الرياضية الصورة تطش.
طبعاً ما في زول ممكن يقنعني أن التلفزيون ما قاصدها.
لو في سهرة حلوة بتكون منتظرها الأسبوع كلها، أول ما السهرة تبدأ الصورة تطش.
الحلقة الأخيرة في أي مسلسل، عادي الصورة تطش.
أو الإرسال يقطع.. أو الكهرباء.
العوارض كتيرة.
كان في حاجة اسمها (الأريل)، تطلع رأس البيت، وتشوف ليك شافع يقعد تحت عشان وقت الصورة تظبط يقول ليك ظبطت.
لا كان في ريموت ولا في موبايل.
الغريبة أول ما تنزل من رأس البيت، الصورة تاني تطش.
أها دا شغل نفسيات والّلا ما شغل نفسيات؟
دا تلفزيون قاصدك عديل كدا ـ وشايلها معاك.
مرض النفسيات كان شائع بين التلفزيونات والروادي.
يعني مرات بتكون بتحضر في مباراة على الراديو أول ما تكون في هجمة خطيرة، الراديو (يكضم).
من هنا جاءت فكرة إنك تضرب الراديو لأنك بتعبر عن غضبك.
الغريبة لمن تضربه الصوت برجع.. والتلفزيون لمن تضربه الصورة بترجع،
حتى الأجهزة بتجي بالضرب.
في معاكسات غريبة بتحصل، لامن تكون مستعجل، لو في شقة بتلقى الأسانسير في الطابق الـ13 وإنت في الطابق الأرضي.
تمرق على استعجال أي إستوب يلاقيك (أحمر)، الغريبة وقت تكون فاضي وغير مستعجل أي إستوب بتلقاه فاتح.
ولامن تكون مستعجل شديد بتلقى اللستك نازل أو فارش أو نائم كما يقول المصريون عن (الكوتش).
ما عارف السر في ذلك شنو؟
في التلفون وقت تكون منتظر مكالمة مهمة، الشبكة بتكون كعبة، والعجب لامن يكون عندك حاجة في النت عاوز تنزلها أو عاوز تشاهدها، فجأة كدا النت يبقى (تقيل).
لامن تقول ناس النت ديل بكونوا قاصدنك.
تشك في الأمريكان.
نرجع للقرعة ـ والكلام البزعل.
في المرات السابقة، كنت بتمنى الأهلي المصري يكون في مجموعة واحدة مع الهلال، عشان بعتقد أن الأهلي قادر على عرقلة الأندية الأخرى المنافسة للهلال عندما يلعب معها في أرضها ـ كما أن وجود الأهلي مع الهلال في مجموعة يعني أنك لن تواجهه في الدور المقبل ـ لكن هذه المرة لا أتمنى الأهلي ـ لأنّ الأزرق في حاجة على مجموعة هادئة، تساعده أن يصل إلى المستوى المنتظر ـ الهلال في حاجة أن يلعب في الدوري الرواندي وفي المجموعات، عشان الفورمة والانسجام، الهلال يحتاج لبعض الوقت ليصل إلى مُستوى يؤهله للفوز إن شاء الله باللقب، ووجود الأهلي في مجموعة الهلال مزعج ـ على الأقل إعلامياً وجماهيرياً في ظل التراشق بين الطرفين.
مع ذلك أقول أي فريق يكون مع الهلال في مجموعة واحدة من أندية المستوى الأول ما فارقة معانا.
في ناس بتمنوا صن داونز، لأنّه بيلعب كورة، ما بشتغل بالخبث الكروي لأندية شمال أفريقيا.
الترجي ليس مُخيفاً، ونهضة بركان عادي، يبقى الأهلي هو أفضل أندية المستوى الأول وإن كان الأهلي نفسه متراجعاً.
دعونا نتمنى صن داونز.
من أندية المستوى الثالث وهي بيترو أتليتكو (أنغولا)، والجيش الملكي (المغرب)، ومولودية العاصمة (الجزائر)، وريفرز يونايتد (نيجيريا)، أكيد نتمنى ريفرز يونايتد، وأعتقد أن هذا المستوى هو الذي سوف يحدد قوة المجموعة أو ضعفها.. إن شاء الله يكون نصيبنا من هذه المجموعة ريفرز يونايتد.. دا مكسب حقيقي لنا، نقول يا رب.
من أندية المستوى الرابع أتمنى فقط أن لا يكون فريق شبيبة القبائل من ضمن أندية مجموعة الهلال، ومعلومٌ أنّ أندية المستوى الرابع هي شبيبة القبائل (الجزائر)، واستاد باماكو (مالي)، وسانت لوبوبو (جمهورية الكونغو الديمقراطية)، وباور ديناموز (زامبيا).
نطلع من شبيبة القبائل وما مشكلة، من يكون مع الهلال من أندية هذا المستوى.
وجود شبيبة القبائل في مجموعة الهلال سوف يعقد المجموعة كثيراً ويمكن أن يكون بسببه المجموعة كلها أندية عربية.
نحن نتمني باور ديناموز (زامبيا)، كدا بتكون مجموعة مريحة.
تخيّلوا الهلال في مجموعة تضم صن داونز وريفرز يونايتد وباور ديناموز.
نقول يا رب.
إذا كان الثنائي ريفرز يونايتد وباور ديناموز مع الهلال يبقى ما فارقة من يكون مع الهلال ضمن مجموعته من أندية المستوى الأول، حتى الأهلي في هذه الحالة مرحباً به.
وقعت ليكم.
نسأل الله قرعة مريحة للهلال ـ لأن الأزرق في حاجة لبعض الوقت، وبعد تجاوز مرحلة المجموعات، الهلال سوف يكون غير.
…
متاريس
افتكر كدا وضحت.
أرجع ليكم إلى افلاطون والزعيم إسماعيل الأزهري تاني، والّلا وقعت ليكم؟
في ناس ما بفهموا أي حاجة عن القرعة.
على العموم خلونا نتلاقى على فرح بعد القرعة.
شخصياً أتوقعها قرعة مريحة للهلال.
نقول إن شاء الله.
بس إنتوا قولوا يا رب.
أتمنى الأهلي وبيراميدز في مجموعة واحدة ـ عشان ينشغلوا مننا شوية.
لكن أرجع وأقول إن شاء الله يلتقيان في مرحلة الإقصاء بعد المجموعات عشان نتخلص من واحد منهما.
وجود الأهلي وبيراميدز في مجموعة واحدة يعني تأهلهما معاً.
من الأحسن أن يلتقيا في مرحلة الإقصاء.
…
ترس أخير: قولوا يا رب.
