الجماعة البيفهموها طائرة.. طارت ليهم..!!

كرات عكسية
محمد كامل سعيد
الجماعة البيفهموها طائرة.. طارت ليهم..!!

*مدخل اول:*
# انقسم فريق المريخ وتحول فجأة الى فريقين.. الاول قيل ان سيشارك في بطولة الدوري الرواندي، والثاني سيلعب في بطولة الدوري السوداني المقرر اقامتها في بربر والا عطبرة والا مروي (والله ما عارف)..؟!!
# المهم انتهى الامر بان هنالك بعثة تتواجد حاليا في العاصمة الرواندية كيجالي، وأخرى تتواجد بالسودان وتحديداً بربر، تمهيدا للمشاركة في الدوري السوداني المزعوم، والذي يفترض انه سيبدا شهر يناير المقبل..!!
# اي ان كل بعثة – تحمل اسم المريخ – تتواجد في مكان.. وكل فريق صار في قمة الاستعداد انتظارا لمسابقة لم يتم تحديد مواعيدها حتى الآن.. شفتو (الجاهزية والسرعة والحسم) دي بتكون كيف..؟! والله نضم اصلو بالساهل ما بيتفهم..!!
# نقول ذلك ونتابع ما يحدث وكآن على رؤوس (معظم) المريخاب الطير.. لا لشئ سوى لاننا نتابعهم وهم يتعاملون بكل الاستسلام لما يقال، ويتم تنفيذه بصورة غريبة جدا جدا، لم نعهدها على عشاق الاحمر الذين قيلت فيهم الاشعار، وصاروا مضربا للامثال، في الشفافية وفهم كل ما يدور بشكل سريع.. (ااي، لقد كانو بيفهموها وهي طائرة) لكن يبدو ان الامور اختلفت حاليا..!!
*مدخل مباشر*:
# ظل الارزقية، في كل العهود الادارية يعزفون على وتر العاطفة، والذي ـ كما ثبت عمليا ـ لا يخيب ابدا، حيث نرى (القطيع) وهم يمارسون الاستسلام التام لكل من (يدغدغ مشاعرهم)، ويوزع عليهم الكذب والاوهام والكلام الساكت..!!
# لقد تابعنا وهمة (كرت كرتونة) بدأ تناولها من جانب الارزقية خلال ايام مجلس الكومبارس، تتمثل في ان المريخ شرع في مرحلة بناء.. بناء للفريق الذي تم تدميره بواسطة الكومبارس انفسهم..!!
# وعشان افراد القطيع في الاساس، ما كانوا مقتنعين بما قيل لهم ابدا، تابعناهم وهم يحرصون ويترقبون انتصارات الفريق ـ الذي لا يزال يُبنى ـ ويحلمون بيتربعه على عرش البطولات، والتقدم بقوة ٥ي كل المنافسات بداية بدوري الكبار بافريقيا.. اااي ما عندهم اي مانع ولا منطق.. ينافس يعني ينافس..!!
# اها بعد ما النمير ما اكمل عمليات التدمير، وشطب القوام الاساسي للمريخ، وتعاقد مع الفاقد التربوي وعاطلي الموهبة، والعجائز.. قام عمل شنو..؟! انسحب على الفور، وقدم استقالته.. وخلاها ليهم (صحراء جدباء جرداء) تحتاج لسنوات وسنوات للاصلاح، والعودة التي صارت مستحيلة، وضرب من ضروب الخيال..!!
# اها وسريعا جدا، تدخلت تلك الجهة المسماة بلجنة الحوكمة، وقررت تعيين لجنة اخرى تسيرية برضو “فاقدة الشرعية”.. ولعل اول قرار اتخذته جماعة (مجاهد السهل) كان اعلان مواصلة السير في سكة البناء.. بناء شنو يا جماعة اللي بيجيبوا ليهو المهندس.. بعد ما يبنوا العمدان بالرمال والهبود (الهبود ده يعني الرماد)..؟!!
# وطالما القصة (كلفتة في كلفتة)، وكمان جابت ليها رماد يبقى بس الناقص حماد.. وحماد ده كلما عارفينو.. خليها ماشة كده، ونفتح ليهم “اغنيات الحماسة”، مع الاكثار من تريد “نهواه في كل الظروف”، وكاس مانديلا، ودبي والشارقة، وسيكافا ون، وسيكافا تو، وسيكافا ثري.. وخليهم يحلموا، واللي يحصل يحصل.. ديل ناس ما عندهم اي شغلة.. والارزقية معانا وما همانا.. نجيبو ميت، ونتقول ليهم هو كان حي.. ويا حي يا قيوم تعينا على هذه المجموعات المسطحة والمسطح بها..!!
# افراد القطيع (مقتنعين وما مقتنعين) بعمليات البناء التي تحدث عنها النمير بالامس، وتابعوها اليوم في عهد مجاهد السهل.. بدليل انهم اعلنوا قناعتهم بفكرة البناء، وفي ذات الوقت تابعناهم يحلمون بعبور لوبوبو في بطول افريقيا بالدور التمهيدي.. نقول ذلك ونعلم ان كل واحد من افراد القطيع عندو رأي في عملية البناء دي، لكن ما قادر يصرح..!!
# عمليات التضليل تواصلت من جانب الارزقية، في وقت يظل (القطيع) مستسلما لكل ما يقال.. البناء يتم بعد التعاقد مع المحترفين، وبعد ذلك يأتون بالمدرب.. (ده البناء الحديث شكلو كده).. المريخ يودع من الدور التمهيدي لدوري كبار افريقيا ونتابع ذلك وهو يحدث مرات ومرات متتالية، ومن سنة حفروا البحر.. وعمليات البناء شغالة وفي احسن حالة..!!
# الارزقية باعوا للقطيع وهمة ان هنالك فريق سيلعب في الدوري السوداني، وفريق آخر سيلعب في الدروي الرواندي.. يعني ببساطة كدة المريخ ح يكون عندو فريقينط ما شاء الله.. الاول ح يلعب في دوري الابطال، والثاني يشارك في الكونفدرالية.. انتو ما عارفين.. بطل الكاسات الجوية بيعمل شنو في عهد اللجان التسييرية.. ويا افريقيا جاك بلا..!!
# عموما ح ننتظر ونتمنى ان لا يتكرر علينا الانكسار وتفاصيل الدمار، خاصة واننا اعتدنا عليه خلال السنوات الاخيرة مع مريخ اخر الزمان.. نقول ذلك ونؤكد ان لنا عودة قريبة لهذه القصة المهمة باذن الله في قادم الايام..!!
# تخريمة أولي: مشاركة المريخ في بطولتين خلال توقيت واحد، لا ولن يستقيم عقلا.. وستكون الامور حال البداية العملية قابلة لحدوث العديد من التطورات التي سيدفع ثمنها المريخ نفسه من اسمه وتاريخه ووضعيته.. وربنا يستر..!!
# تخريمة ثانية: الحقيقة ان افراد (القطيع) صاروا الان في قمة الجاهزية لاعلان نجاح عملية البناء المزعومة.. نقول ذلك ونؤكد انهم ـ اي افراد القطيع ـ في الظاهر ممكن يقتلوك لو قلت كلام غير البناء.. لكنهم في ذات الوقت ومن جواهم ما مقتنعين.. لكن يعلموا شنو طالما الازرقية عايزينهم كده..؟!!
# تخريمة ثالثة: بالمناسبة عندنا سؤال مهم وهو: اين سيتم نقل مباريات المريخ سواء في الدوري الرواندي او السوداني..؟! والله سؤال برئ نبحث له – منذ الان عن إجابة – واظن اننا لا ولن نجد..!!
# همسة: للاسف.. الناس اللي كانو بيفهموها طائرة.. طارت ليهم..!!