النجيلة وصلت!!
صابنها
محمد عبد الماجد
النجيلة وصلت!!
في الموسم السابق، وبعد أن فاز الهلال بالدوري الموريتاني وتُوج بطلاً شرفياً لدوري عزيز علينا، ودولة شقيقة نحمل لها الكثير من الود والتقدير، اتجه المريخاب بكلياتهم نحو الدوري السوداني، قالوا: “نحن الدوري الموريتاني ما عندنا معاه قضية، ولا شغالين بيه، ونحن أصلاً شاركنا فيه من أجل الإعداد للدوري السوداني، بعدين هو دوري (شرفي) ساكت”.
قالوا الدوري الموريتاني دا نحن عندنا زي (شرف والأسد)، لن نحسبه لكم.
قلنا ليهم (شرف والأسد) هذا، المريخ هُزم فيه (10) مرات، وآخر مباراة في (شرف والأسد) خسرها المريخ أمام “تفرغ زينة” بأربعة أهداف.
فضيحة السواد.
الكلام ما عجبهم، بقوا يعاينوا لينا من تحت التربيزة، أقصد من تحت النضارة، زي الزول البعاين من فوق الحيطة.
في ناس يمشوا الحفلات الليلية بنضارة الشمس، وقت نقول ليهم: “إنتو دا شنو البتعملوا فيه دا؟ فضحتونا فضيحة”.
يقولوا لينا: “الموضوع ما عندو علاقة بالشمس، الموضوع عندو علاقة بالإحساس”.
بنكتلها في قلوبنا ونسكت، المعنى نحن ما عندنا إحساس، عشان كدا لم نلبس نضارات شمس في الليل.
قلنا نوقع ليهم الكلام، قلنا ليهم المريخ جاء في المركز السادس، إذا كان في (شرف والأسد) بعمل كدا، في الجد بتعملوا شنو؟
الفرق بين الهلال والمريخ في الدوري الموريتاني (23) نقطة.
ويقولوا ليك (شرف والأسد).
المريخ ترك كل ذلك وانتقل إلى “الدامر” مبكراً، بعد أن ترك مدير كورته (رهينة) في أحد فنادق نواكشوط.
ويقولوا ليك (شرف والأسد) ، بعد الرهبنة دي!!
حجزوا في أحسن فنادق الدامر، ورتبوا أمورهم وقالوا: “نحن مركزين في الدوري السوداني، الدوري الموريتاني ما شغالين بيه الشغلة”.
فازوا على الأهلي مدني بعد أن أعلن رئيس الأهلي مدني الفخري والراعي الرسمي له، القنصل حازم مصطفى، عن حوافز ضخمة للاعبي المريخ في حال الفوز على الفريق الذي يرعاه، وقد تحقق ذلك؛ لا ندري إن كانت هنالك حوافز أخرى للاعبي الأهلي من رئيسهم الفخري في حال الهزيمة من المريخ، أم أن الحوافز فقط كانت للاعبي المريخ؟
كل شيء جائز.
ومثلما فاز المريخ على الأهلي مدني الذي تعادل مع الهلال، جاء المريخ وفاز على مريخ الأبيض بالشكوى بعد التعادل معه في الملعب.
قلنا عادي، نتلاقى قدام.
ولا بنقيف في حاجات زي دي.
وتصدر المريخ الدوري بعد أن فاز المريخ أمام الأمل الذي بقى في الممتاز هذا الموسم بسبب شكوى كسبها ضد المريخ، وفاز نفس الأمل على الهلال، ودخل الهلال لمباراة القمة بفرصة واحدة، وأعلن إعلام المريخ أنهم سوف يحولون الهلال إلى الكونفدرالية.
وجاءت مباراة القمة، وعشان نحن أي حاجة عندنا بي نظام، فقد ختم المريخ مبارياته في الدوري السوداني بذات النتيجة التي ختم بها المريخ مبارياته في (شرف والأسد).
(شرف والأسد) ـ يعني الدوري الموريتاني، إنتو بتنسوا وإلا شنو؟
فاز الهلال برباعية نظيفة على المريخ وتحول المريخ حسب اللائحة للكونفدرالية، لكن ناس “محمد حلفا” رأوا غير ذلك، ما في لائحة شغالة في الحرب دي، لذلك لعب المريخ في دوري الأبطال.
ديل لائحة النظام الأساسي “شفشفوها”.
الدنيا حرب.
لكن عشان نحن أي حاجة عندنا بي نظام، المريخ طلع من التمهيدي.
قبل الخروج من التمهيدي الذي حدث في عهد مجاهد سهل وسامر العمرابي، كان مجلس المريخ المعين بقيادة عمر النمير وهيثم كابو قد تقدم باستقالته بعد رباعية “روفا”.
وكان هرب من قمة كأس السودان، قالوا: “الفضيحة والدوري متباريات”!!
جاء مجلس سهل، ولكنه أيضاً سار على نهج المجالس التي سبقته وخرج من التمهيدي.
قفلوا ملف الدوري الموريتاني (شرف والأسد) بعد رباعية تفرغ زينة.
وقفلوا ملف الدوري السوداني بعد رباعية (مصباح عبد الرؤوف).
وقفلوا ملف البطولة الأفريقية بعد الخروج من التمهيدي الأول، وقالوا: “نحن مركزين في الدوري الرواندي”.
دخلوا لينا بـ “حنك” جديد في هذا الموسم، قالوا لينا: “نحن عندنا مشروع، زي مشروع العليقي”.
العليقي في مشروعه ما فرط في كباية شاي.
انتوا مشروعكم دا (خيري) وإلا شنو؟
وأقنعوا جماهيرهم أن المريخ في حالة بناء، عشان كدا تعالوا شوفوا المريخ في “كيغالي”.
أول حاجة عملوها، شالوا شوقي غريب، شوقي (الرباعيات) في الدوري الموريتاني والدوري السوداني، وجابوا ليهم مدرب اشتغل في الدوري الرواندي، عشان الدوري يكون “واقع ليه”.
واشترطوا أن يكون ذلك المدرب قد فاز بالدوري الرواندي، عشان الموضوع يكون “ظابط”.
جابوا مدرب الجيش الرواندي الذي فاز معه بآخر بطولة في الدوري الرواندي وشارك في سيكافا وأخرج الهلال من البطولة، لذلك تعاقدوا مع الصربي “داركو”.
قبل ذلك كان قد أنجز المريخ معسكراً طويلاً في كيغالي.
يعني في رواندا الجماعة ديل ما عندهم أي مشكلة.
جاهزين موية ونور.
في موريتانيا، اشتكوا من الأكل، وبعد هذه الشكية، تتخيلوا تركوا مدير الكرة (رهينة) في أحد فنادق نواكشوط، يعني فصاحة في الفاضي!!
مشوا كيغالي جاهزين، عندنا مجلس نفطي، وعندهم مجلس نفطي، نفس الشيء.
ديل شغالين معانا تقليد زي ناس (نجوم الغد).
سجلوا ليهم (14) محترفاً أجنبياً، أي لاعب تألق مع منتخب بلاده في بطولة “الشان” تعاقدوا معاه، قالوا: “عاوزين نعمل زي العليقي”.
ركزوا في الدوري الرواندي، خاصة أن الهلال كان مشغولاً بالبطولة الأفريقية وكان يلعب مبارياته في الدوري الرواندي وهو يفقد (14) لاعباً.
قلنا أصلو ما في مشكلة.
الهلال احتل الذيلية، والمريخ حقق سبع أو ثماني انتصارات متتالية في الدوري الرواندي والهلال مشغول بدوري أبطال أفريقيا.
تصدر الهلال مجموعته في دوري أبطال أفريقيا، في وجود صن داونز والمولودية وسانت لوبوبو الذي أخرج المريخ من التمهيدي الأول.
تتخيلوا سانت لوبوبو الذي أخرج المريخ من التمهيدي الأول (دور الـ64)، أخرجه الهلال من مرحلة المجموعات (دور الـ16).
وقت يقولوا ليكم نحن أي حاجة عندنا بي نظام ما بترضوا وبتمدوا بوزكم برة خط 18.
خرج الهلال من ربع النهائي وقبّل على الدوري الرواندي.
المحصلة أن الهلال الآن في الصدارة بفارق (8) نقاط من الجيش الرواندي مع مباراة إضافية للهلال.
أما المريخ الذي يحتل المركز الثالث فإن الفارق بينه وبين الهلال (9) نقاط قابلة إن شاء الله للزيادة في المباريات القادمة، علماً أن الدوري الرواندي تبقت له خمس جولات مع مباراة مؤجلة تجمع بين الهلال والمريخ.
الحصل لنجيلة الدامر، سوف يحصل لنجيلة “أماهورو”.
وقبل ذلك نجيلة نواكشوط عاشت نفس الدور.
وما حدث في نواكشوط والدامر وكيغالي أن شاء الله سوف يحدث في الخرطوم.
تتغير النجيلة، والمزلقان واحد.
حكومة ولاية الخرطوم كانت “مفتحة”، جابت ليها نجيلة جديدة لاستاد الخرطوم، عشان ناس “طبنجة” ما يكون عندهم عذر.
ناس المريخ بدأوا يقللوا من الدوري الرواندي على طريقة تقليلهم من الدوري الموريتاني.
لكن ما في مشكلة، ما حدث في الدامر سوف يحدث في الخرطوم.
نفس الشيء.
نحن جئنا ليكم نجيلة جديدة مخصوص، عشان ناس “طبنجة” ياخدوا راحتهم في “الدردقة”.
قالوا ليك دردقة نجيلة استاد الخرطوم فيها عروض إضافية.
أي دردقة داخل منطقة الجزاء معاها (بشكير)، دردقة برة الخط معاها (مناديل ورق) ساكت.
أيامكم يا طبنجة.
أصلو نجيلة الدامر بعد رباعية (مصباح عبد الرؤوف) بقت غير صالحة للاستعمال الرياضي.
ناس “جان كلود” ديل عملوا فيها عمايل.
أجبروا المريخ على الانسحاب من كأس السودان.
وشالوا شوقي غريب.
وشالوا مجلس عمر النمير.
وشالوا محسن سيد.
وقبل ذلك شطبوا عوض زايد والحارس التونسي الجمل.
ما حدث في الدامر سوف يحدث في الخرطوم.
النجيلة جديدة، وجان كلود دا جيب ليه نجيلة جديدة وابعد منو.
النجيلة وصلت.
وح نسمع زي كل مرة أن المريخ مركز في الدوري السوداني.
سوف يصلون مبكراً الخرطوم، ويحجزون في أحسن الفنادق.
وربما أيضاً يتركون “علي جعفر” في كيغالي رهينة تاني.
ما بعيد، أي حاجة جائزة.
بس عاوز أقول ليكم حاجة، النجيلة الجديدة كتروا ليها الدربات والحقن وشاش الجروح والتزلق وقطرة العين.
كله عرفناه.. الدربات والحقن والشاش عرفناهم، قطرة العين لي شنو؟
أنا ما قلت ليكم: النجيلة جديدة، قالوا فيها حلاة “مزلقانات”، وجان كلود المرة دي داخل بي فهم جديد.
تعالوا بقطرتكم.
برضو ما عرفنا قطرة العين علاقتها شنو بالموضوع؟
إنتو شيلوا معاكم قطرة عين، أنا متأكد سوف تحتاجوا ليها.
أصلو ما بتندموا عليها.
قلت ليكم المرة دي جان كلود داخل بي فهم جديد.
يقولوا ليكم الكلام مية مرة.
الموضوع فيه نجيلة جديدة، والظروف ما معروفة.
يا ناس حكومة ولاية الخرطوم كتروا (النقالات).
ومناديل الورق.
ولجنة تسيير جديدة للمريخ.
ديل كل موسم بيدخلوا بلجنة تسيير جديدة.
تقول بيبنوا ليهم في كوبري!!
وما تنسوا (قطرة العين).
عندنا قريبنا طقتو كهرباء، شلناه وجرينا بيه على الحوادث.
الدكتور أول ما عاين ليه كدا، قال ليه: “إنت آخر مرة أكلت فسيخ متين؟”
الراجل قام من كهربتو، وقال ليه: “يا دكتور علاقة الكهرباء بالفسيخ شنو؟”
الدكتور قال ليه: “دا شغلنا نحن بنعرفو كويس، نحن الطب دا قرينا ليه (6) سنوات”.
صاحبنا قال ليه: “لي سنة ونص ما أكلت فسيخ”.
قال ليه: “طيب أنا عاوز أعرف الكهرباء دي دخلت جسمك كيف وهي ليها سنة ونص ما دخلت الحلة”.
برضو منطق!!
الكلام وقع لينا، وعذرنا الدكتور في موضوع (الفسيخ)، ومن اليوم ذاك بقينا أي زول يقول لينا حاجة غريبة ما بنستغرب، بنقول أكيد الزول دا قرأ طب.
هسه موضوع (قطرة العين) دا ما عاوزكم تستغربوا منه، الموضوع دا أنا قربت ليه عديل كدا.
بالمناسبة زولنا القلت ليكم طقتو كهرباء، الموضوع ما طلع كهرباء، الموضوع طلع (حمى ضنك) ساكت.
هي الكهرباء يلقاها وين؟ عشان تطقو.
…..
متاريس
مباراة الجيش هي مباراة الدوري.
مباراة البطولة.
أحسموا هذه المباراة، عشان نمشي للخرطوم وبالنا رائق.
المريخ يقاتل بصوابعه العشرة عشان يعمل حاجة في الدوري الرواندي.
أوعكم تدوهم فرصة.
الناس ديل لو فازوا بالدوري الرواندي ح يعملوه لينا أغلى من كأس العالم.
وهم قانصين.
اعملوا حسابكم.
ليس أمام الجيش غير ملعب “أماهورو” لكي يلعب مباراته ضد الهلال.
المباراة معلنة عند السابعة مساءً وهو توقيت لا يصلح لملعب كيغالي.
إضافة لذلك، فإن من مصلحة “بنك كيغالي” الراعي الجديد للدوري أن تلعب المباراة في أماهورو.
أماهورو مسار إجباري للجيش الرواندي.
لذلك على “ريجيكامب” أن لا يقلق.
عليه أن يرتب أوضاعه على هذا الأساس.
نحن أي حاجة عندنا بي نظام.
ما في كلام ساكت.
….
ترس أخير: النجيلة وصلت… النوم طار من عين طبنجة وعلي جعفر.