​ليست هذه (أساطير) إنها (عادات وتقاليد)

صابنها
محمد عبد الماجد

​ليست هذه (أساطير) إنها (عادات وتقاليد)

​في بلدتنا، الناس مازالت عيونهم (عسلية)، ومازالوا يبحثون للفول عن (زيت السمسم) ليضربوا صاح.. ويطلبون (البصلة) لملاح أم شعيفة.
الشطة بالليمون مع مرارات الحرب، مازالت تمثل عندنا الدعم (اللوجيستي) القوي للقراصة بالدمعة.
ومازلنا بنسمع (صديق أحمد) عندما يكون عندنا غسيل… عادةً ذلك يكون يوم الخميس العصر… (نركب البيسابق الريح ونمشي في الخرطوم نستريح الخدامة تسوي الطبيخ وكل جمعة نزور الضريح يمة بلالي متين).
​والهلال في حكاياتنا بنطعم بيه جلساتنا، وقت نتكلم عن والي الدين محمد عبد الله ومهند الطاهر ما بنسأل لا في (قهوة) ولا في (شاي)، وبننسى (الغداء)، لمن يرسلوا لينا شافع (لميض)، متل البطارية وقت حجارتها تكون ضعيفة، ويقول لينا: قالوا ليكم تعالوا شيلوا صينية الغداء، ونحن نستجيب له عشان نتفك من (لماضة) هذا الشافع؛ يقف ليك في نخرتك متل شاويش الدرجة الرابعة في قطر المشترك، وأنت راكب (ملح) وخائف من مرور الكمساري.
​أهلاً بيكم في الخرطوم (والغريب عن وطنه مهما طال غيابه.. مصيره يرجع تاني لي أهله وأصحابه).
الخرطوم نورت بيكم.
​أنا على قناعة أن موهبة عبد العزيز داؤود (الصوتية) أخطر من موهبة ميسي (الكروية)، وعلى قناعة تامة أن ليونيل ميسي لو لقى (حنجرة) عبد العزيز محمد داود كان سوف يفعل أضعاف ما فعله في تاريخه الرياضي.
​في بلدتنا شجر اللالوب بقى يشيل (تفاح).. فلهمة منه ساكت، قلنا ليهم الحاصل شنو؟ أنتوا شجركم دا بيشرب (استيم)؟ قالوا لينا أبداً، بس الهلال شال الدوري الرواندي.
تاني!!
عادات وتقاليد.
تعودوا على هذا، وصار الفوز بالدوري عندهم طبيعة… عندهم فطرة.
نلعب في الدوري الموريتاني الجميل، بنشيل الدوري.
تقعدوا تطنطنوا، وتقولوا ما راضيين، بنجي نلعب معاكم في الدامر.
وبرضو بنشيل الدوري.
ويتشيلوا أربعة.
وما عاوزين بعد دا كلو شجر لالوبنا ما يشيل تفاح.
​الموسم الماضي روفا جاب ليه قون.. الجمل لو بقى قافلة ما بقدر يعمل حاجة.
في نواكشوط جابوا حارس نيجيري ما انستر.
في الدامر جابوا حارس تونسي ما انستر.
في كيغالي جابوا حارس بوركيني ما انستر.
رجعوا تاني لي جرس كافي.
بعد دا نعمل ليكم شنو؟
بعد دا إلا تشوفوا الفصل الخامس بتاع الأمم المتحدة.
​في مصر ممكن يتغير البطل التقليدي للدوري فريق الأهلي المصري.
وفي تونس يمكن يتغير الترجي.
وفي السعودية يمكن أن يتغير الهلال.
وفي الكونغو.. يتغير مازيمبي عادي.
في المغرب.
حتى في إنجلترا ممكن يفوز الأرسنال بعد غيبة بالدوري.
​في السودان البطل واحد.
يمكن يتغير الوصيف في موريتانيا أو في رواندا، لكن البطل ثابت.
الهلال هو الثابت الوحيد في كل الدوريات.
البطل هو البطل.
​لكم أن تتخيلوا أن هنالك أندية موريتانية تلعب في دوري بلادها منذ سنوات، وحلمها ومنى حياتها تشيل الدوري، فشلت في ذلك وجاء الهلال (لاجئ)، ولعب سنة واحدة وشال الدوري وفات.
لكم أن تتخيلوا أن هنالك أندية رواندية بتلعب في الدوري الرواندي منذ سنوات، وكل حلمها وكل طموحاتها تشيل دوري بلادها ولم تستطع وجاء الهلال لاجئ في (فد سنة) وشال الدوري وفات.
​هذه معجزة هلالية، لا يفعلها إلا الهلال، أشعر أن الفوز بالدوري الموريتاني والدوري الرواندي، أضاف للهلال الكثير، وأضاف لي على المستوى الشخصي سعادة لا توصف.
هل هذه حقيقة؟ هل فعلاً الهلال شال الدوري الرواندي؟
هل أصبح الهلال هو الفريق الوحيد في العالم الذي يحقق بطولة ثلاث دوريات لثلاث دول مختلفة؟
كأني ما بين نائم وصاحي.
فجأة قمت من النوم.. قالوا لي تأكيداً: الهلال شال الدوري الرواندي.
ما عرفت نفسي.. الشغل دا حلم وإلا في الواقع؟
قعدت أدعك في عيوني، زي كأني بدعك لي في طشت (قميص) مستعجل.
​الهلال عملها ظاهرة.
يلعب في أم درمان يشيل الكأس.
يلعب في دار السلام يشيل الكأس.
يلعب في نواكشوط يشيل الكأس.
يلعب في الدامر يشيل الكأس.
يلعب في كيغالي… بشيل الكأس.
الحكاية دي كترت.
لمن بقت مسيخة.
​المريخ ليه ست سنوات.. يعافر من دوري لي دوري… من مكتب لي مكتب، ما عرف يطلع بأكثر من الوصافة.
من دار السلام إلى نواكشوط، ومن نواكشوط إلى الدامر، ومن الدامر إلى كيغالي، ومن كيغالي إلى الخرطوم، وما في أي حاجة.
لم ينجح أحد.
هذه هي لجنة التيسير الخامسة وما في أي جديد.
سوداكال.. حازم مصطفى.. أبوجيبين.. النمير.. سهل.. والحال يا هو نفس الحال.
تتغير اللجان والبطل واحد والوصيف وصيف.
ست سنوات، معسكرات خارجية، وتسجيلات ومحترفين أجانب وأجهزة فنية عالمية ولجان تيسير كل سنة بي لجنة وشكاوى وطعون، وما في حاجة ظهرت.
الوصافة عندهم غير مضمونة.
​قمت على حيلي، ونحن وقت نقوم صعبين.
نفضت النوم من طرفي.
غسلت عيوني بي موية باردة، عشان أتأكد إني صاحي.
وقلت ليهم الحاصل شنو؟
قالوا لي الهلال فاز بالدوري الرواندي.
قلت ليهم تاني!!
الحكاية شنو؟
شربت لي قهوة تقيلة ـ قرض بس، عشان أصصحصح.
وفتحت الشباك.
في المسلسلات العربية، الواحد لمن يكون عاوز يصحصح، بفتح (البلكونة).. نحن بنفتح (الشباك).
وتاني قلت ليهم في شنو؟
قالوا لي الهلال.
قلت ليهم أوعى تكونوا عاوزين تقولوا لي شال الدوري هناك.
قالوا لي طيب نحن من الصباح بنقول في شنو؟ شعرت بيهم ما رضوا.
​الهلال بعمل في (أساطير)… (تُعرف الأساطير (Myths) بأنها قصص تقليدية مقدسة أو تاريخية، غالباً ما كانت تُستخدم في العصور القديمة لتفسير أصل الكون، والظواهر الطبيعية، والوجود الإنساني، والقيم الأخلاقية).
الموضوع دا بقى زي (الخرافات)… حاجة ما بتصدق.
شربت لي كباية قهوة تاني.
دخلت غوغل بي (سفنجتي) الخضراء.. في فردة فيهن نخرتها مقطوعة (عصرت على طرف الطريق.. عقدت سفنجتها بي دلق).. حميد بقول مربوطة بي (دلق)، وأنا بقول مربوطة بي (سير)، أخضر عشان ما تكون ظاهرة… (وكل فردة كانت من بلد وينشافن الاتنين خُضر، الليل سُتر… الليل ستر).
حميد دا عمل أي حاجة، حتى في (النعلين) لحقنا.
​عملت بحث في غوغل.. لقيت الموضوع حقيقة.
لا أساطير ولا خرافات.
أساطير شنو؟ الحاجات دي في الهلال شيء طبيعي (عادات وتقاليد).
أعراف وقوانين.
أجنة ووراثة.
قفلت الشباك، جابت ليها (هوا).
​هذه الحرب سوف تنتهي، غصباً عن أي زول.
واللجوء ح ينتهي، والنزوح ح ينتهي.. وكل حاجة إن شاء الله ترجع تمام.
ونرجع أحسن ونرجع أفضل.
ودكان عمك عثمان فتح الواري، ح يفتح تاني.. ونرجع نشيل منه (الطحنية) بالدين، ووقت برشلونة والريال يكونوا لاعبين نشيل منه زبادي.. وبرضو بالدين.. نجيب ليه قروش من وين والدنيا آخر شهر؟
​والتومة بنت المعيسل ح تعمل (باميتها) المفروكة ديك.
وحاج طه الموقاتي، يلاقيك العصير شايل ليه جالون جاز ونازل على البحر.
أي حاجة ح ترجع، زي أول… حتى الشبكة الكعبة بتكون كعبة بنفس السوء.
الكهرباء تقطع وتجي.. هو نحن ذاتو (فقريين)، لو الكهرباء ما قطعت ما بنحس بيها.
ما عاوزين حاجة زيادة.
ح نقعد نحكي للناس عن الحرب، وعن الشفشفة وعن الجغم والبل والدنيا الزائلة.
ح نحكي لأحفادنا عن كل شيء، الفتك والمتك.
أيام صعيبة، عاشها الناس، المقابر بقت قدام البيوت، والكهرباء جبادة.
ح نحكي ليهم عن المسيرات وعن حمى الضنك.
ما ح نخلي شيء.
​لكن وسط كل هذه الأوجاع سوف نحكي ليهم عن (التكايا) وعن المغتربين الشالوا الشيلة وما قصروا.
ح نحكي ليهم عن التكافل والتعاضد وعن هذا الوطن، حبه بيزيد عندنا كلما زادت أوجاعه.
سوف نحكي عن صبر الناس وعن إيمانهم وقناعتهم.
سنحكي لهم عن محور دار السلام ومحور نواكشوط ومحور الدامر ومحور كيغالي ومحور أم درمان.
سوف تقول ليهم في كل هذه المحاور الهلال حقق الدوري.
في هذه الحرب غاب أي شيء إلا الهلال.
يا سادة إنها ليست (أساطير)، يا سادة هي (حقائق)، هي (وقائع)، هي (عادات وتقاليد).
​هذا الوطن سنحمل حكاياته في الجوف، حياتنا في عشقنا لهذا الوطن.
أنا بحس بي أم درمان في أغاني إبراهيم عوض.
أغنيات إبراهيم عوض بتحس فيها بالموردة وشوارع حي العرب، وعبد الرحمن الريح وسيف الدين الدسوقي وإبراهيم الرشيد والطاهر إبراهيم وعبد اللطيف خضر.
أول مرة شفت أم درمان، شفتها في (حبيبي جنني وغير حالي).
إبراهيم عوض فيه أنفة ولاد أم درمان، وهي أنفة عن (وطنية)، وليس عن (عنهجية) أو (عنصرية).
بحس بي أم درمان في علي المك، هذا الأديب الذي جعل من الأكاديميات أدباً ومن الثقافة حقاً عاماً، يصل لكل الناس.
الزول دا جعل جغرافيا السودان تتكون من الأدب والنصوص.
من القضارف كتب عبد الواحد عبد الله (اليوم نرفع راية استقلالنا)، أول زرع في الأرض شال علم الاستقلال هو سمسم القضارف.
من أم درمان غنت عائشة الفلاتية لسمسم القضارف.
هذا هو السودان.
من رفاعة كتب محمد عثمان عبد الرحيم نشيد (أنا سوداني أنا) فتغنى بذلك في عطبرة حسن خليفة العطبراوي.
إبراهيم الكاشف من مدني غنى للسر أحمد قدور من الدامر (أنا سوداني.. أنا أفريقي).
عبد القادر سالم في أم درمان غنى لي (ليمون بارا)، وفي مدني غنى (مكتول هواك يا كردفان).
عبد المنعم عبد الحي من الجنوب بنى للقماري عشها قشة قشة في الخرطوم.
أبو آمنة حامد من سنكات غنى (من شندي العظيمة تلقى بنات جعل وحدات في المتمة زي لون العسل النايرات خدودن ذي فجر أطل).
​أنتوا عاوزين تعملوا شنو؟ نحن عندنا رصيد أقوى من كل شبكاتكم ومشاكلكم، عندنا إرث وتاريخ أقوى من أزماتكم.
عندنا واقع أقوى من ظنونكم.
عندنا وحدة تغنينا ليها قادرة بكلماتها وحنينها أن تتحدى كل الرصاص وكل الأسلحة.
محمد عوض الكريم القرشي غنى للبان جديد من شندي.
الهلال في دار السلام شال الدوري، وفي نواكشوط شال الدوري، وفي الدامر شال الدوري، وفي كيغالي شال الدوري، وبعد العودة للخرطوم إن شاء الله الهلال يشيل الدوري.
الشغل دا كبير.
نحن أي حاجة عندنا بي نظام.
….
متاريس
المريخ في الخرطوم؟ ضايقين للوصافة ضيق.
اصبروا (الوصافة) ما طايرة.
حدثني من أثق فيه عن جناح أهلي مدني الغيني كامارا، وقال لي لاعب ما ساهل.
يا العليقي شوف هذا اللاعب.. جناح ما ساهل… لاعب جاهز.
أحسموا قبل الموضوع يبقى صعب.
ترقبوا هذا الجناح.. واحكموا بي نفسكم.
ننتظر التتويج الرسمي للهلال في كيغالي.
بكرة فرحة أخرى.
عشان كدا ناس المريخ اتخارجوا.
وصافة المريخ السنة دي مجهجة بسبب أهلي مدني.
وحكمة الله.. القرعة وضعت المريخ في أول مباريات مرحلة النخبة أمام الأهلي مدني.
يعني أنتوا وشطارتكم.
المريخ مفتكر أنه بعد أن قدم طعن في الهلال أن الاتحاد السوداني أول ما يصل المريخ الخرطوم يمنحوهم كأس الدوري.
فاكرنها طعون.
ناس استاد الخرطوم كانوا منتظرين النجيلة تصل ثم يتحركوا بعد وصول النجيلة.
لا جهزوا الغرف ولا المدرجات وحتى البوماستك انتظروا به النجيلة.
علاقة البوماستك شنو بالنجيلة؟
الشرطة القضارف قالت إن تأجيل مباراتها المعلنة أمام كوبر سوف يحرمها من ثلاثة لاعبين بسبب انضمامهم لمنتخب الرديف الذي سوف يغادر في نفس التاريخ الجديد للمباراة.
وكان يجب مثلما تم استثناء لاعبي مرحلة النخبة أن يتم استثناء لاعبي الشرطة.
السؤال هو هل لم يتم اختيار لاعب المنتخب الرديف من فريق كوبر؟
….
ترس أخير: في انتظار التتويج.