يوم الكورة… والرجعة الما محسوبة

يوم الكورة… والرجعة الما محسوبة

*رؤوفا يارؤوفا يارؤوفا ..كورتو مامعروفة يارؤوفا … جاري كم عربية يارؤوفا*

*يعيش ناس الكورة على واقع تنافس بدأ يعود مرة تانية بعد سبات طويل، رجع معاه الشد والجذب والمناكفات القديمة بين الهلال والمريخ، وكأن الزمن قرر يفتح الدفتر القديم من جديد بدون ما يمسح ولا سطر.

*أربعة سنوات كانت واضحة، الهلال فيها سيد البلد وزعيمها دون منازع، بطولات خارجية وداخلية، وشغل تقيل خلّى الوصيف واقف في محطة “إعادة المحاولة” كل مرة بشكل مختلف ونتيجة واحدة: وصافة أبدية. ولسه في الذاكرة ذاك اليوم الثقيل… أربعة في الشباك دامر المجذوب، يومها النتيجة ما كانت أي نتيجة، كانت تكسير رؤوس ورسالة قاسية، ومعاها الأغنية الترند في ذلك الوقت: *“رؤوفا جاري كم عربية”

*اليوم الوصيف بدأ يحلم حلم أكبر، وزلوط نافش ريشه وداير يوري الناس إنه اتغير وبقى حاجة تانية (والأيام بتتغير)، ناسي إنو الفارق ما كلام ولا صدارة مؤقتة، الفارق تاريخ وميدان وملعب.

*نعم، تراجعت فرق النخبة ومستوياتها تراجع مخيف… الأهلي مدني ما هو أهلي مدني الموسم الماضي، وبقية الفرق بقت تنهزم ستات واربعات لدرجة إنو الوصيف ظن إنه بقى بطل وقلب الميزان.

*الحقيقة البتزعل ناس الوصيف ديمة: الهلال لسه هو الاختبار الحقيقي، وأي بطولة لازم تمر من تحت رجل سيد البلد.

*مباراة الأربعاء ليست مباراة عادية، هي مباراة “كسر عضم”. يا تثبت إنك جاهز يا تتكسر أحلامك بدري. والهلال مطالب بالحفاظ على هيبته، وما يدي الوصيف أي فرصة يبيع للناس وهم جديد.

*ريجي كامب… الكلام عليك.

الموضوع ما تدريب ساي ولا تجربة. دا امتحان كبير، مدرب لازم يقرأ المباراة دي كويس. لأنو بصراحة أي تردد هنا معناهو بداية مشكلة.

*والإدارة برضو… افتحوا عيونكم قدر الفنجال.

القرارات الأخيرة فيها لخبطة شديدة وحفر وكيمان… إبعاد أبناء النادي بالشكل دا خلّى فراغ واضح، والهلال ما بيتبني بالفراغات، بيتبني بالناس العارفينو من جوة.

*رامي كمال؟ خلونا نكون واضحين… في الحتة دي ما زول كورة. ممكن شغل عضويات، انتخابات… لكن مشروع فريق كبير زي الهلال محتاج ناس بتتنفس كورة، بتفهم ضغط، وبتعرف معنى مباراة زي دي.

*زلوط اليوم ممكن يضحك، لكن الضحكة دي ممكن تقصر شديد. والهلال لو صاح صاحي، المباراة دي لازم تكون رسالة واضحة للجهاز الفني الأجنبي بعد إبعاد كل أولاد الهلال الفاهمين الشغل.

*السوباط مهمة، لكن الأهم إنو يرجع كل الطاقم، وعلى رأسهم العليقي، عشان حماية مكتسبات الهلال ما تمشي ساي في الهواء.

**كلمات حرة**

الكورة موقف. والهلال لو سكت، غيرو حيطول لسانو.والكلام لمجلس السوباط يا تكونوا تمام يا كمان تتابعوا الاوهام

* الوهم بيلعب دقيقة… والتاريخ بيلعب عمر

* الصدارة ما دليل… الدليل يوم المواجهة

* الكورة ما كتابات فيس وتزوير تاريخ … الكورة حسم وفارق مستوي

**كلمة حرة أخيرة**

مين البحلم دا… وصيف خفيف