التمهيدي بالكوتشينة
صابنها
محمد عبدالماجد
التمهيدي بالكوتشينة
حسب إحصائية الزميل علي عصام فإن المريخ سجل خلال ثلاث سنوات 43 لاعبًا أجنبيّاً، وبطعنوا بعد دا في مجنسي الهلال.
هذا مثل الطالب الذي يسقط في امتحان الجغرافيا وقت تقول ليه الحاصل شنو؟ بقول ليك أستاذ الجغرافيا ما شاطر.. مع أن الفصل كله ناجح في هذه المادة.
المريخ في كل سنة يسجل (14) لاعباً أجنبيًّا، هذا رقم مخيف، وهو يؤكد الحالة التي يعيش فيها المريخ.. هذه وضعية تثبت عدم الاستقرار.
فرط المريخ في لاعبه الوطني موسى حسين كانتي، الموهبة السودانية الجميلة وسجلوا كل هذا العدد من الأجانب.
سجلوا ليهم كتيبة من الأجانب والمحصلة صفر، على المستوى المحلي وعلى المستوى القاري.
السؤال هل التمهيدي يحتاج لكل هذا العدد من الأجانب؟
في موسم سابق وبقيادة البرازيلي ريكاردو كان المريخ قد سجل جالية برازيلية كاملة في كشوفاته، تلك الجالية البرازيلية لم يبق منها برازيلي واحد.
هؤلاء البشر بكل هؤلاء الأجانب قنعوا من الميدان، اتجهوا إلى المكتب بحثاً عن حسمها بالشكاوى في قضايا خاسرة ولكن تتطرق وتقدم من أجل التخدير.
المريخ أعلن اليوم عن التعاقد مع ثلاثة أجانب آخرين ليرتفع عدد الأجانب في المريخ في ثلاث سنوات إلى 46 أجنبيّاً، 15 محترفًا أجنبيًّا في كل عام، ويتوقع أن يرتفع العدد ويتجاوز في فترة التسجيلات الحالية الـ50 أجنبيّاً.
شكلها عما تمطر في الضيعة… لقد أضافوا للتمهيدي ثلاثة أجانب آخرين.
وبتكلموا عن أجانب الهلال.
حصيلة المريخ في ثلاث سنوات كانت كالآتي:
سادس الدوري الموريتاني بفارق 24 نقطة من الهلال بطل الدوري الموريتاني.
ثالث الدوري الرواندي بفارق 16 نقطة من الهلال بطل الدوري الرواندي.
وفي الدوري السوداني، انسحب المريخ بكل أجانبه من الملعب أمام الهلال في دار السلام وخسر الدوري السوداني خارج الملعب وخارج البلاد.
وكسب الهلال الموسم الماضي في الدامر المريخ برباعية نظيفة في ليلة اكتمل فيها روفا بدراً.
وفي الموسم الحالي فاز الهلال بكل أجانب المريخ وفرصه وشكاويه بعد العودة للخرطوم بهدف فولمو.
المشكلة أن هدف فولمو باقي للمريخاب حار، فهو قد أوجعهم أكثر من أربعة دامر المجذوب.
الهلال حقق الدوري السوداني للمرة الخامسة توالياً، في بطولة حقق فيها الهلال الانتصار على المريخ في 25 مباراة مقابل 12 انتصاراً للمريخ على الهلال.. ليرتفع عدد بطولات الهلال إلى 19 بطولة مقابل 11 بطولة للمريخ وذلك فقط في الفترة ما بين 1996م وحتى 2026م.
الهلال حقق البطولة التاسعة توالياً في الوقت الذي كان يحقق فيه المريخ المركز السادس والثالث والثاني في تلك البطولات التي فاز بها الهلال.
هذه البطولات التي تقللوا منها، المريخ حقق فيها المركز السادس.
إنتوا أجانبكم ديل دارسين تمريض؟
الناس ديل واضح أن علاقتهم بالكورة سمع ساكت.
بيلعبوا في الفيس بوك.
في الموسم الماضي سجل المريخ أسماء قادمة من بطولة الأمم الأفريقية للمحليين.
سمعنا جنس كلام.
جنس غزل.
والمحصلة انظر إلى جدول البطولات التي شارك فيها المريخ، على المستوى المحلي والخارجي، على مستوى البطولة الأفريقية والبطولات المحلية، كلها كانت نتيجة المريخ فيها (لم ينجح أحد).
النجاح في الفيس.
تعالوا نبسط ليكم الموضوع، عشان يقع ليكم.
في الحريق والـ 14 لو كان ورقك زايد ما تجر، خليك حريف واجدع (البايظ) من غير تجر ـ ناس المريخ ديل ورقهم زايد مع ذلك قالوا عاوزين يفتحوا وهم حق النزول 51 ما عندهم.
جدع ليه أربعة أسود، قلنا ليهم مية مرة بقولوا ليك الأربعة دي ما بفكوها من غير إذن مرور، ناس روفا ديل الخمسين عندهم من الجرة التانية، الأربعة دي تجرك إنت وباكاتك وحارس المرمى وكنبة احتياطيك، والجهاز الفني، والدول المجاورة.
دي ما أربعة أسود، دي أربعة دامر المجذوب.
وقعت ليكم.
وزعنا تاني، قالوا لا بقطعوا ولا بلعبوا ـ قالوا الهلال اتفق معاهم ـ طيب لو الهلال اتفق معاكم في زول بفك ليه ولد هارتي في آخر اللعب!!
دا انسحاب كابو من كأس السودان.
روفا بجر الخمسين من نص الملعب، وجان كلود بجرهم باك باك، بفنط الباكات ـ مصعب العلمين وطبنجة من الجرجرة الكتيرة أرقام قمصانهم اتسهكت، زي (الشايب) في الكوتشينة المسهوكة، لا تعرفوا شايب ولا تعرفوا ولد.
طيب يا ناس المريخ إنتوا أصلاً ما بتتعظوا، في كأس السودان قلت الهلال منسحب ولن يلعب، وفي البطولة الأفريقية قلتوا (كاس) أبعدت الأندية الكونغولية وحرمتها من المشاركة ـ في كأس السودان الهلال لم يلعب وفاز بالكأس وفي البطولة الأفريقية سانت لوبوبو لعب وأبعد المريخ من التمهيدي، دي زي شنو؟
دي زي الكرت الدبل الشغال.
الحرفاء بقولوا ليك الدبل ما ترميه ـ خليه شوية بسموه (جوكر).
قبل ذلك كان المريخ قد لعب لدكها في دار السلام.
هربوا بعد التسخينة والصور.
لكن إذا كان المريخ قد سبق وهرب من الهلال في الشوط الثاني، هل يمكن أن يحس بالحرج من الهروب في التسخينة؟
الموضوع عندهم عادي.
ما فارق معاهم.
مرة يقولوا ليك تغيير هوية.
ومرة يقولوا ليك رامي كمال.
ومرة يقولوا ليك الملعب فيه كاميرات.
ما عاوزين الفضيحة تتوثق.. وقت شافوا الكاميرات هربوا، هم ما عارفين أن الهروب هو الفضيحة الأكبر، وموثق بالكاميرا.
المريخ هو أول فريق يهرب جوة وبرة.
في نخبة الخرطوم، دخلوا متصدرين بفارق الأهداف، قالوا الحرب انتهت والهلال ما بغلبنا.
المريخ يغلب الأهلي مدني بثلاثية.
المريخ يغلب أم مغد بخماسية.
المريخ يفوز على الفلاح بسداسية.
صدقوا روحهم.
هو نحن لو ما عشمناكم، وخليناكم تغلبوا بالخمسة والستة بتجوا لمباراة الهلال؟
لازم يصدقوا نفسهم، عشان ما يهربوا.
دي في علم الكوتشينة يقولوا عليها علم الدردقة.
يعني تدردق منافسك عشان يفك ليك الخمسين.
فولمو.. جوكرو مخاوة، أي (باص) تفكو ليه خمسين.
ناس المريخ ديل تشرك ليهم تجدع ليهم 8 أسود، بجدعوا ليك 8 أسود، تجرها بيهم، يقولوا ليك إنت هسع ما فكيتها.
هذا الذي أحدثكم عنه هو ما يعرف كما أشرت بعلم الدردقة.
هدف فولمو حار، عشان سجله (القاصر).
ست شهور يتكلموا عن القاصر، لا خلوا سيكافا، لا خلوا الاتحاد الأفريقي، لا خلوا الفيفا.
إعلام المريخ قال إن الهلال سوف يتم إبعاده عن سيكافا وعن دوري أبطال أفريقيا.
الغريبة أن القاصر الذي قالوا سوف يكون سبباً في إبعاد الهلال من سيكافا ومن دوري أبطال أفريقيا هو الذي حسم بطولة الدوري الممتاز.
وبدون هزيمة أو تعادل.
خلينا ليكم الأهداف.
الحسم سوف يكون بهدف وحيد من فولمو.
أسد على الفلاح وفي الحروب نعامة.
هسه الأسد منو؟
محمد تية أم القاصر فولمو؟
ناس جان كلود ديل لو فكيت 100 دولار بجروك.
عشان أكون واضح معاكم:
كانتي (عدد)!!
حازم مصطفى (عكس الجرة) فاز بكأس السودان.
والله لو ما خلفت الجرة لو قعدت سبعين عامًا في المريخ ما بتشيل ليك صحن.
فولمو (جوكرو مخاوه).
صنداي خمسين والجوكر (باص).
سوداكال (بيلعب لدكها).. الزول دا شغال للدك من قبل الثورة.
أبوجيبين، (ما بتم النزول) بين الزهور متصور… طلع بتاع صور وزهور ساكت.
النمير (رمى غطا).. كرشوم ومحمد المصطفى.
مجاهد سهل (ورقه ناقص)… لا بفتح لا بنزل.. ما عندو ورق… في زول عاقل بفك (كانتي) في نص اللعب؟
الهلال سجل كانتي أثناء الموسم، هدية مقبولة منكم.
جمال الوالي (لو ما فتوح نزول).. أيام الوالي بتواليات صلاح إدريس كانت رحمة.
شوقي غريب (أول ما تقفل بفك ليك الخمسين).
داركو (الورق لا بعرف يرصو، ولا بعرف يمسكو صاح).
داركو يمسك الورق 14 وبسلمو 14.
الزول دا الجرة خسارة فيه.
محمد النور أبوجا سجلوا فيه هدف، الكورة ربع ساعة في الأجواء الكيغالية.
وجرس كافي شاهد ما شافش حاجة.
العليقي (ورقو سمح، لو فكيت رباط الحذاء خمسين)!!
من هسه يا مريخاب جهزوا تكتيكات الانسحاب من القمة القادمة.
إنتوا عارفين القمة القادمة فيها منو؟
فيها كوليبالي وكانتي.
فيها هامان، دا قالوا ليك الوسط عندو منطقة مقفولة.
القمة القادمة فيها لاعب لو الصفقة تمت، ح تشتهوا النوم.
غايتو يا العليقي الزول دا لو جبتو الهلال، ممكن تعطي كوليبالي وجان كلود إجازة ست شهور.
الزول دا أصعب من الصعب.
دا لو اتسجل في الهلال مصعب ح تشوفوه في الفلاح ومكين ح تشوفوه في أم مغد.
الزول دا لو اتسجل.. خلوه طبنجة.. كشافات الخرطوم ما بتثبت.
والموقف يمكن يحولوه.
مجاهد سهل سوف يطفش ويشوف ليه فريق يمسكو زي حازم مصطفى.
حازم مصطفى قنع من المريخ.
المريخ هذا الموسم دخل الدوري باتحاد معتصم وأسامة ولجنة محمد حلفا.. الاتحاد بقى فرع للمريخ.
المريخ هذا الموسم دخل بي الأهلي مدني وأم مغد والفلاح.
دخلوا بفرصتين وشكوى.
فرصتين ولجنة.
فولمو حسم كل هذه التفلتات.
حسم كل هذه الملفات.
تلعبوها برة البلد بتهربوا.
تلعبوها في البلد ولكن خارج العاصمة في الدامر بتتغلبوا برباعية زي مسادير الدوبيت وعكير الدامر دائماً بتكون رباعية، ونحن أي حاجة عندنا بي نظام.
ترجعوا الخرطوم، فولمو في انتظاركم.
محل ما تقبلوا نحن وراكم.
برة البلد.. جوة البلد، برة العاصمة.. خارج العاصمة.
في العاصمة ذاتها تشكلوها، ما عندنا قضية.
تلعبوها في كوبر.. تلعبوها في الخرطوم ولا فارقة معانا.
تغيروا النجيلة.. ولا بتفرق.
في سخانة مولعة نار، ولا بنهتم.
في المساء أو العصر، ولا بنقيف في حاجات زي دي.
بي فرصتين .. بي شكوى .. عادي عندنا.
في دار السلام الدوري هلالي.
في نواكشوط الدوري هلالي.
في الدامر الدوري هلالي.
في كيغالي الدوري هلالي.
في الخرطوم الدوري هلالي.
تسع بطولات على التوالي، إنه بطل الدوريات المحمولة جوّاً.
كمان نحن بنلعب.
….
متاريس
في شندي قالوا في لاعب ما ساهل، القمة تحركت نحوه، سألت عنه أهل الاختصاص في شندي قالوا لاعب خطير، أتمنى أن أراه في الهلال.
لا أريد أن أذكر اسمه أو أتحدث عنه حتى لا ندخل في حتة تانية.. لكن يا ناس الهلال هذا اللاعب صغير وموهوب وعلى خلق، وصاحب بنية جسمانية ممتازة، يدرس في المجال الطبي كمان.
أتمنى من العليقي أن لا يهمل تسجيلات الوطنيين.
المدربون في الولايات، يجب أن يجدوا حظهم في المنتخبات الوطنية، في شندي هنالك المدرب ياسر جاد الرب لاعب النيل شندي السابق، والذي كان مرشحاً للقمة، هذا المدرب حقق نجاحات كبيرة في شندي وفي المتمة وفي الدامر، أتمنى أن يجد فرصة في المنتخبات، وأن يفسح الاتحاد المجال لأبناء الولايات في المنتخبات والدورات العليا والخارجية، بحيث أن لا تكون الفرص قاصرة على لاعبي الهلال والمريخ، حقيقة في الولايات هنالك أسماء ممتازة ويجب أن تنصف.
استفيدوا من كل الأسماء واصنعوا أسماء جديدة بعيداً عن الهلال والمريخ.
شخصيّاً شاهدت ياسر جاد الرب وهو يلعب فكان من أخطر المهاجمين الذين شاهدتهم، المشكلة أن الأضواء فقط تكون حول الهلال والمريخ.
لكن هنالك أسماء كانت مدهشة، وهل يمكن أن ننسى عبدالمحمود الخواجة في شندي أو هاشم كجر في كسلا؟
في شندي وعطبرة كانت هنالك أسماء لا تقل عن الأسماء الموجودة وقتها في الهلال والمريخ، سوف أكتب عنها لاحقاً إن شاء الله.
…
ترس أخير: لاعب شندي.. بدون ذكر أسماء، تذكروا هذا الاسم.. وأتمنى أن أراه في الهلال.