ديمقراطية (مفروكة) ونظام أساسي قميص عامر..!!
* تصدق يا مؤمن.. إنت لو كنت لاعب دولي سابق، أو عندك خبرات تراكمية تفوق خبرة سيف الدين الطيب بسنة ضوئية كاملة، أو كنت عضو مكتب تنفيذي في الكاف، وما إشتغلت دورتين في اتحاد الكاملين مابيحق ليك تترشح وتنافس في مقعد رئيس اتحاد الكاملين..!؟
– تصدق يا أخوي نادي الدرجة الأولى في الكاملين عندو صوت واحد زيو وزي نادي الدرجة التالته؟
– تصدق يا حبيبي لو رئيس الإتحاد أو مجلسو هببوا أي شيء إستوجب سحب الثقة حاتتفاجأ بي إنو مافي مادة في النظام الأساسي بتديك الحق ده؟… يعني لو عملوا السبعه وذمتها يستمروا فوق راسك الغليد ده؟… يعني دي ديمقراطية (مفروكة).. ديمقراطية بالبشميل وعليها (كول بدره)..!!
– تصدق ياولدي الناس ديل عندهم موظف أبعدوهو بجنحة التزوير من وظيفته، هسي جاء عضو مجلس منتخب؟
– تصدق يا شيخي أبلمبه ٨٠٪ من أعضاء الجمعية العمومية ماعارفين حاجة عن اللجان العدلية؟.. فيها منو؟.. وإنتخبوها والا عينوها؟.. والا حتى عملوا ليها إسقاط مظلي؟… بمن فيهم الناس الواقفين مع الديكتاتور ذاتو..!!؟
– إنت عارف يا الزول الشغال صفقة ورقيص عشره بلدي إنو لو الناس الفازوا مع سيف ديل إستقالوا كلهم بكره دي… ممكن سيف يسوق الإتحاد لوحده ومجلسه مابينهار؟.. وهو طبعاً ماعندو مانع.. فلتحرق الكاملين بمن فيها..!!
– تصدق يا مؤمن إنو لو جبنا أمهر ترزي باكستاني أو هندي عشان يفصل ليهو جلابيه لي سيف الكاملين ما حايفصلها ليهو بي مقاسات النظام الأساسي ده؟.. ياخي ده (زط- رط) أكتر من قميص عامر ذاتو 😂😂😂😂
– قبل الأخيرة….هل تعلموا يا مواطنين محلية الكاملين كلكم إنتوا بي نص قميص عامر…أقصد ابانظام الأساسي لإتحاد الكاملين ما مؤهلين تنافسوا على منصب رئيس الإتحاد؟
– آخر واحدة… هل تعلم يا رئيس نادي أمغد إنت ما حاتبقى رئيس اتحاد الكاملين إلا الرئيس الحالي يموت؟ (بعد عمر طويل).. ما تقول لي إنت في الممتاز ولعبت النخبة…!!
أبوعاقله أماسا