أنت مع منو كمان يا (اب بنطلون ناصل) !!

بالعربي الكسيح

محمد الطيب الأمين

أنت مع منو كمان يا (اب بنطلون ناصل) !!

* عشان تلقى (رغيف) يجب أن تظبط المنبه .

* تظبط المنبه عشان تقوم الساعة (٣:١٧) دقيقة تمشي الفرن.

* الرغيف بقى زي السحور .

* لو شالتك (نومة) الضحك شرطك.

* وعشان تملأ البراميل موية يجب أن تصحى الساعة (١:٥٤) دقيقة صباحا.

* الموية بتجي بالليل.

* زي الحرامي .

* ولو الغاز عندكم قطع لابد أن تشيل سلفية من البنك لزوم ترحيل للبحث عن الغاز .

* تكون ساكن الفتيحاب تسمع إنو في الشقيلاب جا غاز (ابرسي) تشيل أنبوبتك وتمشي .

* ولما تصل تلقى إنتهى.

* تدور تلفونات يقول ليك : في الكدرو الغاز جا قبل نص ساعة .

* تصل الكدرو انت شايل (ابرسي) تلقى عندو إيران.

* حياتنا بقت عبارة عن (ورديات) .

* وردية للرغيف ووردية للغاز ووردية للحنفية .

* وبما أن ذلك كذلك فإن الورديات عند أهل المريخ ستزيد وردية إضافية.

* الورديات عند ناس المريخ ح تكون : وردية للغاز ووردية للرغيف ووردية للموية ووردية لجيسي .

* والله صحي.

* جيسي ده عشان تقفلو إلا تعملوا ليهو وردية .

* زمان كان ناس المريخ بيعملوا وردية لهيثم مصطفى .

* بداية المباراة الوردية بتكون على الشغيل والزمن داك الشغيل في المريخ، الشوط الثاني الوردية بتكون على علاء يوسف ، وقريب نهاية المباراة الوردية بتكون على بدر الدين قلق.

* هسه جيسي ده إلا تشتغلوا معاهو بنظام الوردية .

* بنظام النفير .

* الزول ده بيلعب باص قصير اسمو (انت وضميرك) ، وعندو باص طويل بيقولوا عليهو (الجاية من الله بتصيب) .

* الله قسم ليكم الشقاوة يا أمير كمال .

* جيسي ده أمام الأهلي المصري لعب باص لحدي الآن الأهلاوية ما عرفوا الزول ده (شات الكورة كيف) .

* هو شاتها بالجمبة من قرب دائرة السنتر .

* الكورة لما طلعت من (كراعو) كانت زي ماشة على التماس.

* ولما الكورة ابتعدت منو  شوية بقت زي ماشة على الجناح .

* وفجأة المدافع المصري لقاها ورا ضهرو وبين أقدام المهاجم .

* اتخلعوا عديل .

* ديل الأهلاوية اتخلعوا خلي كمان انتو ناس قريعتي راحت ديل .

* بقول ليك الأهلي المصري اتخلع ، خلى انت (اب بنطلون ناصل) .

* معقولة زول خلع الأهلي المصري ما يخلع (الإصيفر) السوداني؟

* المهم .

* امبارح اتشرفنا بحضور جيسي وسوناجي وساسا .

* تابعوا معانا مباراة حي الوادي .

* والمباراة كانت في شمس لا يعلم بها إلا الله .

* ما عارف ليه الإتحاد العام إختار هذا التوقيت ؟

* دي ما شمس بيلعبوا فيها كورة والله .

* القاعد في المقصورة عرقان ناهيك من البيلعب جوة .

* شمس ونجيل صناعي وفي النجيل الصناعي إستاد الخرطوم .

* يعني عقاب عديل .

* لكن الحمد لله الهلال نحج في تحقيق الثلاث نقاط .

* تغلب الهلال على فريق محترم جدا .

* الوادي نيالا فريق جاهز بصراحة .

* وكورتو سمحة .

* الهلال حسم اللقاء بالخبرة .

* قلنا لن نسأل عن الأداء تقديرا للوقفة الطويلة .

* ولكن لابد أن يصحصح الهلال شوية .

* الشعلة بعيد ، محمد موسى وزنو زاد بطريقة ملفتة .

* الآن سيتوقف الدوري لأسبوع بسبب سفر الفريق القومي .

* وفي هذا الأسبوع يحتاج الهلال أن يلعب مباراة أو مباراتين وديتين.

* ونرشح أن يلعب الفريق مع حي الوادي مباراة ودية .

* التدريبات وحدها لن تعيد الفورمة.

* نعم هذا شأن فني يخص المدرب ولكن واقع الحال يفرض ذلك .

* إن شاء الله يواصل الهلال انتصاراته ويمضي في صدارته حتى التتويج.

* وفي النهاية (الكبير كبير والنعام ما بطير) .

* وأنا ما بفسر وانت ما تقصر .

* و..و..

* وسهرنا الليل وكملنا في ………(فرن آخر محطة) .