البرنس وزيراً !!
لهيب النار
هاشم الطيب
البرنس وزيراً !!
* الترشيحات تمشي تحت الجسر نحو كابتن السودان والهلال هيثم مصطفي كرار للجلوس علي كرسي وزارة الشباب والرياضة بدلاً عن الباشمهندسة بنت البوشي !!
* المثل يقول ما حك جلدك مثل ظفرك والبرنس من هذا الميدان !
* كرار ملك السنتر ويقسم اللعب زى المرارة في يوم العيد هل يستطيع هذه المرّة تقسيم العدالة بين كرة القدم وبقية الألعاب ؟
* أمر صعب ما دام علي كرسي حُكم كرة القدم زولاً لا يقبل تدخلات الوزارة في الشأن الكروى !
* البرنس ضاق طعام الهلال وهبش في قدح المريخ كيف له أن يرد الدَّين !!
* السيد الوزير من جيل تلك النجاحات في الميدان ولكن الأمر مختلف جداُ في مجال السياسة ويحتاج للحياد والعمق السياسي وخيراُ لهيثم البعد عن هذا الملعب ملعب بلا جمهور ولن تسمع كلمة سيدا !!
* النار ولعت وتنقلات اللاعبين فاحت رائحتها ثعلب الهلال غادر في هدؤ وياحليله قاموا شطبوه لا إعاره وبدون إعاده !!
* غايتو يا أطهر بيضت ليك في قفص مية الف دولار من الكاردينال والشركات تشترى ظهرك ربما صدرك للإعلان بختك يا ولد ، عين الحسود فيها عود !!
* بنك السودان يشتكي من إنعدام العملة الأجنبية وكلما تشرق شمس نسمع بالدولارات تتطاقش بيجيبوها من وين ؟ الله أعلم!
* يا ولدنا نموشي ( نمش ) لو الدفع بالدولار ربنا يعدل ليك طريقك تمشي القشه ما تعتر ليك وما تتلفت لكن لو تسجيلات المليارات ما تمشي عليها خليك مع ناس الأمل ومولانا جمال أحسن ليك تسمع صفارة الصباح والفطور !!
* شيبوب في طريقه للمريخ والمفاوض سوداكال شخصياً الجماعه يربوا ويرعوا وناس المريخ يقطفوا الثمار !
* لاعب سنتر الهلال نزار حامد في طريقه لسلطنة عمان ! ما قلنا ليك يا كاردينال أقرع الراتعات مرّه أطهر وتارةً نزار سيب الشاردات التش والغربال وكمان النمش الحمش !
* و … فجأة ظهر علي السطح بعد غياب طويل مشجع المريخ المشهور جداً الحاج أبوسوط وهذه المرّة في ثوب جديد متسائلاً عن ظهور رئيس جماعة عشاق المريخ في سوق ليبيا (عصام القداله) الذى قدم نفسه لرئاسة المريخ ! القداله ذاته منو وجاء من وين !؟ أعمل حسابك ياعصام من المعارضة قبل البداية !!
* الغربال الصغير أكد بأنه لن يغادر المريخ وشيبوب يدخل في مزاج الرئيس سوداكال .. كيل يا سوداكال للكاردينال بالربع الكبير بالدولارات والريالات واليورهات تتطاقش !!
* الكاردينال قال ليهم أدفعوا للتش العاوزه وسوداكل قال ليه ياكابتن أفتح الخزنه وشيل ما يشحن الدفار وعربيتك لو عاوز يرو موجود الدولار بالكوم وخلي بنك السودان يشتكينا للبنك الدولي !!
* نادينا نادى الزراع والعمال وثالث الثلاثة فلاح كنور وفي رواية أخرى الفلاح أتبرا أكد الجاهزية لإستئاف الممتاز والفريق تحت الطلب لإجراء الكشف الطبي ويدخلوا الميدان تحت شعار ( صحتك صحة البلد ) ..
أحزان وأفراح :ــ
شاب وسيم الطلعة عازف ماهر علي آلة الفلوت حمل آلته وتوجه نحو مركز العزل وبدأ العزف مما جعل غالبية المعزولين يتفاعلوا معه من غرفهم وآخرين يخرجوا من الحظر ويبشرون وروحهم المعنوية في السماء !! أما الأمر المحزن والنبكي الحالة الصحية التي وصل اليها الفنان الكبير عثمان مصطفي ولزم السرير وإتحاد الريس عبد القادر سالم حارج الصورة !! ونقول للإتحاد الأستاذ عثمان يناجيكم ..
