التيفو جاهزة في المفخرة…. والإعلام عايز يواكب القروبات والطفرة….

تغريدة واتساب
بقلم: معاذ ابومؤيد
التيفو جاهزة في المفخرة….
والإعلام عايز يواكب القروبات والطفرة….

ماشاء الله تبارك الله
ولاحول ولاقوة الا بالله

لم تعيش اجواء المدرجات ونفرة القروبات تحس انك في عالم تاني كل زول يقول ليك زح انا بشيل المريخ مكانك…
كل واحد عندو الرغبة يقدم روحو للزعيم !!
ناس تدفع من حر مالها من غير من ولا أذى ماكايسين اي حاجة غير رفعة الزعيم وتفوق محبوبهم
ناس تدفع في الخفاء الناقصة عندهم متمومة…..
تحس نفسك صغير وسط هؤلاء العمالقة من شفوت المدرجات..
في ناس خلت شغلها الايام دي لمعركة شطيف سطيف !!
لكن رغبتنا نديلو دش من هنا ..
شطيف شنو في السخانة دي !!!
حمام عديل ومن غير تنشيف كمان عشان يضربهم الهواء!!!
نرجع لشفوتنا في قروب المشرفين ومعركة الزي الموحد…
والحشد الموحد…
والهتاف الموحد ….
دروس في إدارة الحشود ودروس في البذل والعطاء ودروس في الرأي والرأي الاخر ماشافكم فيصل القاسم في إدارة الحوار!!!
الكل متقبل رأي الفرد والفرد متقبل رأي الكل والجميع يدينهم قريبة لجيوبهم وكل واحد عايز اسم قروبه فووووق …
تسلموا ياشفوت والبراهن عليكم والله عمرو مابندم ….
**************************
الزي الموحد جاهز وحيوزع في المدرجات للناس أصفر وأحمر يزغلل العيون ….
والصوت الموحد
فوق فوق مريخنا فوق
الناس منتظرة السبت بفارق الصبر!!
ديل شفوت مشرفي القروبات
ناس التيفو كمان ديل دروسهم ذي ناس الكلية الحربية !!
بروفات المباراة وبروفات التخريج نفس النمط
كل شئ جاهز …
وشباب كل يوم في الاستاد من عصرا بدري …
بروفات و انتظام في الحضور وعايشين جو المباراة بكل احساس
المامصدق يمشي الاستاد يشوف بعينو الناس بتسوي في شنو
بعيد عن الاضواء
بعيد عن الشهرة
انتو شباب تفرحوا عديل
شكرا للقائمين علي امر التيفو و الزي الموحد والأعلام….

**************************
أخونا الاستاذ التجاني عايز عصارة القروبات تنور صحيفة الصدى اسبوعيا معاه ابوشيبة واختارو يوم السبت من كل اسبوع عشان شغل القروبات دي تكون رسالة لكل العالم في حب الكيان عشان البعيد من النفرات يحس بالمسؤلية !!
شكرا التجاني شكرا ابوشيبة الشفوت ديل يستاهلوا العنوان الرئيسي للصحف مش صفحة بس لو بيدنا كل يوم نخت صورة واحد من الشفوت في واجهة الصحف المريخية..

*************************
ختاما
شكرا لكل شفت في اي مكان في الارض
انتم من يصنع الفرح
انتم أساتذة المدرجات
**************************
ونحن علي المدرج ونتفرج والواحد عايز يكون كل يوم مباراة وتمرين عشان مايمشي من المدرج
في شفوت معرفتهم كانت في المدرج تشوفهم اسه تقول مولودين في بيت واحد …
الناس دي شربت روح المريخ شراب
نفسي تمرين المريخ الختامي يكون في المدرجات بس يجو يقعدو وسط
الشفوت عشان ينتقل ليهم !!احساس المريخ الحقيقي…
ياكوتش بالله عليك ماعايزين تمرين تعال انت والكباتن معانا في المدرج واسالني من اداء اللعيبة والنتيجة
احساس المدرج ونفس الشفوت مختلف …..
**************************
خارج النص
شكرا لكل مشرفي القروبات
شكرا لكل شفت في كل قروب
عايزين فقط خمسين الف واحد منكم في الاستاد والماعندو حق التذكرة في ناس متبرعة ليكم بتذاكر الكلام دا للطلبة والمعاقين ..
خمسين الف شفت ولو في ذيادة مابنقول لا ..
السبت عطلة مافي عذر
غايتو متعة الاستاد مختلفة ومافي زول بحس بقيمتها الا المغتربين وناس الولايات واسالوهم نفسكم في شنو يقول ليك
لو الواحد في الخرطوم كان جوه (الجك)…
ناس مدني ناس الجزيرة الخضراء ابونيران جاهز بالبصات وناس الخرطوم جاهزين بالضيافة نسقوا مع عثمان ابونيران …..
مدرجات المريخ حتلبس حلة زاهية من أعلام وتيفو ولبس موحد منتظرنكم ياشفوت تكملوا اللوحة تعال ومعاك اخوك الشفت
السبت مباراة العبور …
يوم السبت حيحدد نكون او لانكون
يوم السبت يوم شطيف سطيف !!
جيب جردلك عشان تشطف معانا السطايفة !!!