الحكاية خلصت!!
صابنها
محمد عبد الماجد
الحكاية خلصت!!
• في عام 1957 وعلى خشبة المسرح القومي بام درمان قدم الفنان (الواعد) وقتها محمد عثمان في ليلة صيفية اغنية (بعد ايه) من كلمات اسماعيل حسن والحان محمد وردي.
• فنان واعد يقدم اغنية في حجم (بعد ايه) وهو في بدايات طريقه الفني.
• الما شاف هدف محمد عبدالرحمن (الغربال) يسمع اغنية (بعد ايه) – بصوت وردي.
• وردي دا عندنا زي شاي اللبن المقنن.
• واهداف الغربال ايضا.
• الغربال سجل في الدقيقة التانية .. تقول في زول مغالطو.
• المريخاب قبل ما يفتحوا التلفزيون لقوا الهلال متقدم.
• في عام 1964 قدم الفنان محمد وردي اغنية (الطير المهاجر) بعد ان وجد النص في احدى الاصدارات السودانية فأعجب بالنص الذي كتبه صلاح احمد ابراهيم ليلحنه وردي ويتغني به لتكون اغنية (الطير المهاجر).
• الما شاف هدف وليد الشعلة الثاني في شباك توتي يسمع (الطير المهاجر) ويشوف كمانات عبدالله عربي والتهامي ومحمدية بتعمل في شنو؟
• حارس توتي طلع من مرماه زي الشعرة من العجين .. ليلعب الشعلة الكرة في المرمى الخالي.
• في عام 1969 قدم الفنان محمد وردي على تلفزيون السودان لأول مرة اغنية (من غير ميعاد) للشاعر الذي كان طالبا في الثانوي العالي وقتها التجاني سعيد.
• عثمان ميسي عمل نفس الشيء.
• (من غير ميعاد).. شارك في المباراة (ومن غير ميعاد) سجل الهدف الثالث في شباك توتي.
• تتخيلوا ناس المريخ لغاية الهدف الثاني كانوا عشمانين في (الدوري).
• عشمانين في الحكم.
• وفي شكوى الخرطوم الوطني.
• الجماعة ديل طبعهم كعب ..اصلو ما تعشّمهم في شيء .. يتلحوك ..لمن تقنع منها.
• عندما كان الفارق بين الهلال والمريخ (8) نقاط لصالح الهلال قبل مباراة القمة الاخيرة ، شعرنا بشيء من الفتور ومات احساسنا بالدوري ، غاب عنّا القلق ، وربما الرغبة في الفوز بالدوري.
• طبعا في ناس بختلف معاهم بشدة .. في ناس بقولوا ليك يعني شنو الدوري الممتاز؟ .. ما كل مرة بنشيل الدوري حصل شنو؟
• الكلام دا غلط.
• بطولة الدوري الممتاز بطولة بتمثلنا ..وبتمثل البلد .. وهي تاريخ سوف يحفظه الاجيال.
• ما تقعدوا تهونوا في البطولة وقت تضيع منكم تقعدوا تكوركوا.
• الغريبة ..الناس البقولوا ليك بطولة الدوري الممتاز يعني شنو؟ هم اول الذين يهاجمون الهلال اذا فقد البطولة.
• لو ما فزت بالدوري بتاعك .. عاوز تفوز برة كيف؟
• اضفر الجماعة .. وابقى مارق.
• عندما خسر الهلال امام المريخ وتعادل بعد ذلك الهلال مع قمة بورتسودان حي العرب والهلال ، شعرنا بالخوف وعرفنا قيمة الممتاز بعد ان اصبح الفارق بين الهلال والمريخ (3) نقاط فقط … خسارة الهلال لأية مباراة كان يعني ذهاب اللقب للمريخ.
• اقول ليكم شنو؟
• والله بقيت ما بقدر اتابع مباراة للهلال.
• الاعصاب انتهت.
• والشوف ذاتو بقى كعب.
• الهلال اقال مدربه البرتغالي جواو موتا لتزيد مخاوفنا .. فليس من السهل ان تقيل مدرب يتصدر الدوري قبل (10) مباريات من نهاية الدوري.
• الاهلي المصري اقال موسيماني بعد ان كان يمكن ان يتصدر الدوري بفارق (5) نقاط من الزمالك ليهدي الاهلي المصري الصدارة للزمالك بفارق (3) نقاط اذا انتصر الاهلي المصري في مبارياته المؤجلة.
• وقت الكلام دخل الحوش – القعدة غلبتنا .. ما عرفنا نمشي وين؟ بقينا نتابع أي مباراة وايدنا في قلبونا.
• نفتح التلفون.
• ونقفلو تاني.
• اعصاب مافي.
• والله نحن الهلال دا ما بنستحمل فيه أي حاجة.
• الدنيا تمسخ لينا وقت يتعادل ساكت.
• مستوى الهلال في المباريات الاخيرة كان غير ثابت مرة فوق ومرة تحت في الوقت الذي ظهر فيه المريخ بمستوى ممتاز في الفترة الاخيرة.
• هذه حقيقة.
• المريخ لم يهزم في الدوري .. المريخ فاز على الهلال مع ذلك جاء الهلال وفاز بالدوري.
• الاندية الكبيرة كدا.
• تخسر.
• وتتعثر.
• والجمهور يغضب.
• والأعلام يقوم.
• وفي النهاية الهلال يشيل الدوري.
• يشيل الدوري من منو؟
• من فريق لجان الاتحاد العام تحت سيطرته.
• فريق عندو مجلسين.
• قالوا عملوا ليه مجلس ثالث.
• فريق معسكر 99 يوم في القاهرة.
• ليالي الحلمية بالأجزاء الستة ما عملت (99) حلقة.
• حازم مصطفى صرف على المريخ اكثر من 360 مليار في هذا الموسم.
• غير صرف سوداكال.
• والدوري (هلالابي).
• الممتاز ازرق.
• الهلال عندو استاد زي ما بقول الكتاب بمواصفات الفيفا .. وعندو ملعب رديف مع ذلك بيلعب في جبل اولياء والابيض وعطبرة وبورتسودان.
• مع كل هذه العراقيل والمتاعب .. الهلال في النهاية فاز بالدوري.
• الهلال جعل مباراة المريخ الاخيرة (ودية).
• الهلال خربها على حكم المباراة .. الذي كان لن يبخل على المريخ بضربات الجزاء.
• هسع ما بكون قصر معاهم.
• في ظل المتاعب التى واجهت الهلال في هذا الموسم .. كان يمكن للهلال ان يفقد الدوري.
• لو فقدنا الدوري كان نعمل شنو ؟ ونقول ايه ؟
• نودي وشنا وين ؟
• اذا فرط الهلال في الدوري بعد ان كان الفارق بين البطل والوصيف (8) نقاط… الموضوع كان سوف يكون كارثة.
• كارثة عديل كدا.
• أي مباراة بقينا نتابعها (متاوقة) الموية دي والله مسخت علينا.
• نتابعها بالرقراق.
• اكضب عليكم.
• كنا خايفين … التحكيم ما مضمون واتحاد معتصم جعفر ممكن في أي لحظة يدبر ليه شكوى ضد الهلال عشان يفقد الازرق الدوري مثلما حدث في التواطؤ الشهير الذي حدث من مريخ الفاشر .. وقبل ذلك ما تم من سيناريوهات اعدت من اجل ان يكسب المريخ الدوري حينما كسب شكوى هلال كادوقلي والامل عطبرة فانحسب الهلال من الدوري بعد من اجل عدالة المنافسة.
• عدالة المنافسة ناس كابو ما بعرفو منها إلّا الهلال يلعب برة استادو.
• دا فهمهم في عدالة المنافسة وتكافؤ الفرص.
• دخلنا في حتة عرفنا فيها قيمة الدوري الممتاز – ربما لو لم يكن الفارق بين الهلال والمريخ (3) نقاط فقط لما حدث كل هذا الترقب لنهاية الدوري الممتاز.
• ناس المريخ خلو شغلتهم وبقوا يتابعوا في مباريات الهلال.
• مرة عشمانين في حي الوادي.
• ومرة في توتي.
• حرشوا الخرطوم الوطني على شكوى الهلال رغم هبوط الخرطوم الوطني.
• العملتوها رقدت يا ناس الخرطوم الوطني.
• تاني الدوري الممتاز في قناة النيلين ما ح تشوفوه.
• تابعنا مباريات الهلال الاخيرة بتوجس .. وحذر .. تقول بتابع في الدوري الانجليزي.
• وقت نلعب مع توتي .. توتي بتبقى لينا زي مانشستر سيتي.
• كفاح بقى لينا زي جوارديولا.
• حسينا بالدوري.
• وطعمه.
• وفرحته.
• ونحن الآن سعداء بكل ما حصل لنا في هذا الدوري.
• لولا هذه (المشقة) ما كان حسينا للدوري بطعم.
• مع ذلك بنقول لناس الغربال وارنق تاني ما تدخلونا في حتة زي دي.
• نحن اعصاب للكلام دا ما عندنا.
• الدوري ما مضمون.
• والكورة مجنونة.
• والشكاوي.
• والتواطؤ.
• والحاجات التانية.
• احسموا من بدري.
• لولا ان فارق النقاط بين الهلال والمريخ كان (8) نقاط .. كان يمكن ان يفقد الهلال الدوري في الاسابيع الاخيرة.
• الرصيد الذي كان يمتلكه الهلال في الايام البيضاء نفع الهلال في الايام السوداء.
• لهذا نشكر جواو موتا الذي اوصل الفارق لهذا الرقم .. رغم انه فرط في الايام الاخيرة في نقاط ساهلة.
• ونشكر خالد بخيت الذي عرف كيف يفوز بالدوري الممتاز بفارق (3) نقاط … ويقود الهلال في (10) مباريات لم يفقد الهلال فيها غير (4) نقاط.
• نحن سعداء بذلك.
• فرحانين.
• مبسوطين عديل كدا.
• عندى معزة خاصة للدوري الممتاز.
• بطولة الدوري الممتاز عندي ما بتقل من البطولة الخارجية.
• اقبل ان يخرج الهلال من البطولات الافريقية .. لكن لا اقبل ان يفقد الهلال بطولة الدوري الممتاز.
• إلّا الممتاز يا هلال.
• الدوري حقنا.
• نحن اتعودنا على كدا.
• قمنا لقناها كدا.
• عشان كدا اذا ضاع الدوري روحنا بتمرق.
• اسوأ ما في فترة الكاردينال انه اهمل الممتاز.
• الكاردينال اهمل الممتاز اداريا وفنيا.
• ثلاث سنوات على التوالي فقدنا الدوري في وجود الكاردينال.
• تاني ما نبقبل تفريط في الدوري.
• من هسع قرطوا على الدوري القادم.
• عاوزين هلال يهز الارض.
• شرق.
• وغرب.
• شمال.
• وجنوب.
• افريقيا ماشين عليها.
• حقنا ما بروح في افريقيا.
• ………………….
متاريس
• قالوا المسرح الذي تم تجهيزه للمريخ في استاد الخرطوم بعد فوز الهلال على توتي اتحول صيوان بكاء.
• اول وصافة رسمية لهيثم كابو.
• مبروك يا كابو.
• ممكن نعتمدها ليك يا كابو .. رغم ان مجلسكم اصلا غير شرعي.
• الجاكومي بتفاصح ساكت.
• زول حفر بس.
• شغال حفر في الحرية والتغيير.
• وحفر في مجلس المريخ.
• وحفر في الاستاد.
• الجاكومي اتفق مع الدعم السريع وقال اعلن الحرب على الهلال.
• في الايام الماضية فاتتنا احداث كثيرة.
• سوف نعود لجمعية الهلال العمومية للمجلس المنتخب.
• وقمة حميدتي ح نرجع نكتب عنها.
• …
• ترس اخير : احلى دوري والله.
ماكلمتنا عن الخرطوم قيت ياود عبدالماجد المؤامرة التي تمت بين الدلاقين وشقيقهم الخرطوم الدلقوني لازاحة الغربال عن صدارة الهدافين. الحكاية كانت اوضح من الشمس في رابعة النهار. لماذا يتحفظ كتاب الهلال عن فضح مثل هذه الخساسات. دي لو حصلت ضد المريخ لملأ كورال الدلاقين الأرض صراخا وضجيجًا.