الزول الواقف في النص

صابنها

محمد عبد الماجد
الزول الواقف في النص
• الطيب ود جرتقة ، جابوه الخرطوم عيان – نزل عند ناس خالتو – ما خالتو طوالي.
• خالتو باللفة.
• وقت يحكوا ليك عن علاقة القرابة التى تجمعهم بيهم – نفسك يقوم.
• المهم في النهاية.
• بعد ما تنزل بالواحد.
• وتطلع بالاتنين.
• الطيب ود جرتقة بعد (الجبدة) دي بتطلع الزولة دي (خالتو).
• الطيب ود جرتقة جابوه الخرطوم عيان – حالتو زي الموجة بتاعة الراديو وقت تكون ما مظبوطة.
• مرة تجيب ليكم ام درمان.
• ومرة صوت العرب.
• ومرة تمرقكك في بي بي سي.
• الطيب ود جرتقة بيجيب ليه في كلام من برة رأسو.
• شيء تفهمو.
• وشيء ما تفهمو.
• مرة بتكلم سياسة.
• ومرة بتكلم في الكورة.
• ومرة يدخل ليك في اغنية.
• يطلع من موضوع ويدخل في موضوع.
• اها الطيب ود جرتقة في الحالة دي 59 يوم.
• اهلو ما خلو مستشفى.
• حايمين بيه من مستشفى لي مستشفى بدون تأمين صحي.
• قطع قروشهم كلها.
• القدامهم والوراهم.
• اخر حاجة – قام مات ليهم.
• ما عرفوا يدفنوه وين؟
• ناس قالوا ادفنوه قبلو.
• وناس قالوا يدفنوه في البلد.
• اسبوع قاعدين يتغالطوا في الحتة دي.
• اخر حاجة (المرحوم) قام – وقال ليهم عليكم الله ادفنوني في اي حتة – ما معقول انا اسبوع كامل بالحالة دي.
• في كل هذه الايام كان بيت ناس خالتو مفتوح.
• البيت يستقبل هايس.. هايس….زي موقف جاكسون.
• مرة لوري.
• ومرة قطر.
• العالم كله اتكسر في بيت خالتو عشان العزاء.
• ناس خالتو قاعدين يفتشوا في (الرغيف) متل (الرصيد).
• نفسهم اتقطع.
• يقوموا من اربعة صباحا.
• باعوا التلاجة.
• والتلفزيون.
• وفكوا المراوح.
• وعندهم (دهيبات) ورثوها من حبوبتهم – فكوها.
• عدمو نفاخ النار.
• ما خلوا شيء.
• المهم البيت بتاعهم كان مفتوح للبكاء دا حكاية بتاعة 21 يوم.
• وقبل الـ 21 يوم – كان الطيب ود جرتقة راقد معاهم في البيت 59 يوم.
• ما خلوا ليه (عصير).
• والطيب ود جرتقة كان بحب الفواكه وشوربة الفراخ.
• كان بقوم من الصباح ويقول ليهم جيبوا لي فواكه واعملوا لي شوربة فراخ.
• يضرب ليه الفواكه والفراخ متل (الطنحية).
• نشف ريقهم.
• ومرات الطيب ود جرتقة بقول ليهم جيبوا لي (باسطة).
• يضرب في الباسطة وهو عندو السكري.
• ما شغال بالسكري الشغلة.
• يضرب في الباسطة لمن مات.
• ابوهم ما خلى ليه (سلفية).
• كل ذلك عشان ينستر.
• وعشان حاله ما ينكشف.
• جماعتكم مرقوا من (الورطة) دي بكرامة البليلة.
• الامور مشت.
• بعد شهر ونص ….جاهم (السريح ود حسن) في حالة اصعب من حالة (الطيب ود جرتقة).
• حالتو صعبة.
• (السريح ود حسن) بين الحياة والموت.
• وكانت قرابة السريح ود حسن بيهم نفس قراية الطيب ود جرتقة.
• كانت خالتو باللفة.
• السريح ود حسن انكسر عندهم 3 شهور.
• اتعالج.
• وطلع الجواز.
• والرقم الوطني.
• وقدم للوتري.
• وكان كل مرة بقول ليهم والله ما تجيبوا لي (سمك) اموت ليكم هنا.
• عندي كورونا.
• ناس خالتو يتجاروا على (السمك).
• يضرب السمك …يطلب (عنب).
• يقول ليهم والله ما تجيبوا لي (عنب) اموت ليكم هنا.
• ناس خالتو عارفين (السريح ود حسن) لو مات ليهم هنا – البلد كلها بتنكسر عندهم.
• بتفتح ليهم طاقة جديدة.
• ورغيف مافي.
• والسكر طار السماء.
• والزيت ولع نار.
• والمواصلات بقت صعبة – عاوزة ليها صرفة صندوق.
• عشان كدا – السريح ود حسن كل ما يجيب ليهم سيرة الموت – يتجاروا عليها.
• اخر شيء قالوا يحسموا الموضوع دا ويرتاحوا منو.
• قاموا عملوا شنو؟
• قاموا عرسوا ليه (بنتهم) وقسموا ليهم الصالون.
• السريح ود حسن هشع عندو سبعة عيال.
• السريح اتحمل.
• بقى (رغيف) ساي عاوز ليه (سلفية).
• زولكم عمل ليه ركشة – يوم يفك الركشة …ويوم تفكو الركشة.
• شغال كدا بس.
• الحياة بقت صعبة.
• والله الواحد لو عندو (طفلين) بقى ما بقدر عليهم.
• شيء مدارس.
• وترحيل.
• ودكاترة.
• الهلال هسع عندو (6) محترفين…ما عارف بصرف عليهم كيف؟
• بصرف عليهم بالعملة الصعبة.
• وعندو جهاز فني فيه 4 اجانب.
• ديل يتصرفوا معاهم كيف؟
• مع الصرف دا – لازم تتحقق الانتصارات.
• يعني ما معقول بعد كل هذا الصرف ما تتأهل من مرحلة المجموعات.
• لو ما اتأهلنا لا قدر الله تبقى كارثة.
• نقبل وين نحن.
• والله نحن لا بنعرف صن دوانز.
• ولا بنعرف مازيمبي.
• هلالنا دا ما بيسأل في فريق.
• لا تقول لي الاهلي.
• ولا تقول لي الترجي.
• نحن ما عندنا اعظم من الهلال.
• الهلال بعد صرفو دا لو فرط في الدوري الممتاز يبقى مشكلة.
• قناة فضائية.
• وملعب تلعب فيه كل الاندية والمنتخبات السودانية.
• ملعب معتمد.
• وما نتأهل من مرحلة المجموعات.
• ما نشيل الدوري.
• تبقى كارثة.
• فريق الخرطوم الوطني دائما اصبح يعرقل الهلال في المواسم الاخيرة.
• الموسم الماضي وقبل الماضي تسبب فريق الخرطوم الوطني في حرمان الهلال من لقبه المفضل.
• السنة دي احسموا الدوري من بدري.
• احسموا الخرطوم الوطني.
• الدوري يتجسد في حسم المواجهات مع الخرطوم الوطني.
• زمن كان الاهلي شندي هو البحدد بطل الدوري.
• في الفترة الاخيرة اصبح فريق الخرطوم الوطني الذي يحدد اتجاه الدوري الممتاز.
• الهلال يلعب اليوم امام الخرطوم الوطني.
• والمباراة يجب ان يكسبها الهلال.
• وان يحسمها من الشوط الاول.
• ما تقعدوا تتمهلوا وتضيعوا في الوقت ساكت.
• بعدين الموضوع يبقى ليكم صعب.
• احسموا المباراة من الشوط الاول.
• اوعكم من الهدف الوحيد.
• هدف واحد بحرق اعصابنا.
• سجلوا اكثر من هدف.
• الخرطوم الوطني كسبت في المباراة الاخيرة فريق مريخ الفاشر.
• قبل هذه المباراة – الخرطوم الوطني خسرت عدد من المباريات تسببت في اقالة او استقالة ابراهومة.
• ابراهومة مدرب شاطر …وبعرف يلعب جيد امام الهلال والمريخ.
• بقفل صاح.
• وممكن يخطف ليه هدف.
• الخرطوم الوطني اليوم سوف تلعب امام الهلال بدون ابراهومة.
• يجب الانتباه لذلك.
• المباراة في ملعب الهلال.
• العودة الى استاد الهلال بعد هذه الغيبة تشكل دفعة قوية للهلال.
• تعطي الهلال دافع كبير.
• خاصة ان الهلال سوف يلعب يوم الاربعاء في نفس الملعب ونفس التوقيت امام مازيمبي.
• الانتصار على مازيمبي يمكن ان يتحقق في مباراة اليوم.
• عاوزين جيسي.
• وعاوزين نزار.
• عاوزين بوجبا.
• عاوزين تشكيلة خليط بين الخبرات والعناصر الجيدة.
• الشغيل طبعا لاعب كبير …ووجوده امام مازيمبي مهم.
• لكن برضو في عناصر ممتازة في وسط الهلال.
• في مجاهد فاروق.
• وبوجبا لازم يلعب.
• الغربال ..مباراة اليوم يمكن ما يبدأ.
• المحاظفة على الغربال امر مهم.
• ما ترهقوا الغربال.
• الله يحفظ الغربال ويغطي عليه.
• ممكن نشوف عيد مقدم.
• وممكن نشوف انداي.
• وفيني كومبي.
• ويا ريت محمد موسي يرجع.
• عشان محمد موسي لاعب المباريات الكبيرة.
• الجامايكي الفيس باول ..برضو مفروض يشارك عشان يكتسب حساسية المباريات.
• الفيس ما ساهل.
• ومفروض يلعب.
• نتمنى ان نشاهد الدالي.
• لاعب عنده حلول.
• وعنده عكسيات وتصويبات قوية دائما هي في المرمى.
• فارس تعرض لهجوم شديد..وهو كان شال الهلال والمنتخب الوطني الفترة الماضية كلها.
• فارس لاعب كبير.
• وما فيه كلمة.
• ……………….
متاريس
• الله ينصر الهلال.
• ويبعد عن الفريق الاصابات.
• مباراة اليوم تجربة مفيدة للهلال قبل مباراة مازيمبي.
• تجربة (رسمية).
• ما عاوزين فيها تهاون.
• او تساهل.
• احسموا من بدري.
• كشروا عن انيباكم.
• واستفيدوا من اي لحظة.
• العودة لاستاد الهلال مكسب.
• العودة للوطن الصغير.
• نسيت اتكلم ليكم عن الزول الفي نص.
• ما مشكلة.
• بكرة نواصل.
• ………..
• ترس اخير : بكرة يوم اخر.