السحب جنسية كلتشي منو؟

اصل الحكاية

حسن فاروق

* كل حاجة عندنا بنكتشفها بالصدفة حتي جنسيتنا الماعندها وجيع .. بنكتشف أنه ادوها كده وسحبوها كده .. والسحبها منو او عشان نكون دقيقين الطلب سحبها منو ؟ الإجابة .. الله اعلم .. لانه سحب الجنسية لا يتم إلا بقرار من رئاسة الجمهورية .. جنسيتنا البوزعوها على اللاعبين الاجانب حسب طلبات بعض الاداريين من أصحاب النفوذ .. وليس طلب الاتحاد السوداني او كما يجب أن يكون باعتبار أن الاتحاد السوداني هو الجهة الوحيدة البتحدد احتياج التجنيس من عدمه .. وهل سيضيف للمنتخب ولا لا .. ولأن للنفوذ وأصحابه كلمتهم أعلي من المسؤول الأول عن التقييم الفني لعملية تجنيس اللاعبين الاتحاد السوداني لكرة القدم .. تم تجاوز شروط التجنيس .. وصارت تمنح للراغب من أصحاب النفوذ .. لنجد وبدون مفاجأة ان اللاعبين الاجانب في الفريق مجنسين ومحترفين غطوا على اللاعب الوطني .. وجانا وقت بقينا نلقي في الملعب ستة لاعبين اجانب وخمسة وطنيين .
* ولما موضوع التجنيس بقي سمك لبن تمر هندي .. ووصل اللف والدوران حتي خانات ممنوع تواجد اجانب فيها زي حراسة المرمي .. وبقي ما عندنا مهاجمين للمنتخب .. الحكومة الفتحت التجنيس بدون العودة للجهة الفنية المسؤولة قررت تقفلو، وفعلا قفلتو .. ده القرار .. لكن التجنيس ماوقف .. يعني ممكن يسحبو جنسية لاعب عشان يسجلو لاعب تاني .. وفي النهاية القرار قرار حكومة ماقرار اتحاد ..
* ولا استشارة اتحاد .. الكلام حسب قربك وبعدك بتاخد الجنسية .
* ولأنه الموضوع ماشي حسب الطلب وبدون إشراك للاتحاد السوداني لكرة القدم .. شفنا أعداد كبيرة من اللاعبين برجعوا بلدانهم بالجنسية السودانية .. وفيهم واحدين بجو راجعين تاني بالجنسية السودانية زي باسكال وكلتشي .. مشو لعبو بره السودان .. وجو راجعين وتم تسجيلهم مجنسين.
* لكن الصدفة مرات بتكشف المدسوس .. والصدفة فقط هي الكشفت موضوع جنسية باسكال المسحوبة ومتين؟بعد مااتسجل بيها ولعب مع المريخ .. والصدفة برضو هي الكشفت جنسية كلتشي المسحوبة من قبل اربعة سنة .. واللذيذ في الموضوع أنه كلتشي هو الاكتشف سحب جنسيته وبالصدفة، لما مشي يطلع رقم وطني قالو لي يامان رقم وطني بتاع الساعة كم انت جنسيتك اتسحبت منك قبل أربعة سنة .. اربعة سنة بدون هوية وهو يلعب في السودان .. لعب في اهلي شندي بهوية سوداني مجنس وهو ماعندو الجنسية.. ولعب في المريخ بذات الهوية وهو ماعندو جنسية .. اربعة سنة الجنسية مسحوبة وبصراحة مامعروف الاتحاد السابق عارف ولا ماعارف، وبصراحة أكتر مامعروف مجلس المريخ وقت انسحبت الجنسية عارف ولا ماعارف … يبقي السحبها منو؟ نحاول نشوف بكره.
* اواصل

حمل تطبيق كورة سودانية لتصفح أسرع وأسهل

لزوارنا من السودان متجر موبايل1

http://www.1mobile.com/net.koorasudan.app-2451076.html
3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details…

13230 حملو التطبيق

على متجر mobogenie

http://www.mobogenie.com/download-net.koorasudan.app-357365…
5000+ حملوا التطبيق