في الصمت كلام
محمد عثمان بلل
الطرد زاتو أحياناً لي خير ..!!
• أول حاجة نهنيء الوصيف على النتيجة التي خرج بها من المغرب.
• وتاني حاجة انتو عارفين طرد اللاعب المغربي كان لي خير.
• قولوا لي عشان شنو ؟
• عشان الوداد دا في أرضه ما بغلب إلا بـ(6) ولي فوق.
• يعني الطرد انقذكم من فضيحة كبيرة.
• اذا لعب الوداد كامل العدد كان ح يعمل ليكم مشكلة كبيرة.
• من الليلة لازم تنظموا الاحتفالات.
• ابتهاجا بالخسارة بهدفين فقط.
• الوداد دا فريق شرس .. ومفروض في ام درمان يخرج فائزا أقل حاجة بخماسية.
• بس الحظ خدم الوصيف.
• المهم الوصيف اصبح في اجازة طويلة من اللعب الخارجي.
• ايييييك لحدي الموسم الجاي.
• سيدالبلد الممثل الوحيد للسودان في البطولات الخارجية.
• عرفتو سيدالبلد الحقيقي منو ؟
• عشان ما تطلقوا الألقاب ساي.
• نحن ناس بيان بالعمل.
• نرجو من جماهير الوصيف الاستعداد لاستقبال بعثة الوصيف العائدة من المغرب.
• ناس الوصيف برضو ما مصدقين الخروج بالنتيجة دي.
• بعد المباراة كانوا فرحانين اكتر من المغاربة.
• الوصافة بتعمل أكتر من كدا.
• يا الوصافة بسحروك.
(صمت اخير) ..
• جمعة سعيدة على الجميع.
• في يوم الجمعة أكثروا من الصلاة على أفضل خلق الله.
• (اللهم صلي وسلم على حبيبك ونبيك محمد .. عدد خلقك .. ورضا نفسك .. وزنة عرشك .. ومداد كلماتك).
