عامنا المنصرم باقيلو بس يومين كان عاما كبيس ضايقنا في التموين شاحدين الكريم باعثنا يوم الدين في العام الجديد نسعد نكون غانمين
*** في العام الجديد ان شاء الله نلقي مرادنا نصمد في المحن نسلك طريق اجدادنا نتناسي القديم ننهض نعيد امجادنا نخلص للكريم نتجلي لي ميعادنا
*** نشرب شاي قرض لا هبهان لا قرفة نعم الانتشار كل زول مجود حرفة المابي العمار يمرق يفتش صرفة والفلس ينهزم يتغابي فينا العرفة
*** في العام الجديد ان شاء الله ما نتعكر نرسم للخطط في كل مجال نتفكر لو كل زول سخي لي عملو بادر بكر ينعم بالرضا من الخلق يتشكر
*** في العام الجديد يا رب تتم القول السمك ينتشر نتفادي موية الفول يرجع في الوطن الدعم للبترول ندعوك يا كريم الخير يكون موصول
*** العام إنصرم باقيلنا بس فد يوم داهمنا المرض حامينا فيهو النوم ندعوك ياكريم تكرم جميع القوم بي جاه الرسول خير البرية عموم
*** في العام الجديد اليوم خلاس خشيت الناس رفهت وانا مابرحت البيت ميرود بي فهم متغطي من ما جيت راقد في السرير لانمت لا اتعشيت
*** العام الجديد داهمنا بي النزلات لا رفهت فيو لا حمت في الرحلات لاشاركت زول لا شفت عدادات شاحد الله الكريم ينصفني في الجايات
*** بسم الله ابتديت النمة والإلهام شاحدك ربي يوت السنة دي تبقي تمام الأربع كمل أول مرافي العام قادر ياكريم هون لنا الأنعام
*** داهمنا الخميس في العام ده يومنا التاني والعمر بيمر سنوات شهور وثواني بي فضل الإله لانشوف ألم لا نعاني نخلص للكريم بي كل صمود وتفاني
*** في العام الجديد الليلة أول جمعة ندعوك يالطيف لانشوف حزن لادمة في السمح الجميل الناس تكون مجتمعة ارزقنا الصلاح في القول وحسن السمعة
*** اصبحنا السبت وصحينا من النوم لسة الراس ملان والهم مسردب كوم ندعوك ياكريم تبعدنا من الشوم نسعد بالجديد نتهني بالمرسوم
*** خامس يوم (أحد) حاننزل الأعمال العمر بيمر والرجعةتاني محال ندعوك ياكريم تدينا حسن الفال أرزقنا الصلاح ثم البنين والمال
*** الإتنين صبح يوم ستة من العام شاحدين الكريم أيامنا تبقي تمام ينصلح العمل والتقوي تبقي سنام للعفو والرضا وزيارة الأرحام
*** اصبحنا التلات والعام قفل إسبوع بتمر السنين بي سرعة مافي رجوع ندعوك ياكريم جنبنا .. (لحس الكوع) في العام الجديد .. لانشوف مرض لاجوع
*** الأربع حضر في السنة دي تامن يوم والشارع ملان نكبات حزن بالكوم ندعوك ياكريم قاهر قصور الروم ادينا الأمان وانجدنا يوم اللوم
*** الخميس يوم تسعة من يناير اليوم الضيق منتشر والسوق مكشر وفاير المريخ هناك حايلاقي تيم الباير الطف ياكريم خليهو يظهر ناير
