الغربال .. الناس جروحهم (٩) وأنا لي جروح (٩٠) !!
بالعربي الكسيح
محمد الطيب الأمين
الغربال .. الناس جروحهم (٩) وأنا لي جروح (٩٠) !!
* من غرائب بعض الناس أنهم في شهر رمضان (يأكلون) في السحور .
* في ناس في (السحور) بتأكل وفي ناس بتشرب وفي ناس ما بتتسحر اصلاً.
* أذكر .. كان لنا صديق في رمضان بتسحر ب(الشوف) .
* لما يجي ينوم بيخت جمبو صحن (دمعة) وبينوم .
* وقت السحور بيقوم يعاين للدمعة خمس دقائق وبيرجع ينوم تاني .
* ده اسمو (السحور بالنظر) .
* والغريبة تاني يوم الصباح بيقوم نشيط وشبعان .
* المهم .. أنا أمبارح عملت نفس النظرية دي .
* اتعشيت بصورة توقيع (حمادة عبدو) ونمت.
* وصحيت مع آذان الفجر فتحت التلفون عاينت لصورة (حمادة عبدو) وتاني نمت .
* حصل قابلك زول (بشبع) لو شاف صورة ؟
* والله أنا أمبارح صورة محمد عبد الرحمن الشهير ب(حمادة عبدو) خلتني شبعان بدون أكل.
* ما أكلت وشبعان .
* أعاين في الصورة وأشرب في البيبسي عشان أهضم.
* عايز أهضم وبطني فاضية .
* في النهاية اكتشفت إنو (بطني جيعانة) لكن (قلبي شبعان) .
* يعني هضمت (الفرحة) بالبيبسي .
* الشبع في القلب ما في البطن .
* ويجي واحد تمهيدابي داقي ليهو سستم يقول ليك : (الغربال قال لو لعب في السودان ما بلعب إلا للمريخ) .
* هاك المريخ ده .
* أنا ما عارف لمتين (لعيبة الكورة ديل ح يفضلوا يغشوا في جماهير المريخ كده) ؟
* أبو عشرين قال ليهم : (انت يا الدم لونك أحمر) ، وخلاهم عايشين مع (لون الدم) وجا ووقع للهلال .
* (حمادة عبدو) قال ليهم : (أنا لو لعبت كورة في السودان ما بلعب إلا للمريخ) ، وخلاهم عايشين مع الوهم ده .
* كده وريني المِيزة العندك شنو البتخلي الغربال ما يلعب إلا للمريخ ؟
* المِيزة شنو يعني ؟
* خلاص يعني من بلوغك الأدوار المتقدمة في الأبطال ؟
* مش ياها المباراتين البتلعبوها سنوياً وبطيروا من التمهيدي دي ولا في حاجة تانية ؟
* عندك شنو عشان الغربال ما يلعب إلا ليك أنت ؟
* كده اديني مِيزة واحدة .
* ما تشبكني لوح الشرف في الكاف ومانديلا وقصب سكر .
* كأسك بتاع (٨٩) ده أنا ذاتي عندي فيهو رأي.
* قوم على حيلك .
* محمد عبد الرحمن (ود الهلال) .
* أنا محمد ده لما سجلتو الزمن داك أنت مجروح من الوحدات الأردني بالسبعة.
* والله يا جماعة مرات بيجيني إحساس إنو السوباط والطاهر يونس (قاصدين المريخ عديل) .
* أمبارح المريخ زي الساعة (٩) نشروا صورة (تجديد) التش وبيبو.
* نشروا الصور وفرحانين فرح زي التقول سجلوا التش من الأهلي المصري وبيبو من الرجاء المغربي .
* نشروا الصور الساعة (٩) ، قاموا ناس الطاهر يونس الساعة (١٠ وربع) نزلوا صورة (حمادة عبدو) .
* طوالي المريخاب مشوا ناموا.
* أقصد عملوا فيها نايمين.
* أمبارح ما في مريخابي نام .
* والله صحي .
* تدخل في النوم تجيك صورة الغربال ناطة.
* كابوس .
* صورة التش (لفت في الفيسبوك حوالي ساعة كده وفجأة جات صورة الغربال واختفى التش وصورتو) .
* صورة الغربال عملت حظر تجوال لأي تمهيدابي.
* شافوا الصورة التش ذاتو مسخ ليهم .
* صورة الغربال بالنسبة ليهم كانت زي (موت زول عزيز) .
* وبيني بينك حارة والله .
* بكى جد .
* يقول ليك : عالجناهو وما قصرنا معاهو وجا باعنا.
* يبيع دستة زيك .
* يقعد معاك عشان كل سنة قبل ما البطولة الإفريقية تبدأ زي الناس أنت طاير؟
* هو أنت كونو الغربال يلعب معاك يفترض تفرح .
* تعالجوا وتعمل ليهو أي حاجة .
* بحقو.
* لو ما الغربال والله أنت البطولة العربية يغلبوك ويدقوك وترجع زيك وزي أي حمام عربي .
* وتعال أناقشك.
* الغربال أنت بتعرف ليهو شنو ؟
* الكاردينال شطب الغربال (حماقة ساكت) وجاء السوباط صحح غلط الكاردينال .
* بعد ده أنت عالجتو ولا هو العالجك ده ما موضوعنا .
* يقول ليك رابطة قطر عالجتو.
* اها ونحن نعمل ليها شنو لو عالجتو يعني ؟
* نرجع ليهم حق العلاج مثلاً ؟
* يا زول ما تقوم تشوف شغلتك الله يرضى علينا وعليك .
* بالمناسبة .. ياداب من بكرة ح نبدأ نكتب عن الغربال .
* دي مقدمة ساي .
* ح نكتب عن عملية تسجيل (حمادة عبدو) وهي العملية التي أطلقنا عليها نحن وأولاد حلتنا إسم : (اقيس محاسنك بمن يا الدرة الما ليك تمن) .
* أطلقنا عليها إسم (الناس جروحهم ٩ وأنا لي جروح ٩٠) .
* وتبكو بس .. عين قطرة وعين مس .
* و..و..
* والكنت قايلو فات زمان رجعتو …. (بعد إتعالج) .
اها حمدة عبدو دة ح يمسح ليك الصفر يا كسيح ومسبخ
انت زول ظريف يا محمد والله وقريت مقالتك دي اكتر من مره من شدة مبسوط منك لانك زول حق وسالت سؤال حق انه ابو عشرين قال الدم احمر ومشي الهلال والغربال قال ما بلعب غير للمريخ ومشي الهلال ..ابو عشرين صدق في انه الدم احمر لانه فعلا الدم احمر الا لو عاوز تغيره ومشي الهلال وحسب كلامه للعالميه مع انه عمري ماشفت زول وصل للعالميه مع الهلال ..هو الهلال زاتو من شدة المحليه قطر السكه حديد غيروه بما يتناسب والعالميه والهلال لي هسي في المحليه ويالله يالله يمش .المهم الغربال طلع من عندكم مطرود ومهان وانت واحد من الناس ما خليت ليه اصل ولا فصل ايام بلعب للمريخ والان صورته بتنومك والله ضحكت ضحك لانك زول ظريف وما بتعرف كلمة صفوه ودي الكلمه الرايحه ليكم عمركم كله ..عرفت العندنا شنو بخلي الناس تلعب لينا ..اننا صفوه ومصنع للنجوم واحسبها معاي كده كم لاعب مشي الهلال من المريخ ونجح …ولا لاعب ..كم لاعب سجل للمريخ من الهلال وفشل..ولا لاعب حتي البرنس بتاعكم جي المريخ مهان ومطرود ولقي الاحترام نحن الصفوه نادي القيم والانجازات ..عليك الله يا ود الطيب كان ما علقت الصوره في صالونكم ..وبكره بتكسرها وتحرقها وتحميك النوم
اما ابو عشرين في قلوب كل المريخاب لانه زول شريف ولعب بشرف ومشي بشرف
عرفت ليه نحن صفوه ؟؟؟
العالمية العند الدلاقين وين ياجنا الجلابة؟. اقصي ماوصلتم له في الابطال دوري الاربعة الكبار وكان بصحبة راكب وهو سيد البلد الذي جعل السودان يشارك باربعة فرق في بطولات الكاف. اكيد حتقول لي كاس مانديلا الذي عفا عليه الدهر وصار في عداد المفقودين. صحي النوم ناس الاتحاد الافريقي ذاتهم قالوا كاس الكؤوس بطولة الغيت ولم يعد لها قيمة وحتي الكنفدرالية قالوا الوصول للنهائي في الابطال افضل منها والدليل علي ذلك تمت دعوة الهلال مع ابطال افريقيا بحكم وصافة الكبار مرتين ولم يتم دعوة التمهيداب ولم يذكروا كاس مانديلا. الكلام ده ليس من عندي وانما قالوا قرن شطة قريب ده ولو عاوز بجيب ليك الجريدة. اوع تقول لي قرن شطة هلالابي. قرن شطة كان بيلعب للتحرير واستقر في الاهلي المصري وعمره مالعب للهلال وولائه لمصر اكثر من ولائه للسودان. صحوا النوم واشربوا لكم قهوة حبشية تقيلة عشان تفك ليكم مخدر اليخماو الذي اوهمكم بانكم صفوة ولكن انتم صفوة الكفوة وايضا اوهمكم بانكم من الفرق العالمية مع انكم مقعدكم مستديم في محطة التمهيدي. الله يشفيكم من صنف اليخماو الذي وصلكم حتي في دول الخليج ولم يقتصر علي السودان فقط.
جلابي الدوحه كفيت ووفيت ريحتنا اليوم من الرد على هدا المشجع الصحفي الفرحان مع امنياتنا بالتوفيق لي اولادنا الغربال وابو عشربن