المتباكين علي تنفيذ الانضباط لاتزعجونا ويالجنة التسيير اشتروا باقي عقودهم وريحونا،،،،،

تغريدة واتساب

بقلم معاذ ابومؤيد

المتباكين علي تنفيذ الانضباط لاتزعجونا
ويالجنة التسيير اشتروا باقي عقودهم وريحونا،،،،،

لاحديث غير توقيف علاء وبكري
كتاب وجماهير وقدامى لاعبين وادارين سابقين وحاليين
معقولة المريخ يتوقف علي قرار انضباط
عشان لانزعجك ولانظلم
نتمني من الادارة شراء قيمة العقد المتبقي من اللاعبين وقفل كل الابواب!!
عشان عندنا المهم والاهم
وعشان تاني الناس تشوف ليها اقرب باب !!!
عقوبة اصدرت
من يتباكون علي حقوق مالية وظلم
ومن يايدون يطالبون بالانضباط
عشان نقفل الباب بالطبلة والمفتاح
اتمني ان تقدم الادارة علي شراء متبقي العقود من اللاعبين ونفتح صفحة جديدة ونشوف الورانا
لو اشترينا باقي العقود لانفتح لاثغرة قانونية ولاندع باب للمنادين بالانصاف،،
نكرر تجربة الشباب السعودي مع ناصر الشمراني
ونكون انتهينا من باب سيظل مفتوحا ويصبح لبانة في خشم الجميع،،،
••••••••••••••••••••••••••
امامنا دورة ثانية
وامامنا تحديات اكبر من ايقاف لاعبين
والقروبات تركت النفرت واصبحت وراء الايقاف
حتى العيد علي الابواب مافي زول جايب خبر
بس المهم انو الجماهير اصبحت تتقبل قرارات الادارة
واصبحت في ثقافة جديدة اسمها عدم التباكي وراء النجوم
عشان كدة لاذم نستغل ثقافه ووعي الجماهير لبناء سكك حديد المريخ الجديدة
سكة واحدة تقودنا الي مراكز التصنيف والاندية العالمية
غير ذلك سندور في نفس الفلك
نتمني من كل شخص يقوم بدورو ويتركوا للادارة دورها
طالما قبلنا بالادارة الحالية
مزيج التقشف والحنكة الادارية مع عصارة المال
خلطة تنفع سحور للجميع يوميا
حتي ينام المشجع المريخي وفي بطنو
مزرعة من البطيخ الصيفي
اتركوا عبدالصمد يشوف شغلو وودالحاج يقول رايو والوالي يقود الدفة
لاتحانيس ولا واسطة
شراء متبقي العقود يقفل كل الملفات
••••••••••••••••••••••••••
مسك الختام
كرة القدم لاتحتاج للجودية والواسطة
كرة القدم حاليا استثمار وتجارة
وصناعة
ومافي زول بيدور مصنعوا يخسر
ومافي زول يدور تجارتوا تبور
عشان كدة
الضبط والربط مقومات الجيوش
ونحن جيشنا المريخ
سيصارع العام القادم في ادغال
لو ماجهزنا الجيش
سنرجع مثل كل عام
محملين بالهزائم
من اراد التنازل عن الانضباط
علية تجهيز شوالات للهزائم
••••••••••••••••••••••••••
ونحن علي المدرج ندعم ونشجع ونتفرج
كل مانقول نرجع لمريع الدعم يتم ازعاجنا بموضوع منتهي
وكل مانقول نشجع يتوسط مدرجنا اصحاب المارب
وكل مانقول نتفرج
نلاقي فرجتنا ناقصة
وكل عام ندور في نفس النقطة
نشارك ننهزم نرجع التنافس المحلي
وتدور مفس الدائرة العام البعدو
والسبب واحد
خلل اداري وانضباطي وفني
حاليا تم علاج الجزء الاول
الخلل الاداري
والمحاولات جارية لعلاج الخلل الثاني الانضباطي
لكن هواة الهرج والمرج لايعجبهم ذلك
نتمني من الادارة عدم التوقف في تلك المحطة كثيرا
ونتمني معالجة الخلل الفني من نص الموسم عشان نبتدي الموسم القادم مكتملين تدريبيا ولاعبين
••••••••••••••••••••••••••
همسة اخيرة
نتمنى من الادارة تخصيص مجموعة من ابناء النادي لمتابعة ابطال افريقيا والكونفدرالية
يوجد لاعبين مغمورين وصغار سن يحتاجهم الفريق
كل اللاعبين التم ترشيحهم مسبقا من مدربين ابناء النادي افريقيا
شفنا نجاحهم واولهم ايداهور
لذلك الفرصه امامنا والمجموعات شغالة
تكليف اثنين او ثلاثة بمراقبة البطولة لايكلف النادي الا كرت الBN sport
يعني لاتزاكر ولا اقامة ولاسفر
وابناء النادي وقدامي اللاعبين موجودين ومستعدين لخدمة النادي
ادركوا دوري المجموعات قبل مايدركنا سماسرة اللاعبين بالCD المضروبة والملغمة
••••••••••••••••••••••••••
خارج النص
دعوتنا مجددا لكل كتاب المريخ
ارحمونا يرحمكم الله
ركزوا علي المريخ واتركونا من المهاترات
ساعدونا بتقديم مافية خير للفريق والادارة والجماهير
اترك المهاترات ياجميل واصحي

*** برامج التلفزيون لايوجد جديد مثل كل عام
بس الملاحظة اليوم حسين الصادق حالق نص كم
يالحلاق كهربتو قطعت
ولا كمان ناس النيل الازرق مابهمهم مظهر الشاشة حقتهم
قدر ماغالطت نفسي في الحلاقة وقلت امكن خلل اضاءة
لكن الواقع حلاقة نص كم
لاحالق لاماحالق
واغاني واغاني
منتظرين حفل الاعتزال لهذا البرنامج
بمشاركة بعض البرامج الاخري
ويكون اعتزال جماعي

*****
للتاريخ والذكرى اليوم يصادف عيد ثورة الانقاذ الوطني
التاريخ دا كان ليه شنة ورنة
بس حبيت افكركم
والي لقاء في تغريدة اخرى،،،،،
••••••••••••••••••••••••••
المريخ يحتاج الي الجميع
ونحن نحتاج الي عودة المريخ
هل الجميع متفق علي ذلك
ماذا ستقدم للعودة البنتمناها
اسال نفسك قبل ان تسال غيرك
••••••••••••••••••••••••••
# تغريدة طبية:
لتجنب العطش اثناء النهار
حاول تجنب الأغذية الشديدة الملوحة ، وتجنب التوابل والبهارات وخاصة عند السحور لأنها تزيد الاحساس بالعطش . ويستحسن تجنب استعمال الأغذية المحفوظة ، أو الوجبات السريعة التحضير .
واشرب كمية كافية من الماء مع عدم المبالغة في ذلك.
وربنا ينعم علي الجميع بالصحة والعافية
••••••••••••••••••••••••••••
# تغريدة مرورية:
وراء كل حادث مخالفة مرورية
والموبايل يشكل نسبة كبيرة من الحوادث المرورية
اصل واتصل
اتصالك مهم لكن حياتك اهم
لاتسرع فالموت اسرع،،،،،
وربنا يكتب السلامة للجميع
••••••••••••••••••••••••••هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore