المريخ عمل صااااااااااااااااالح
وكفى
إسماعيل حسن
المريخ عمل صااااااااااااااااالح
▪️أشجع المريخ والحمدلله، وأحبه من سويداء قلبي منذ أواخر الخمسينات…. ومنذ ذلك التاريخ لا أغيب عن مشاهدة مباراة من مبارياته إلا نادراً…
▪️وتبقى الحقيقة التي تستحق أن أقرها هنا ب(القلم المليان)، هي أن مريخ هذا العام، أمتع (مريخ جماعي) أشاهده في حياتي..
▪️مريخ يجمع لاعبوه في أدائهم كل عناصر الكرة المطلوبة…
المواهب الفردية.. المهارات العالية… القوة…. العزيمة…. الغيرة على الشعار… ثم التعامل مع الكفر بكل رقة وأدب..
▪️داير كورة بي أخوي وأخوك بمتعوك… دايرها بي رجالة بأدبوك..
▪️حتى الاحتياطيين إذا لعبوا أساسيين، والأساسيون قعدوا احتياطيين، كلو واحد في فرقتنا الحالية..
▪️ده أحسن من ده..
▪️حقيقة لا أدري من أين أبدأ.. وماذا أكتب..
▪️فكأس الدوري أمس، هو أول كأس بعد كورونا.. وأول كأس بعد كأس “كاس”.. وأول كأس بعد الثورة.. وأول كأس بعد رفعنا من قائمة الدول الراعية للإرهاب.. وأول كأس بعد التطبيع….. ونحن طبعاً ملوك “الأول”… لأننا الأول..
▪️وللمعلومية….. منذ أن عرف السودان كرة القدم، جرت مباراتان فقط بين المريخ والهلال بدون جمهور… والإثنتان كسبهما المريخ..
▪️عظمة يا المريخ عظمة..
▪️ماضي وحاضر..
▪️قلت لكم قبل فترة إنه في هذا العام يملأ العين ويدفق.. وحرام يلعب في دوري الدفسي السوداني…
▪️تمريرات صاح… إستلام صاحين… تهديف مركز… دفاع منظم… حارس بي عشرين..
▪️وتاني وعاشر وألف، أرجع وأقول… المريخ عمل صالح…
▪️وناسو ناس طيبين طيبة جد..
▪️ومتواضعين تواضع جد…
▪️ما بتاعين مشاكل.. ولا أوهام..
▪️ناس إيمانهم قوي، وثقتهم في الله لا تحدها حدود.. عشان كده قدر ما تظلمهم، وتكيد لهم، وتحاول أن تمكر بهم؛ ما تقدر عليهم..
▪️وعشان كده ربنا بيكرمهم من سنة تلتين لي يوم الليلة بالإنجازات والمعجزات والكاسات الجوية وكؤوس المناسبات واللعيبة الجد..
▪️وعشان كده نحن بنحبو، ونحب البحبو..
▪️مباراة أمس، كان بإمكان المريخ أن يكسبها بأكثر من خمسة أهداف، لولا أن أخذته الشفقة بالهلال.. فهو في النهاية حبيبه ورفيق دربه ووصيف دنياه..
▪️بعد نهاية المباراة كانت لي طلة سريعة على بعض القروبات الزرقاء… وبعض القروبات المختلطة….
▪️جنس بكاء..
▪️واحد فيهم سأل: هل يستحق جمال سالم 15 ألف دولاراً في الشهر.؟… قلت ليهو أبداً والله… قال لي إنت دخلك شنو؟؟ ضحكني جنس ضحك.. عرفتو عرفني بشمت فيهو..
▪️واحد تاني حنني عديل كده…. رسل الصورة بتاعة الوات ساب الفيها الدموع سايله ديك، وقال تاني ما ح يشجع الهلال.. قلت ليهو مرحب بيك في ديار الفرح… عمل رايح ما رد علي.. عرفت كلامو كلام زعل ساي..
▪️واحد تالت قال لو ما آخر الزمن جايبين فوزي عشان يغلب لينا المريخ بالكجور…. قلت ليهو احتمال حاولوا مع الحكم ما لقوا طريقة، قالوا يشوفوا فوزي يمكن يغلبنا نفسات ساي..
▪️وديل غير الهاجموا إعلامهم وأكد أنه سبب بلاوي الهلال..
▪️اللهم لا شماتة..
▪️ختاماً…تسلمت أمس حافزاً من رابطة قطر، لتسليمه مناصفة بين الحارس أبوعشرين إذا جدد عقده مع المريخ بعد أن حافظ على شباكه نظيفة أمس، وعماد الصيني بوصفه نجم المباراة.. وسأقوم بتسليمه للنجمين اليوم أو غداً بمكاتب صحيفتنا “الأحمر الوهاج”
* شكرا رابطة قطر… شكراً أبو عشرين.. شكرا عماد الصيني… شكرا كل نجوم المريخ..
* وشكرا حكم المباراة النزيه الأمين الشجاع..
* ختاماً.. أعذروني إخوتي القراء على هذه الربكة في المقال وعدم الترتيب.. والأسلوب الما ياهو… وغداً بإذن الله أذكر السبب..
*الثالثة حارة*
▪️من ضرب الزعيم ،،، ما بينفع الفرفير
وصياد البلد ،،،،،، دائما بيرمي الصير
أحمر للرجم ،،،،، والنجمه فأل الخير
َشفاتة دفاع ،،،،،،، الود صلاح وأمير
مرعب يا زعيم ،،،،،، يا مفخرة سوداني
جلاد الخصوم ، هسه الوصيف بيعاني
مسمار من لهب ،، ما عرفنا مين الجاني
والله العظيم ،،،،، باااااااالغت يا السماني
هدف الصاوى لوحه ،،،، وسيما يا غدار
شايف الود جمال ، بالدهشه قام محتار
يا ربي الهلال ،،، محتاج ،، إعاااادة فار
ولا خلاص قنع ،،، بي وجعة ،،، المسمار
مسكين يا هلال ، (الثالثة) حارة شديد
والمريخ صعب ،،،، (بيأدب) ،،،، الرعديد
الممتاز ده هيلنا ،،،، برانا ،،،،، بالتحديد
وكاسات الزعيم ،،،،، في كل يوم بتزيد
ما هماني أصلا ،،،، قصة ،،،،، التسجيل
مين بيسيب زعيمنا ، ولي سواه يميل
المريخ شرف ،،،،،، فارس نضال وأصيل
تيم المعجزات ،،،، عاشقنو مليون ميل
ومجلود الزعيم ، محتاج مساحه تلمو
والسماني كدر ،، وزااد عديل في همو
مسكين الهلال ،،،،، الدوري هسه يسمو
لا رمضان بجيكم ، لا (ورقتين) وحمو…
شاعر المريخ *..أبوبكر عبدالله* ( *بيكو* )
▪️وكفى.
صدقني يا اسماعيل حسن انت مسكين معليش على الكلمه لانو بكره ان شاء الله بتطلع من التمهيدي وتجي تعيط لانو الهلال بعد- دا كلو وتيمو الكعب دا بستمر وانت تجلس تتفرج بس لانو الدوري دا شبعنا منو خالص ولعلمك تاني ما حا تلا قي الهلال بالسوء دا فرضه وضيعها المريخ ولا مش كدا يا اسماعيل حسن بتاع التمهيدي ثلاثة سنه بتطلع ولسه حا تتطلع والمحك افريقيا مش محليا وأسال افريقيا من الهلال وكفى .
الحمد لله الذي شفاكم من الاحقاد واسكتكم من الهجوم علي الحكام المغلوبين علي امرهم. الحكم اخو السمؤل كما تعلم ومادام انتم منتصرين مافي مشكلة لكن الويل له ان هزمتم ودي كانت ستكون ردحي وسكلي لسنين عددا. لقد قابلتم هلال مريض ولو فيكم فايدة كانت جبتو تاركم من سباعية الوحدات.تهانينا لكسب المباراة في الميدان دون اللجوء للمكاتب ولوزان ولكن نذكركم ان الدفرات التحكيمية نتيجة لحملاتكم المسعورة لارهاب الحكام قد انت اكلها في السابق بعدد ضربات الجزاء ذات الرقم القياسي الذي لم يحدث في العالم.
مريخ 2020 افضل من مريخ السبعينات ناس بشرى وبشارة ومحسن عطا وكمال عبدالوهاب وسانتو وغيرهم من الافذاذ؟ يا راجل بالغت عديل فيها. هي مبارة كان المريخ الطرف الافضل فيها بعدما افرع الكاردينال ومن بعده النقر الفريق من كل قواه ولك هل هي نهاية الدنيا؟ لا سوف يعود الهلال اقوى مما كان بإذن الله ويكون بدرا يشع نوره على كل القارة. واضح انو انتصار المريخ اسعد ناس كانت الوساوس تجوس في نفوسهم مرة يتهموا التحكيم ومرة يتهموا الاتحاد ومرة يتهموا الجن الازرق.