المريخاب اللي بيزعلوا بسرعة.. هاكم الجرعة..!!

كرات عكسية
محمد كامل سعيد
المريخاب اللي بيزعلوا بسرعة.. هاكم الجرعة..!!

# أود الإشارة وقبل الدخول في زاوية اليوم الي ان ما ساكتبه في قادم السطور سيكون عن قصد.. وأود من خلاله ان أؤكد لنفسي اولا ان بيع الوهم ليس صعبا علىَ.. وأن ممارسة التعصب شئ سهل جدا جدا ومتاح أكثر من ما يتخيل او يتصور القراء الأعزاء.. لانه متاح انك تسرح بالمتعصبين.. وتسعى لامتلاك افئدتهم كما يفعل الدخلاء على مهنة الصحافة والاعلام داخل سودان آخر الزمان..!!
# لجنة التسيير المريخية دي ح تنجح نجاح باهر.. وستتمكن من حسم كل الملفات العالقة.. ديون تسجيلات وتعاقدات مع الاجانب الي جانب انها قادرة على التعاقد مع مدرب عالمي مقدر يستطيع العودة بالزعيم الي منصات التتويج سواء على الصعيد المحلي او القاري غر الإقليمي.. واحتمال يفتح ليهو سكة مع العالمية ونرى المريخ في كأس العالم للاندية القادمة بعد اربع سنوات..!!
# واحد يقول لي كيف عرفت ان اللجنة التسيرية المريخية الجديدة قادرة على فعل كل تلك “المعجزات” خلال فترة وجيزة..؟! وفي ردي علي ذلك السؤال اقول.. منو اللي قال ان اللجنة دي مدتها قصيرة.. وانها لا ولن تتجاوز الشهرين.. ديل ياخ بعد ما يحققوا الإنجازات والبطولات ح نلقى عشاق المريخ وهم يعلنون التمسك بهم ويطالبونهم بضرورة الاستمرار الي ما لا نهاية..!!
# بعدين ناس اللجنة ديل الظاهر عليهم عندهم الإحساس بالزمن.. لذلك ننتظر ان يبدأوا التحرك في إنجاز الأعمال الإدارية داخل نادي المريخ فورا وقبل ان يعقدوا الاجتماع الأول كمان.. اها تأني في شنو.. ح تشوفو يا جماهير المريخ وتتاكدوا من كلامي ده.. بس لازم تدوهم فرصة ونخليهم يشتغلوا عشان ينجزوا ويفرحوا الشعب المريخي المغلوب على أمره..!!
# اها اجيب ليكم خير احلى..؟! طيب عارفين جمال الوالي الرئيس الطوالي قرر مساندة لجنة التسيير وتقديم الدعم الكامل لها.. يللا افرحوا يا جماعة عشان قروش الوالي دي ما احلاها خاصة على الارزقية الذين وصلوا إلى مرحلة متأخرة في تمجيدهم للرئيس الطوالي لا لشئ سوي لأنهم “لاهفين منو شئ وشويات”..!!
# كمان اقول ليكم على سر.. قالو كمال شداد ولانو هلالابي موجوووع شديد عشان المريخ جاب ليهو مجلس جديد.. خاصة وان الزول ده ما بيحب الأحمر نهائي.. وما بيدور اي خير يجي للمريخ ولو في مرادوا.. المريخ ينزل درجة ثالثة ويلعب في ميادين الليق اللي جنب مقابر احمد شرفي.. لكن ده بعدك يا حبيب.. المريخ بمن حضر.. ورجاله يسدون قرص الشمس.. بي جيوبهم وجازهم وآبار بترولهم يا شداد.. انت ما عارف وآلا شنو..؟!
# بعدين يا مريخاب ما تسمعوا الإشاعات والكلام البقول انو محمد مصطفي وقع للهلال.. هلال شنو كمان.. الحقيقة ان الرئيس الطوالي اَتدخل في الموضوع.. وخلال ثواني عبر الهاتف انهار الحارس الدولي… وأعلن عودته للكشف الأحمر وبدون أي مقابل.. يطلب مقابل كيف واللي اتصل بيهو الوالي.. وزي ما بيقولوا “اي زول يقعد مع الوالي كان لغم ما بيقوم”.. تقول لي شنو وشنو وما عارف..!!
# لجنة التسيير بدأت اتصالات مكثفة عشان تحسم امر المحترفين الجدد والجهاز الفني العالمي المرتقب.. ديل ياخ قالوا ليك جايبين مدرب يقول لاي مهاجم اعمل كده.. طوالي يجيب ليهو تلاتة أقوان.. ويقول للحارس اعمل كده الحارس ده عشر مباريات ما يخش فيهو قوون نهائي.. ويخش فيهو قوون كيف وهو مدرب عالمي.. وما في زيوو في كل العالم..؟!!
# كمان لجنة التسيير جايبين لينا مهاجم زي كابتن ماجد.. ااي والله ياخ ده لمن بيشوت الكورة.. تلاثة يوم تكون مااااشة وما تصل الشبكة.. لكن لما تصل بالجد ح تقدها وتمرق بالناحية التانية.. ويمكن كمان لو صادفت ليها وش واحد من المشجعين تقوم تقتلووو عديييل كدة.. وكيف ما تقتلووو وهي تسديدة قوية وقاتلة..؟!!
# اما الهلال فإن الخطوات التي ستقوم بها لجنة التسيير ح تساهم في فرتقة ذلك الفريق الذي لا يعرف أي شئ عن المجالس المنتخبة.. بل على العكس حرصت الحكومة على تعيين لجنة وبانتخابات صورية وكان في مقدمة ذلك المجلس السوباط اللي هو في الأساس مريخابي.. والعليقي ما هو إلا زول بتاع جاز.. هسه نحن جبنا ليكم لجنة جديدة لنج عشان نوريكم الجاز ده مكانووو وين..!!
# يا جماهير المريخ انا ما عيزكم تشيلوا اي هم.. لان المريخ اقترب كثيرا من العالمية خاصة وان كرة القدم صارت صناعة َلا يمكن الاعتماد فيها على موارد النادي.. نادي شنو وجماهير منو اللي بتشيل الشيلة.. ده كلام فاضي.. اوعكم يا صفوة تسمعوووه عشان ما بيجيب ليكم مشاكل في المعدة وَلا المصران..!!
# اها يا جماعة اقعدوا عافية ولازم يكون عندكم ثقة في كلامي ده لاني جايبو من بيت الكلاوي.. جبتوا ليكم عشان اطمنكم واطمم بطون الهلالاب اللي ما قدروا ينومووو من ما أعلنوا عن اسماء لجنة التسيير المريخية التي ستكتسح كل شئ..!!
# *تخريمة اولي:* كلامي ده ما تنسوووه وطوالي خلووه في بالكم لاني عارف انتو عايزين شنو.. بس خليكم قراااب..!!
# *تخريمة ثانية:* المريح ح يبقى “نار منقد”.. وإذا حاول احد الهلالاب الاقتراب منه فلابد انه ح يتحرق بي الجاز… ههههههه اضحكوا يا مريخاب اضحكووا وفرفشووا..!!
# *تخريمة ثالثة:* اللجنة الفنية فيها منو..؟! يتوقع عودة ابراهومة ابن النادي الوفي.. أما محسن سيد فهو مواصل لانو وفي جدا وجاب لينا سيكاقا…!!
# *حاجة اخيرة:* نعيد ونكرر ونشير الي ان المتابعات أكدت لجنة التسيير جاهزة لسد اي مطالب لكل اللاعبين وعدد من المدربين بخصوص الشكاوي التي سيتقدمون بها في مقبل الايام ضد المريخ.. بس خليكم جاهزين للجكة الجاية..!!
# *همسة:* تاني بنقول وبنعيد كلام اهلنا زماااان: (العود لو ما فيهو شق.. ما بيقول طق).. نحنا هسه تفرغنا تماما لسماع (الطقطقة)..!!
# *همسة خاصة:* سامحني يا رب.. تاني بنقول.. بكرة نقعد جنب الحيطة.. ونسمع الزيطة.. ما تمشوو بعيييد..!!