صَــابِنَّهَـا
محمد عبد الماجد
الهلال يفوز في عامٍ واحدٍ بثلاثة دوريات
ست سنوات وأربعة مجالس إدارة على إحصائية الدكتور علي عصام وحصاد المريخ صفر من البطولات.
المريخ صفر بطولات.
استعانوا بالدعم السريع.. حينما أصبحت قيادات تلك المليشيا أعضاءً في مجلس المريخ ومستشارين لمجلس المريخ ورؤساء لجان.
لم يكتفوا بحميدتي.. تم الاستعانة بنجل حفتر.
إنتوا بتتكلموا كيف؟
العشاء الأخير.. بعده طوالي قامت الحرب.
حميدتي أعلن عن هلاليته.. وقال عن الهلال إنه هلال الشعب.. مع ذلك لم يجد نافذة أو طريقة يدخل بها على الهلال.
بل دخل في صراع مع رئيس الهلال السوباط، في الوقت الذي جمعته علاقات ومصالح تجارية مع رئيس المريخ وقتها.
الملفات مازالت مفتوحة.
وكل شيء في وقته.
حتى الجكومي كان يستعين بقوات الدعم السريع لاحتلال استاد المريخ.
إنتوا فاكرين الناس بتنسى؟
الهلال طريقه سالك.. وكلامه واضح.. ما عندنا حاجة بنخجل منها أو بنخاف عليها.
الهلال شال الدوري السوداني مرتين في هذا العام.
في هذه الحرب شلنا الدوري السوداني مرتين.
دوري ميداني ومكتبي.
وشلنا الدوري الرواندي.
لقد فشلوا فيما حسبوه نجاحاً لهم.
بطولها وعرضها.
برّها وجوّها.
سمائها وأرضها.
جوّه وبرّه.
شلنا كل الدوريات التي ننافس عليها.
في شرقها وغربها.
شمالها وجنوبها.
ملعبها ومكتبها.
شلناه.
في الخرطوم الصامدة.. في نواكشوط العزيزة وكيجالي الحبيبة.. شلناه شلناه.
حاول يخفي نفسه.. وهل يخفى القمر؟
أبداً لا.. شلناه شلناه.
لا أحدٌ من بعد في مجلس المريخ يمكن أن يلوم أمير كمال أو رمضان عجب أو طبنجة أو 18 محترفاً أجنبياً لفشلهم في تحقيق بطولة من الميدان، إذا كانت مجالس المريخ المختلفة قد فشلت في ذلك مكتبيًا!!!
لا أحدٌ يمكن أن يلوم عشرة مدربين فشلوا في تحقيق أية بطولة للمريخ.
مجالس المريخ عن بكرة لجانها فشلت في ذلك.
فشلاً ذريعاً.
بجازها ودخيريها ـ وبأجهزة أجنبية مختلفة.. انجليزية وبرازيلية وفرنسية وتونسية وصربية وإيطالية ومصرية مع الخبرات السودانية فشلوا جميعاً في تحقيق أي لقب للمريخ.
قبل الحرب.
وبعدها.
بحميدتيها وحفترها.
لا جديد يُذكر، بل قديم يُعاد.
لا شيءٌ.
حتى (الشفشفة) فشلوا فيها.
والحكاية بسيناريوهاتها المُضحكة تحكي تناقضهم العجيب وتقدم لنا فاصلًا من أشياء لا تحدث إلا في المريخ.
المريخ فشل في كل شيء.. ميداني ومكتبي.. مجالس منتخبة ومجالس مُعيّنة.
عندما سجل فولمو وانتصر الهلال في الملعب، قالوا تسلل.
وعندما اشتكوا إلى لجنة المسابقات، اعتبروا الشكوى في حد ذاتها بطولة.
لجنة المسابقات أنصفت الهلال.. طعنوا في القرار وذهبوا إلى لجنة الاستئنافات، وعندما قبلت لجنة الاستئنافات طعنهم، قالوا إن اللجنة أشادت بمذكرة المريخ وتغزلت في مرافعته.. نفس اللجنة عندما فحصت قرارها بطلب من الهلال، اعتبروا أن ذلك الانتصار القانوني للهلال باطل، ورموه بأنه انتصار مكتبي، رغم أن الأصل في هذا الانتصار هو انتصار الهلال في الملعب بهدف فولمو.
انتصار في الميدان.
انتصار في النهار.. وقدام كل الناس ومنقول على تلفزيون السودان.
انتصار رجعنا من أجله الخرطوم.. افتتحوا به استاد الخرطوم بعد الحرب وغيّروا ليه النجيلة.
إنتوا انتصار بهذه الجمال مع تلك المسيرات ما عندكم له قيمة.
إنتوا بتتكلموا كيف؟
الهلال يبحث فقط عن حماية انتصاراته الميدانية، فقد انتصر الهلال في الملعب فعن أي شيء تبحثون في المريخ؟
ست سنوات.. ولا شيء.
دوري موريتاني.
دوري رواندي.
دوري سوداني.
دوري وكأس.
مجلس منتخب.. ومجالس معينة.
ملعب ومكتب.
أجهزة فنية محلية.. أجهزة فنية أجنبية.. و18 محترفاً أجنبيًا و6 جنسيات وخروج من التمهيدي.
غريب وداركو.
والنهاية في كل سنة بشيلوا الجهاز الفني.. وممكن يغيِّروا المجلس.. ويصدروا بيانًا.
آخرهم في كل موسم بيان.
المريخ عنده رئيس لجنة قانونية في وجوده خسر المريخ في أسبوع واحد شكوتين.
شكوى من هلال كريمة وشكوى من الأمل عطبرة.
بقت ليكم حارة الآن.
لقد خسرتوا في هذا الموسم ثلاثة شكاوى.. اتنين عليكم وواحدة مرفوعة منكم.
خسروا كل شيء.
ديل كأس الذهب بتاع سد مروي باعوه.. وسكتوا عليه ودسوه.
بقت علينا نحن.
المريخ الذي كان يسخر من ذهاب الهلال إلى المحكمة الرياضية الدولية، أصدر بيانًا الآن يتحدث فيه عن الذهاب إلى المحكمة الرياضية الدولية.
المحكمة الرياضية الدولية بقت (بطولة) الآن.
طلب الفحص الذي تقدم به الهلال وهو لا يمنع من حق الذهاب للمحكمة الرياضية كانوا يستهزئون به.
قالوا إن مرافعتهم التي تقدم بها للجنة الاستئنافات تدرس.
نفس اللجنة وفي وجود الدخيري، أعادت الحق إلى أهله.
المضحك أنهم اعتبروا إشادة اللجنة بمرافعتهم التي كتبوها بالذكاء الاصطناعي سندًا قانونيًا لهم.
والدخيري لو جابوا ليه ركشة من المريخ بشيد بيها.
في إداري في الاتحاد العام كان عندما ينتصر المريخ بحرق عمته في المقصورة.
نجيب ليكم الأسماء والّلا ما في داعي.
ماذا تنتظرون من الدخيري؟ وهو ما فاضل ليه إلا أن يشارك مشجع المريخ الكبير الجنيد في طبلته.
الدخيري كان على الإشادة.. أصلو ما بقصِّر.
لكن هي إشادة مبنية على الانتماء.. مبنية على باطل وليس لها أي سند قانوني.
وقعت ليكم!؟
حميدتيها وحفترها.
جيبها وسهلها.
بجازها ودخيربها.. الهلال بطلاً للدوري الممتاز كما كان.
بملعبها ومكتبها.
نحن لا نتحدث هنا عن بطولة مكتبية.. نحن نتحدث هنا عن بطولة ميدانية.
بطولة لم يخسر فيها الهلال في الملعب ولم يتعادل.
إنه الهلال يا سادة.. هكذا أرادت لنا الأقدار أن ننتصر مكتبياً بعد الانتصار ميدانياً.
يؤكد ذلك تأهل الهلال إلى مرحلة المجموعات في البطولة الأفريقية للمرة الثامنة على التوالي وخروج المريخ من التمهيدي للمرة الرابعة توالياً.
وارجع ليكم تاني وأقول ليكم نحن أي حاجة عندنا بي نظام.
قاصدنها.
حتى قبول الطعن مقصود.
إشادة الدخيري مقصودة.
نائمين في الإشادة.
في دوري بحققوه بإشادة.
إنتوا جايين من وين؟
إنتوا طلعتوا لينا من وين؟
بالهم في كاس .. الهلال ظهر ليهم بطلب الفحص.
الموضوع ولا محتاج.
في يوم الأربعاء 10 يونيو 2025م كتبت المواقع هذا الخبر (تُوِّج فريق الهلال بلقب دوري النخبة السوداني لكرة القدم، عقب فوزه على غريمه التقليدي المريخ بهدف دون رد، في المباراة التي جمعتهما مساء اليوم على استاد الخرطوم الدولي، ضمن الجولة السابعة والأخيرة من المسابقة).
موقع اليوم السابع المصري نشر هذا الخبر وكتب عن تتويج الهلال وقال (أحرز هدف اللقاء الوحيد اللاعب فولمو في الشوط الثاني، ليحسم الهلال ثلاث نقاط غالية قادته إلى التتويج بالبطولة).
الدخيري وقتها كان وين؟
عاوزين تلغوا هدف فولمو بإشادة الدخيري.
في 13 يوليو أي بعد تتويج الهلال ميدانياً بـ33 يومًا كان هذا الخبر (لجنة الاستئنافات باتحاد الكرة السوداني تقبل استئناف المريخ وتمنحه لقب دوري النخبة. قررت لجنة الاستئنافات بالاتحاد السوداني لكرة القدم قبول الاستئناف المقدم من نادي المريخ بشأن مباراة القمة، واعتبار نادي الهلال خاسراً للمباراة، ليُتوّج المريخ رسميًا بطلاً لدوري النخبة السوداني.. ومن المنتظر أن يصدر الاتحاد السوداني لكرة القدم تفاصيل القرار وأسبابه في بيان رسمي).
الدخيري ظهر بعد القضاء على طبنجة وصحبه في الميدان.
صفحة المريخ كانت قد كتبت يوم 13 يوليو:
رسمياً.. المريخ بطلاً للدوري السوداني الممتاز:
إحاطة إعلامية
تُوِّج المريخ رسميًا بلقب الدوري السوداني الممتاز للموسم 2025-2026، بعد أن أصدرت لجنة الاستئناف بالاتحاد السوداني لكرة القدم قرارها بقبول الاستئناف المقدم من النادي، وإلغاء قرار لجنة المسابقات، واعتبار الهلال خاسرًا لمباراة القمة بنتيجة (2-0)، مع منح نقاط المباراة الثلاث للمريخ.
وبهذا القرار، يحسم المريخ لقب الدوري الممتاز رسميًا، مضيفًا إنجازًا جديدًا إلى سِجِله الحافل بالبطولات.
وداركو قال حققنا الدوري بجدارة.
الزول دا ألحقوه وشيلوا منه حافز الدوري.. قالوا ليه الهلال شال بطولته.
الدوري رجع لسيد البلد.
حكمة الله يوم 10نوفمبر أي بعد خمسة شهور بالتمام والكمال من تتويج الهلال ميدانيًا تم تتويج الهلال مكتبيًا.. ليكون اللقب ميدانيًا ومكتبيًا.
من يوم عشرة إلى يوم عشرة.. الهلال عشرة على عشرة.
عشرة وعشرة دي ما بتذكِّركم حاجة.
نحن أي حاجة عندنا بي نظام.
قاصدنها.. ما سُلب مكتبيًا يُنتزع مكتبيًا.. وما نُهب يوم عشرة يونيو رجع يوم عشرة نوفمبر.
قاصدنها.
نحن أي حاجة عندنا بي نظام.
صفحة الهلال اليوم كتبت (استرد نادينا، لقب الدوري الممتاز، اليوم الثلاثاء، بقرار من لجنة الاستئنافات بالاتحاد السوداني لكرة القدم، التي قبلت طلب المراجعة المُقدّم من النادي شكلاً وموضوعاً، وألغت قرارها السابق القاضي بتحويل نقاط مباراة القمة إلى المريخ الخرطوم. وعقدت اللجنة، برئاسة مولانا محمد حمد البشير رئيس اللجنة، وعضوية الأستاذ محمد عيسى، والدكتور زهير عبد الملك، والمستشار الزين الدخيري عضواً ومقرراً، اجتماعين يومي 9 و10 نوفمبر الجاري، وخلصت بعد مراجعة الطلب والمستندات المرفقة إلى اعتماد نتيجة المباراة كما جاءت في تقرير الحكم. وبموجب القرار، عاد اللقب إلى خزائن سيد البلد، ليواصل النادي تأكيد مكانته بوصفه النادي الأكثر تتويجاً بالبطولات في السودان).
الله أكبر.
القرار طلع من نفس اللجنة.
نعمل ليكم شنو اكتر من كدا؟
في الملعب ما وقعت ليكم.. قلنا نجيبها ليكم من المكتب!!!
أصلو شغلكم كلو شغل مكاتب.
أها في المكتب، انتصر الهلال.
وللمعلومية.. اللجنة التي أصدرت هذا القرار، الدخيري برضو موجود فيها مقرراً.
الدخيري بتاع الإشادة.. كان جزءًا من هذا القرار.
خلوا الإشادة تنفعكم.
إن شاء الله تبقى ليكم بطولة، مع أنّ قدر المريخ هو أن يكون للهلال وصيفًا.
في الدوري الموريتاني حقق المريخ المركز السادس.
والهلال هو البطل.
خلوه الدخيري.
في الدوري الرواندي حل المريخ في المركز الثالث.
والهلال هو البطل.
في الدوري السوداني المريخ وصيفًا.
بجازها ودخيريها.
حميدتيها وحفترها.
ست سنوات ونحن في الحالة دي.
يشيلوا الجهاز الفني.
يشيلوا دائرة الكرة.
علي جعفر مرة رهينة ومرة إقالة.
يسجلوا أجانب جدد.
ومرات كمان يشيلوا المجلس كله ويجيبوا لجنة جديدة.
والحال في حالهُ.
في موريتانيا.. لم ينجح أحدٌ.
في رواندا.. لم ينجح أحدٌ.
في السودان.. دوري وكأس.. ملعب ومكتب.. دخيري وجاز.. حميدتي وحفتر.. وبرضو لم ينجح أحدٌ.
وصافتكم للهلال كُتبت عليكم.
في الملعب وفي المكتب.
وحتى الوصافة في نواكشوط وكيجالي لا يمكن الوصول إليها.
هلالابي قال لي لأول مرة في التاريخ فولمو يسجل يوم 10 يونيو.. وإعادة الهدف تكون في يوم 10نوفمبر.
كأنهم كانوا في حاجة إلى خمسة أشهر عشان تقع ليهم.
زي الزول البضحك في النكتة تاني يوم.
يفهمها بعد ما يمشي البيت.
في الملعب غلبناكم.
في المكتب غلبناكم.
وفي بيتكم ذاتو بنغلبكم.
الهلال حقق هذا الموسم ثلاث بطولات.
موسم 2025 – 2026م الهلال حقّق فيه الدوري الرواندي والدوري السوداني مرتين «ملعب ومكتب»!!!
في سنة واحدة الهلال حقق ثلاثة دوريات.
والله دي ما حصلت قبل كدا.
ويا ريت المريخ يمشي المحكمة الرياضية الدولية، عشان نحقق الدوري أربع مرات.
شيلوا إشادة الدخيري وامشوا المحكمة الرياضية، عشان ناس المحكمة الرياضية يضحكوا عليكم.. يقولوا ليكم عضو لجنة أو مقررها يتغزّل في مرافعة طرف في قضية ينظر إليها.
الإشادة دي براها ممكن تنسف مرافعة المريخ.
الغريبة.. قرار اللجنة عن طلب الفحص صدر في وجود الدخيري!!!
نفس الزول.
غايتو وفّرتوا علينا مشوار لوزان.
وفّرتوا علينا رسوم الشكوى.
وفّرتوا لينا حق الجاز.
نلفت النظر أن الهلال لم يكن طرفاً في شكوى المريخ للمحكمة الرياضية الدولية والذ
ي حرم الهلال من بطولة حققها في الملعب.. مع أن الهلال كان المتضرر الوحيد من القرار.
الموضوع وقتها كان مطبوخاً مع مريخ الفاشر.
لكن الآن الهلال الطرف الأصيل في القضية.
…..
متاريس
إذا كان انتصار 10 يونيو يُحسب للاعبين ولفولمو مسجل الهدف على وجه خاصٍ، فإن انتصار 10 نوفمبر يُحسب لمجلس إدارة الهلال، أما صاحب الهدف فهو الأمين العام لمجلس إدارة الهلال الدكتور حسن علي عيسى.
هذا الرجل يستحق التقدير والثناء، وهو قد تعرّض لانتقادات كثيرة.. لكنه في الليلة الظلماء نجد البدر.
كذلك نقدم التهاني والتبريكات لرئيس نادي الهلال السوباط ولنائبه رئيس القطاع الرياضي محمد إبراهيم العليقي وللمهندس رامي كمال ونصر الدين، فقد كان احتفالهم بعودة اللقب احتفالاً جميلاً، أكد أن المجلس فعلاً قادرٌ على المحافظة على حقوق الهلال.
والأهم من ذلك، التعايش مع فرحة الجمهور بعودة اللقب.
هذا اللقب اعتبره الأهم في تاريخ الهلال.. لأنه دوري ملعب ومكتب!!!
عاد الوصيف إلى وصافته وهو يجر أذيال البيانات.
شالوا داركو بعد هدف فولمو.. بعد قرار لجنة الاستئنافات مفروض تشيلوا لجنة مجاهد سهل.
لجنة غير أنها تخرج من التمهيدي، ما شفنا ليها حاجة.
وقت يقولوا ليكم نحن أي حاجة عندنا بي نظام، بتقعدوا تنقنقوا.
عاوزين احتفال كبير بدوري ملعب ومكتب.
…
ترس أخير: ما عاوز أخُش في حِتّــة تانيَــة.
قد يعجبك أيضا



